កូរ៉េខាងជើង-រុស្ស៊ី ប្រកាសពង្រឹងទំនាក់ទំនងយោធាជាមួយគ្នា

ក្នុងជំនួបរវាងមេដឹកនាំកូរ៉េខាងជើង គីម ជុងអ៊ុន និងរដ្ឋមន្ត្រីការពារជាតិរុស្ស៊ីលោក អាន់ដ្រេ ​បេលូសូហ្វ នៅទីក្រុងព្យុងយ៉ាងកាលពីថ្ងៃសុក្រទី២៩ខែវិច្ឆិកាឆ្នាំ២០២៤ រដ្ឋាភិបាលនៃប្រទេសទាំងពីរ បានប្រកាសបង្កើនកិច្ចសហប្រតិបត្តិការយោធាជាមួយគ្នា ស្របពេលស្ថានការណ៍ពិភពលោក កំពុងក្តៅដូចបាយពុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីប្រកាសនេះធ្វើឡើង អំឡុងពេលលោក បេលូសូហ្វ បំពេញទស្សនកិច្ចប្រទេសកូរ៉េខាងជើង ជាមួយគោលបំណងពង្រឹងសមត្ថភាពការពារជាតិប្រទេសទាំងពីរ និងជំរុញទំនាក់ទំនងមិត្តភាព កិច្ចសហប្រតិបត្តិការទៅវិញទៅមក និងការអភិវឌ្ឍទំនាក់ទំនងរវាងកងទ័ពទាំងពីរ។

ក្នុងដំណើរនោះ លោកបេលូសូហ្វ បានសម្តែងការដឹងគុណចំពោះចំណងទាក់ទងដ៏ស៊ីជម្រៅរបស់ប្រទេសទាំងពីរ ហើយបានកោតសរសើរគោលនយោបាយការបរទេសឯករាជ្យទាំងស្រុង របស់កូរ៉េខាងជើង។

សេចក្តីប្រកាសនេះទៀតសោត កើតឡើងចំពេលសហរដ្ឋអាមេរិកនិងកូរ៉េខាងត្បូង ចោទថា លោក គីម ជុងអ៊ុន បានបញ្ជូនទាហានជាង១០ ០០០នាក់ ទៅជួយរុស្ស៊ីប្រយុទ្ធជាមួយអ៊ុយក្រែន។

យ៉ាងណាក្តី លោកគីម បែរចោទបកទៅវិញថា ការដែលមហាអំណាចលោកខាងលិច បើកភ្លើងខៀវឲ្យទីក្រុងកៀវ យកអាវុធរបស់ពួកគេទៅវាយប្រហារចូលដីរុស្ស៊ីនោះ គឺបានលាតត្រដាងឲ្យឃើញយ៉ាងច្បាស់ នូវការចូលដៃដោយផ្ទាល់ក្នុងសង្គ្រាមនេះ។

សូមបញ្ជាក់ថា រុស្ស៊ីនិងកូរ៉េខាងជើង បានពង្រឹងទំនាក់ទំនងយោធាជាមួយគ្នាយ៉ាងស្អិតរមួត ចាប់តាំងពីទីក្រុងមូស្គូ បើកការលុកលុយអ៊ុយក្រែនក្នុងខែកុម្ភៈឆ្នាំ២០២២។

មិនត្រឹមប៉ុណ្ណឹង កាលពីដើមខែវិច្ឆិកា ទីក្រុងព្យុងយ៉ាងថែមទាំងផ្តល់សច្ចាប័នលើកិច្ចព្រមព្រៀងការពារជាតិដ៏សំខាន់ជាមួយរុស្ស៊ីទៀតផង បន្ទាប់ពីសមាជិកសភានៅទីក្រុងមូស្គូ ក៏បានបោះឆ្នោតជាឯកច្ឆ័ន្ទលើកិច្ចព្រមព្រៀងនេះ ដូចគ្នា៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើងដឹកជញ្ជូនប្រេងជាងមួយលានធុងពីរុស្ស៊ីដោយ​បំពានបម្រាម​ទណ្ឌកម្ម​ទ្វេដង​