ព័ត៌មានអន្ដរជាតិ

ទារកជាង ៨ ០០០នាក់នៅហ្គាហ្សា ប្រឈមហានិភ័យ ព្រោះខ្វះខាតទឹកដោះគោ

បានផុស

២ years មុន

នៅ

ថ្ងៃអង្គារ ១៧ ធ្នូ ២០២៤

ដោយ

Chheang

ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) បាននិយាយកាលពីថ្ងៃចន្ទទី១៦ខែធ្នូឆ្នាំ២០២៤ថា ការផ្គត់ផ្គង់ទឹកដោះគោសម្រាប់ទារករបស់ខ្លួនជិតអស់ហើយនៅក្នុងតំបន់ហ្គាហ្សាស្ទ្រីប ដែលធ្វើឲ្យជីវិតរបស់ទារកជាង ៨ ៥០០នាក់ស្ថិតក្នុងហានិភ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

UNRWA បានបង្ហោះសារនៅលើបណ្ដាញសង្គម X ថា នៅសល់តែទឹកដោះគោទារក ៦កេសប៉ុណ្ណោះសម្រាប់ការចែកចាយ ខណៈដែលទារកប្រហែល ៨ ៥០០នាក់នៅហ្គាហ្សា កំពុងពឹងផ្អែកលើមជ្ឈមណ្ឌលសុខភាព UNRWA ដើម្បីទទួលបានទឹកដោះគោ។

UNRWA បានបន្ថែមថា៖ «ដោយមានមនុស្សជាង ២០ម៉ឺននាក់ដែលពឹងផ្អែកលើមជ្ឈមណ្ឌលនេះសម្រាប់ការថែទាំសុខភាពបឋម កង្វះខាតការផ្គត់ផ្គង់យ៉ាងធ្ងន់ធ្ងរធ្វើឲ្យមនុស្សជាច្រើន រួមទាំងទារកស្ថិតក្នុងគ្រោះថ្នាក់យ៉ាងធ្ងន់ធ្ងរ»។

បច្ចុប្បន្ន កុមារប្រហែល ១៩ ០០០នាក់នៅក្នុងតំបន់ហ្គាហ្សា កំពុងសម្រាកព្យាបាលនៅមន្ទីរពេទ្យ ដោយសារតែកង្វះអាហារូបត្ថម្ភធ្ងន់ធ្ងរ ក្នុងអំឡុងពេល៤ខែចុងក្រោយនេះ ពោលគឺតួលេខកើនឡើងទ្វេដង បើធៀបនឹងរយៈពេលដូចគ្នាកាលពីដើមឆ្នាំ។

UNRWA បានសង្កត់ធ្ងន់ថា ការផ្តល់ជំនួយមនុស្សធម៌ជាបន្ទាន់ និងបទឈប់បាញ់ មានសារៈសំខាន់ណាស់ ក្នុងការទប់ស្កាត់ការបាត់បង់អាយុជីវិតបន្ថែមទៀត។

គួរបញ្ជាក់ថា ស្ថានការណ៍មនុស្សធម៌ដ៏អាក្រក់នេះ កើតមានចំពេលអរិភាពកំពុងបន្តរវាងអ៊ីស្រាអែល និងក្រុមសកម្មប្រយុទ្ធហាម៉ាសនៅតំបន់ហ្គាហ្សា។ ចាប់តាំងពីជម្លោះបានចាប់ផ្តើមនៅថ្ងៃទី៧ខែតុលាឆ្នាំ២០២៣ មនុស្សជាង ៤៥ ០០០នាក់នៅហ្គាហ្សាត្រូវបានសម្លាប់ ហើយការបំផ្លិចបំផ្លាញដ៏សម្បើម បានធ្វើឲ្យវិបត្តិកាន់តែធ្ងន់ធ្ងរឡើង៕

ដោយ៖ ឈាង