ប៉ូលិសថៃ បញ្ជាក់មូលហេតុ មនុស្ស៥នាក់ស្លាប់ក្នុងអាងប្រហុក

ករណីបុរស៥នាក់ស្លាប់ក្នុងអាងប្រហុកនៅប្រទេសថៃ កំពុងបង្កការភ្ញាក់ផ្អើល ខណៈពេលនេះប៉ូលិសអះអាងថា អ្នកទាំងនោះបាត់បង់ជីវិតដោយសារតែ ឧស្ម័នពុល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post នៅថ្ងៃពុធទី១១ខែធ្នូឆ្នាំ២០២៤ ប៉ូលិសសន្មត់ថា ជនរងគ្រោះទាំងអស់គឺបានស្រូបឧស្ម័នពុលនិងខ្វះអុកស៊ីសែន ទើបបណ្តាលឲ្យស្លាប់ ហើយប៉ូលិសមិនបានរកឃើញសញ្ញាឬស្លាកស្នាមនៃការវាយដុំច្រំធាក់អ្វីទេ។

ករណីនេះកើតឡើងកាលពីល្ងាចថ្ងៃចន្ទទី៩ខែធ្នូឆ្នាំ២០២៤ នៅឯសិប្បកម្ម Pla-Ra ក្នុងភូមិ Moo 5 ឃុំ Nong Khwai ស្រុក Lom Sak នៃខេត្តភាគខាងជើង Phetchabun។

ម្ចាស់សិប្បកម្មប្រាប់ក្រុមអ្នកស៊ើបអង្កេតថា គាត់បានប្រើឲ្យអ្នកទាំង៥ ទៅសម្អាតអាងចាស់ ដើម្បីត្រៀមដាក់ប្រហុកថ្មី ខណៈចៅហ្វាយស្រុក Lom Sak និយាយថា អាងនោះត្រូវបានទុកចោល៥ទៅ៦ខែហើយ។ អាងនោះធំគ្រាន់បើដែរ ពោលគឺមានទទឹង៣ម៉ែត្រ បណ្តោយ៤ម៉ែត្រ និងជម្រៅ៦ម៉ែត្រ។

ទោះបីជាយ៉ាងណាក៏ដោយ ប៉ូលិសកោសល្យវិច្ច័យ កំពុងប្រមូលសំណាកពីសាកសពយកទៅពិនិត្យ ដើម្បីបញ្ជាក់បន្ថែមចំពោះករណីនេះ៕

អត្ថបទ៖ សុខ សុវណ្ណ

ចុចអាន៖ បុរស​៥​នាក់​ត្រូវ​បាន​គេ​ប្រទះ​ឃើញ​ស្លាប់​ក្នុង​អាងត្រីប្រហុកក្នុងខេត្ត Petchabun ប្រទេសថៃ