ស្លាប់និងរបួសមនុស្សជាង១០០នាក់ក្នុងហេតុការណ៍បំផ្ទុះគ្រាប់បែកនៅខាងក្រៅទីស្នាក់ការប៉ូលិស អាហ្វហ្គានីស្ថាន

ជនស៊ីវិលយ៉ាងតិច១២នាក់ត្រូវបានសម្លាប់និងជាង១០០នាក់រងរបួសបន្ទាប់ពីការបំផ្ទុះគ្រាប់បែកក្នុងរថយន្តនៅខេត្ត Ghor ភាគខាងលិចប្រទេសអាហ្គានីស្ថាន។

អ្នកនាំពាក្យក្រសួងមហាផ្ទៃលោក Tariq Aran បាននិយាយថា ការបំផ្ទុះគ្រាប់បែកកាលពីថ្ងៃអាទិត្យបានកើតឡើងនៅជិតច្រកចូលការិយាល័យមេប៉ូលិសខេត្តនិងអគាររដ្ឋាភិបាលផ្សេងទៀតនៅក្បែរនោះក្នុងក្រុង Feroz ទីរួមខេត្ត Ghor។

លោក Arif Aber អ្នកនាំពាក្យអភិបាលខេត្ត Ghor បាននិយាយថា ការផ្ទុះនេះគឺខ្លាំងណាស់ដោយសំឡេងរបស់វាអាចត្រូវបានគេឮពេញមួយក្រុង Feroz Koh។

លោក Aber បន្តថា “វាបានបំផ្លាញនិងកម្ទេចផ្នែកខ្លះនៃអគាររដ្ឋាភិបាលមួយចំនួនរួមមានការិយាល័យមេប៉ូលិស នាយកដ្ឋានកិច្ចការនារីនិងការិយាល័យខេត្តទទួលបន្ទុកជនភៀសខ្លួន”។

ទោះបីជាយ៉ាងណាក៏ដោយ មិនទាន់មានការអះអាងទទួលខុសត្រូវណាមួយនៅឡើយទេចំពោះការបំផ្ទុះគ្រាប់បែកនេះប៉ុន្តែវាបានកើតឡើងចំពេលមានការវាយប្រហារកាន់តែខ្លាំងដោយក្រុមតាលីបង់៕

ប្រែសម្រួលដោយ៖ Vann Vann

ប្រភព៖ Al Jazeera