ជនភៀសខ្លួនកើន​ជាង​៤៨០០០នាក់នៅស៊ីរី ក្រោយ​ជម្លោះប្រដាប់​អាវុធ​កើន​ឡើង​​

អង្គការសហប្រជាជាតិបាននិយាយថា មនុស្សជាង​៤៨០០០​នាក់ត្រូវបានបង្ខំឱ្យ​មាន​ជន​ភៀសខ្លួនចេញពីតំបន់ Idlib និងភាគខាង​ជើងទីក្រុង Aleppo នៃ​ប្រទេសស៊ីរី ខណៈដែលការប្រយុទ្ធគ្នារវាងកងកម្លាំងរដ្ឋាភិបាល និងក្រុមឧទ្ទាមកាន់តែកើនឡើង។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី០៤ខែធ្នូនេះ។

ការិយាល័យ​សម្របសម្រួល​កិច្ចការ​មនុស្សធម៌​របស់​អង្គការសហប្រជាជាតិ​បាន​និយាយថា ជាង​ពាក់កណ្តាល​នៃ​អ្នក​ភៀសខ្លួន​គឺជា​កុមារ​ ខណៈការវាយប្រហារបានប៉ះពាល់ដល់ហេដ្ឋារចនាសម្ព័ន្ធសំខាន់ៗ រួមទាំងកន្លែងថែទាំសុខភាព សាលារៀន និងជំរុំផ្លាស់ទីលំនៅ។

ក្រុមឃ្លាំមើលសិទ្ធិមនុស្សស៊ីរី បាននិយាយថា កងកម្លាំងរដ្ឋាភិបាលបានធ្វើការវាយប្រហារតាមអាកាសយ៉ាងហោចណាស់​៤៥លើកប្រឆាំងនឹងកងកម្លាំងឧទ្ទាមនៅភាគខាងជើងខេត្ត Hama កាលពីថ្ងៃចន្ទ ដែលជាការវាយប្រហារដ៏ធំបំផុតចាប់តាំងពីថ្ងៃពុធមុន ខណៈខេត្ត Hama រួម​បញ្ចូល​ទាំង​មជ្ឈមណ្ឌល​ដឹក​ជញ្ជូន​យុទ្ធសាស្ត្រ​ដែល​តភ្ជាប់​តំបន់​ជាមួយ​នឹង​រដ្ឋធានី Damascus។

ទីភ្នាក់ងារសារព័ត៌មានរដ្ឋរបស់ប្រទេសស៊ីរីបានរាយការណ៍ថា ការវាយប្រហារតាមអាកាសក៏បានវាយប្រហារលើខេត្ត Idlib ផងដែរ ដែលបណ្តាលឱ្យមានអ្នកស្លាប់ និងរបួសជាច្រើននាក់នៅខាងក្រុមឧទ្ទាម។

គួរបញ្ជាក់ថាមនុស្សជាង​៥១០នាក់រួមទាំងជនស៊ីវិលត្រូវបានគេរាយការណ៍ថាបានស្លាប់នៅក្នុងអរិភាពចាប់តាំងពីសប្តាហ៍មុនមក៕

អត្ថបទ៖ ប៊ុន សុភាព