អាសន្នរោគនៅមីយ៉ាន់ម៉ា ផ្ទុះរឹតខ្លាំង ធ្វើឲ្យថៃ ភ័យព្រួយ ឈានដល់បិទព្រំដែន

តាមការចុះផ្សាយរបស់ Bangkok Post នៅថ្ងៃអង្គារទី២៤ខែធ្នូឆ្នាំ២០២៤, ប្រទេសថៃ បានចាត់វិធានការការពារកម្រិតខ្ពស់បំផុតនៅខេត្ត Tak ព្រមទាំងប្រកាសបិទព្រំដែនជាប់មីយ៉ាន់ម៉ារយៈពេលមួយខែផងដែរ ស្របពេលករណីផ្ទុះជំងឺអាសន្នរោគក្នុងប្រទេសជិតខាងភាគពាយព្យរបស់ខ្លួនមួយនេះ កំពុងរាលដាលខ្លាំងគួរឲ្យព្រួយបារម្ភជាទីបំផុត។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មីយ៉ាន់ម៉ា រាយការណ៍ថា ជំងឺអាសន្នរោគ កំពុងផ្ទុះនៅតំបន់ Shwe Kokko នៃរដ្ឋ Kayin ដោយឆ្លងដល់ប្រជាជនប្រមាណ៣០០នាក់ និងបណ្តាលឲ្យមនុស្ស ២នាក់ បាត់បង់ជីវិត។

ថៃក៏បានរកឃើញដែរថា មានជនជាតិមីយ៉ាន់ម៉ា៣នាក់ដែលធ្វើការក្នុងស្រុក Mae Sot នៃខេត្ត​Tak បានឆ្លងជំងឺអាសន្នរោគ ប៉ុន្តែត្រូវបានបញ្ជូនទៅព្យាបាលនៅមន្ទីរពេទ្យក្នុងតំបន់រួចហើយ។

ដោយសារតែស្ថានភាពវិវត្តគួឲ្យព្រួយបារម្ភបែបនេះហើយ ទើបឧបនាយករដ្ឋមន្ត្រី Phumtham Wechayachai ចេញបញ្ជាឲ្យចាត់វិធានការការពារនិងឃ្លាំមើលឲ្យបានដិតដល់ជាទីបំផុត នៅតាមព្រំដែន។ លោកនិយាយថា ក្រុមប្រឹក្សាការពារ បានជួបប្រជុំគ្នារួចហើយ ហើយនឹងធ្វើការជាមួយកងកម្លាំងប្រដាប់អាវុធរួមទាំងក្រសួងសុខាភិបាល ដើម្បីចាត់ការលើរឿងនេះ។

តាមការបញ្ជាក់ពីលោក Wechayachai, ទាហាននឹងជួយពិនិត្យស្ថានការណ៍ រួមទាំងបង្កើនប៉ុស្តិ៍ត្រួតពិនិត្យនិងរៀបចំកន្លែងធ្វើចត្តាឡីស័ក នៅតាមព្រំដែន ក៏ដូចជាបន្តការឃ្លាំមើលរយៈពេលមួយខែដើម្បីធានាថា ជំងឺអាសន្នរោគ មិនឆ្លងចូលមកខាងថៃ។ 

លើសពីនេះ អាជ្ញាធរមូលដ្ឋានក៏កំពុងផ្សព្វផ្សាយឲ្យប្រជាពលរដ្ឋយល់ដឹងពីគ្រោះថ្នាក់នៃជំងឺអាសន្នរោគ និងចែកស្រោមដៃ និងម៉ាស ដើម្បីធានារក្សាអនាម័យផងដែរ៕

អត្ថបទ៖ សុខ សុវណ្ណ

ចុចអាន៖ WHO រកឃើញជំងឺអាសន្នរោគនៅ​លីបង់ និង​​បារម្ភ​អំពី​ការរីករាលដាលខ្ពស់ណាស់