ព័ត៌មានអន្ដរជាតិ

លោក ត្រាំ ព្រមានក្រុមប្រទេស BRICS ជុំវិញរឿងប្រឆាំងនឹងការប្រើប្រាស់លុយដុល្លារអាមេរិក

បានផុស

២ years មុន

នៅ

ថ្ងៃអាទិត្យ ១ ធ្នូ ២០២៤

ដោយ

Chheang

ប្រធានាធិបតីអាមេរិកទើបជាប់ឆ្នោត លោក ដូណាល់ ត្រាំ កាលពីថ្ងៃសៅរ៍បានទាមទារឲ្យប្រទេសសមាជិក BRICS មិនត្រូវបង្កើតរូបិយប័ណ្ណថ្មី ឬគាំទ្ររូបិយប័ណ្ណផ្សេងទៀត ដែលនឹងជំនួសប្រាក់ដុល្លារអាមេរិក។ បើមិនដូច្នោះ នោះ BRICS នឹងប្រឈមមុខនឹងការដំឡើងពន្ធ ១០០% ពីសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានសរសេរសារបង្ហោះនៅលើបណ្ដាញសង្គម Truth Social ថា៖ «យើងទាមទារឲ្យមានការប្តេជ្ញាចិត្តពីប្រទេសទាំងនេះថា ពួកគេនឹងមិនបង្កើតរូបិយប័ណ្ណ BRICS ថ្មី ឬគាំទ្ររូបិយប័ណ្ណផ្សេងទៀត ដើម្បីជំនួសប្រាក់ដុល្លារអាមេរិកដ៏មានអនុភាព ឬពួកគេនឹងប្រឈមមុខនឹងពន្ធ ១០០% ហើយគួរតែរំពឹងថានឹងត្រូវពោលពាក្យលាទៅកាន់ការលក់ចូលទៅក្នុងសេដ្ឋកិច្ចសហរដ្ឋអាមេរិកដ៏អស្ចារ្យ»។

គួរបញ្ជាក់ថា លោក ត្រាំ បានសង្កត់ធ្ងន់ជាយូរមកហើយថា លោកចង់ឲ្យប្រាក់ដុល្លារអាមេរិកនៅតែជារូបិយប័ណ្ណបម្រុងរបស់ពិភពលោក ដោយនិយាយនៅក្នុងបទសម្ភាសន៍មួយកាលពីខែមីនាថា លោក «នឹងមិនអនុញ្ញាតឲ្យប្រទេសនានាដកប្រាក់ដុល្លារ» ទេ ព្រោះវានឹងក្លាយជាផលប៉ះពាល់ដល់សហរដ្ឋអាមេរិក។

ក្រុមប្រទេស BRICS ដូចជា ប្រេស៊ីល រុស្ស៊ី ឥណ្ឌា ចិន និងអាហ្រ្វិកខាងត្បូង បានពិភាក្សាអំពីបញ្ហានៃការដកប្រាក់ដុល្លារនៅឯកិច្ចប្រជុំកំពូលក្នុងឆ្នាំ២០២៣។ ប្រតិកម្មប្រឆាំងនឹងការត្រួតត្រារបស់ប្រាក់ដុល្លារ បានកើនឡើងយ៉ាងខ្លាំងនៅឆ្នាំ២០២២ នៅពេលដែលសហរដ្ឋអាមេរិកបានព្យាយាមដាក់ទណ្ឌកម្មសេដ្ឋកិច្ចនៅលើប្រទេសរុស្ស៊ី៕

ដោយ៖ ឈាង