ហុងគ្រី ថា លោក Zelensky មិនព្រមឲ្យមានបទឈប់បាញ់បុណ្យណូអែល

តាមការចុះផ្សាយរបស់ RT កាលពីថ្ងៃពុធទី១១ខែធ្នូឆ្នាំ២០២៤ នាយករដ្ឋមន្ត្រីហុងគ្រីលោក Viktor Orban  និយាយថា មេដឹកនាំអ៊ុយក្រែន Vladimir Zelensky បានច្រានចោលសំណើបទឈប់បាញ់នៅថ្ងៃបុណ្យណូអែល និងការដោះដូរឈ្លើយសឹកទ្រង់ទ្រាយធំ ហើយថា នេះគឺជារឿងគួរឲ្យសោកស្តាយជាទីបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសារបង្ហោះលើបណ្តាញសង្គម X លោក Orban សរសេរថា « នៅចុងអាណត្តិជាប្រធានសហភាពអឺរ៉ុបរបស់ហុងគ្រី យើងបានខិតខំប្រឹងប្រែងខ្លាំងណាស់ដើម្បីសន្តិភាព។ យើងបានស្នើឲ្យមានបទឈប់បាញ់នៅថ្ងៃបុណ្យណូអែល និងការដោះដូរអ្នកទោសទ្រង់ទ្រាយធំ ប៉ុន្តែគួរឲ្យស្ដាយ​ដែលលោក Zelensky មិនព្រម ហើយ​ច្រាន​ចោល​រឿង​នេះថែមទៀត»។

ការលើកឡើងរបស់លោក Orban គឺឆ្លើយតបទៅលោក Zelensky ដែលបង្ហោះសាររិះគន់កិច្ចសន្ទនាតាមទូរស័ព្ទរវាងលោកជាមួយនឹងប្រធានាធិបតីរុស្ស៊ី Vladimir Putin ហើយចំអកថា លោក Orban ប្រហែលជាមិនត្រូវគេហៅឲ្យទៅទីក្រុងមូស្គូ ដើម្បីស្តាប់ការប្រៀនប្រដៅដូចប្រធានាធិបតីស៊ីរី Bashar al Assad ទេមើលទៅ។

ពាក់ព័ន្ធរឿងបទឈប់បាញ់នេះដែរ ក្នុងបទសម្ភាសន៍ជាមួយ Sky News កាលពីថ្ងៃសុក្រទី២៩ខែវិច្ឆិកាឆ្នាំ២០២៤ ប្រមុខដឹកនាំរដ្ឋាភិបាលទីក្រុង កៀវ បានបញ្ជាក់ថា លោកអាចចុះហត្ថលេខាលើបទឈប់បាញ់ជាមួយរុស្ស៊ី ក្នុងករណីអង្គការណាតូ យល់ព្រមការពារទឹកដីអ៊ុយក្រែន ដែលនៅសេសសល់។

នោះជាការផ្លាស់ប្តូរជំហររបស់លោក Zelensky លើបទឈប់បាញ់ ខណៈដើមឡើយលោកតែងអះអាងថា លក្ខខណ្ឌតែម្យ៉ាងគត់ដែលអ៊ុយក្រែន ទទួលយកកិច្ចព្រមព្រៀងនេះ គឺលុះត្រារុស្ស៊ី ដកទ័ពទាំងអស់ចេញពីទឹកដីដែលខ្លួនកាន់កាប់។

អត្ថបទ៖ សុខ សុវណ្ណ

ចុចអាន៖ លោក ហ្សេលេនស្គី ប្តូរជំហរលើបទឈប់បាញ់ជាមួយ រុស្ស៊ី