អ៊ីស្រាអែលបន្តវាយប្រហារឥតប្រណីលើផ្ទះសម្បែង​កន្លែងជ្រក និងជំរុំនានានៅហ្គាហ្សា

យ៉ាងហោចណាស់មនុស្ស៥០នាក់ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលនៅទូទាំងតំបន់ហ្គាហ្សា ខណៈដែលរថក្រោះអ៊ីស្រាអែល បានរុល​ចូលទៅក្នុងផ្នែកភាគខាងជើងនៃតំបន់ Khan Younis នៅភាគខាងត្បូងហ្គាហ្សា។

ក្រុមគ្រូពេទ្យ បានឲ្យដឹងថា មនុស្សយ៉ាងហោចណាស់ ២០​នាក់ត្រូវបានសម្លាប់និងផ្សេងទៀតបានរងរបួសនៅក្នុងការវាយ​ប្រហាររបស់អ៊ីស្រាអែលកាលពីថ្ងៃពុធលើជំរុំតង់មួយនៅ al-Mawasi ក្បែរតំបន់ Khan Younis។ ក្រសួងការពារជនស៊ីវិលប៉ាឡេស្ទីន បាននិយាយថា ការវាយប្រហារនេះបានធ្វើឱ្យ​ជម្រក​​តង់​ជាច្រើនខ្នងត្រូវ​ឆេះ។

បើតាមសម្ដីរបស់ភ្នាក់ងារព័ត៌មាន​Al Jazeera រាយការណ៍ពី Deir el-Balah នៅកណ្តាលហ្គាហ្សាបាននិយាយថាចំនួនអ្នកស្លាប់ត្រូវបានគេរំពឹងថានឹងកើនឡើង ខណៈអ្នកជំងឺដែលស្ថិតនៅក្នុងមន្ទីរពេទ្យ ត្រូវបានគេរំពឹងថានឹងបាត់បង់ជីវិតបន្ថែមទៀត ដោយសារតែមិនមានការថែទាំសុខភាពគ្រប់គ្រាន់ ការផ្គត់ផ្គង់វេជ្ជសាស្រ្ត និងបុគ្គលិកពេទ្យមិនគ្រប់គ្រាន់។

នេះមិនមែនជាលើកទីមួយទេមានការវាយប្រហារបែបនេះកើតឡើង បណ្ដាលឲ្យមានការខកចិត្តកាន់តែខ្លាំងឡើងក្នុងចំណោមប្រជាជនផ្លាស់ទីលំនៅក្នុងតំបន់ជម្លៀស al-Mawasi។ បើទោះបីយោធាអ៊ីស្រាអែលបានបញ្ជាឱ្យពួកគេជម្លៀសខ្លួនដើម្បីជៀសវាងការទម្លាក់គ្រាប់បែក ប៉ុន្តែម្តងហើយម្តងទៀតប្រជាជនទាំងនេះនៅតែជារងគ្រោះពីការវាយប្រហារទាំងនោះ។

ដោយសារតែការវាយប្រហារទាំងនេះបង្កជាបញ្ហាត្រូវការជំនួយបន្ទាន់ខ្លាំង ដោយប្រធានមន្ទីរពេទ្យលោក Hussam Abu Safiya បាននិយាយថា កងកម្លាំងអ៊ីស្រាអែលក៏បានបាញ់ទៅលើមន្ទីរពេទ្យ Kamal Adwan ក្នុងទីក្រុង Beit Lahiya ភាគខាងជើង ហ្គាហ្សា អស់រយៈពេលប្រាំថ្ងៃជាប់គ្នាផងដែរ បណ្ដាលឲ្យបុគ្គលិក​ពេទ្យ​របស់​គាត់​បី​នាក់​បាន​រង​របួស ម្នាក់​ធ្ងន់ធ្ងរ​កាល​ពី​យប់​ថ្ងៃ​អង្គារ។

លោកថា ស្ថានភាពនេះគឺបន្ទាន់ខ្លាំងណាស់ ដោសារអ្នកជំងឺជាង ១០០ នាក់នៅក្នុងមន្ទីរពេទ្យដែលត្រូវបានឡោមព័ទ្ធគឺប្រឈមនឹងហានិភ័យនៃការស្លាប់ ហើយកងកម្លាំងអ៊ីស្រាអែលកំពុងរារាំងការចូលទៅកាន់មន្ទីរពេទ្យ al-Awda ដែលនៅជិតនោះថែមទៀត។ ចំណែកអ្នកស្រុកនៅក្នុងទីក្រុងសំខាន់ៗចំនួនបីនៅភាគខាងជើងគឺ Jabalia, Beit Lahiya និង Beit Hanoon បាននិយាយថាកងកម្លាំងអ៊ីស្រាអែលបានបំផ្ទុះផ្ទះរាប់សិបខ្នង។

ប៉ាឡេស្ទីនបាននិយាយថា កងទ័ពអ៊ីស្រាអែលកំពុងព្យាយាមបណ្ដេញប្រជាជនចេញពីតំបន់ភាគខាងជើងនៃតំបន់ហ្គាហ្សា ដោយចេញការគំរាមកំហែងថា ប្រសិនបើប្រជាជនមិនភៀសខ្លួនទេ ពួកគេប្រឈមនឹងការស្លាប់ និងដោយការទម្លាក់គ្រាប់បែកដើម្បីបង្កើតតំបន់ការពារ។ យោធា​អ៊ីស្រាអែល​បាន​ឡោមព័ទ្ធ​តំបន់​នេះ​ចាប់​តាំង​ពី​វា​បាន​ចាប់​ផ្តើម​ការ​វាយ​លុក​ជា​ថ្មី​នៅ​ទីនោះ​ជិត​ពីរ​ខែ​មុន ហើយការឡោមព័ទ្ធកាន់តែអាក្រក់ទៅៗ វិបត្តិមនុស្សធម៌ដ៏ធ្ងន់ធ្ងររួចទៅហើយ ចំពេលមានទុរ្ភិក្សកំពុងកើតឡើង។

មន្ត្រីប៉ាឡេស្ទីន និងអង្គការសហប្រជាជាតិ បាននិយាយថា មិនមានតំបន់សុវត្ថិភាពនៅសល់នៅក្នុងតំបន់ហ្គាហ្សាទេ ហើយស្ទើរតែទាំងអស់នៃអ្នកស្រុកចំនួន២.៣ លាននាក់ត្រូវបានផ្លាស់ទីលំនៅជាច្រើនដង។ យុទ្ធនាការយោធារបស់អ៊ីស្រាអែល បានសម្លាប់ជនជាតិប៉ាឡេស្ទីនជាង ៤៤៥០០នាក់ របួសជាច្រើននាក់ និងកាត់បន្ថយតំបន់ជុំវិញទៅជាកម្ទេចថ្ម ចាប់តាំងពីវាបានចាប់ផ្តើមនៅក្នុងខែតុលាឆ្នាំមុន។

បើទោះបីអ៊ីស្រាអែលបានយល់ព្រមលើបទឈប់បាញ់ជាមួយក្រុមប្រដាប់អាវុធលីបង់ ហេបូឡា កាលពីសប្តាហ៍មុន ដែលបានបញ្ឈប់ការប្រយុទ្ធគ្នាភាគច្រើននៅក្នុងជម្លោះនៅក្នុងប្រទេសលីបង់ ស្របគ្នានឹងសង្គ្រាមហ្គាហ្សា ប៉ុន្តែ​សង្គ្រាម​នៅ​ហ្គាហ្សា​នៅតែអូស​បន្លាយ​មិនទាន់បញ្ចប់និងមានដំណោះស្រាយនៅឡើយ៕

អត្ថបទ​៖ ប៊ុន សុភាព