ប៉ូលិសកូរ៉េខាងត្បូងឆ្មក់អាកាសយានដ្ឋាន Muan ក្រោយ​ហេតុការណ៍ធ្លាក់យន្តហោះ

ប៉ូលិសក្នុងប្រទេសកូរ៉េខាងត្បូងបានឆ្មក់ចូល​អាកាសយានដ្ឋានអន្តរជាតិ Muan ដោយ​ចូល​ទៅ​កាន់​ការិយាល័យរបស់ Jeju Air និងស្ថាប័នអាកាសចរណ៍ក្នុងតំបន់ ចំពេលមានការស៊ើបអង្កេតលើគ្រោះមហន្តរាយផ្លូវអាកាសដ៏សាហាវបំផុតមិនធ្លាប់មាននៅលើទឹកដីកូរ៉េខាងត្បូង។ នេះបើយោងតាមការចេញផ្សាយរបស់ Al Jazeera។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមមន្ត្រីបាននិយាយថា ភ្នាក់ងារប៉ូលិសខេត្ត Jeonnam បាន​ប្រតិបត្តិការស្វែងរក និងរឹបអូសនៅទីតាំងទាំងបី​នៅ​ព្រឹកថ្ងៃព្រហស្បតិ៍​នេះ​​។ ការឆ្មក់ធ្វើឡើងនៅពេលដែលអាជ្ញាធរអាកាសចរណ៍ រួមទាំងមន្ត្រីមកពីសហរដ្ឋអាមេរិកកំពុងស៊ើបអង្កេតមូលហេតុនៃការធ្លាក់យន្តហោះ Jeju Air Flight 2216 កាលពីថ្ងៃអាទិត្យ ដែលបានសម្លាប់មនុស្ស​១៧៩ នាក់ក្នុងចំណោម១៨១នាក់នៅលើយន្តហោះ។

អាជ្ញាធរកូរ៉េខាងត្បូង បានឲ្យដឹងថា ពួកគេបានទាញយកទិន្នន័យដំបូងពីប្រអប់ខ្មៅចំនួនពីររបស់យន្តហោះ Boeing 737-800 ហើយមួយទៀតត្រូវបានបញ្ជូនទៅសហរដ្ឋអាមេរិកដើម្បីធ្វើការវិភាគដោយសារតែការខូចខាតដែលវាបានទទួលរងនៅក្នុងហេតុការណ៍ធ្លាក់នេះ។ មន្ត្រីកូរ៉េខាងត្បូងបានចាប់ផ្តើមការត្រួតពិនិត្យយន្តហោះ Boeing 737-800 ទាំងអស់ដែលកំពុងប្រតិបត្តិការ ក៏ដូចជាការស៊ើបអង្កេតកាន់តែទូលំទូលាយនៃប្រតិបត្តិការអាកាសចរណ៍របស់ប្រទេសទាំងមូល។

ប្រធានាធិបតីស្តីទីកូរ៉េខាងត្បូង លោក Choi Sang-mok បាននិយាយ​នៅ​ថ្ងៃព្រហស្បតិ៍ថា ត្រូវតែចាត់វិធានការជាបន្ទាន់ ប្រសិនបើការត្រួតពិនិត្យបង្ហាញពីបញ្ហាណាមួយជាមួយគំរូយន្តហោះនោះ។ លោក Choi បាននិយាយថា «ដោយសារមានការព្រួយបារម្ភជាសាធារណៈអំពីគំរូយន្តហោះដូចគ្នាដែលពាក់ព័ន្ធនឹងគ្រោះថ្នាក់នេះ ក្រសួងដឹកជញ្ជូន និងស្ថាប័នពាក់ព័ន្ធត្រូវតែធ្វើការត្រួតពិនិត្យយ៉ាងហ្មត់ចត់លើការថែទាំប្រតិបត្តិការ ការអប់រំ និងការបណ្តុះបណ្តាល» ។

អ្នកជំនាញអាកាសចរណ៍ បានលើកឡើង​អំ​ពីមូលហេតុដែលអាចកើតមាន និងកត្តារួមចំណែកក្នុងគ្រោះមហន្តរាយនេះ រួមទាំងការប៉ះទង្គិចជាមួយសត្វស្លាប កំហុស​សផ្នែកមេកានិច និងវត្តមាននៃទំនប់ទឹករឹងដែលមានចម្ងាយតិចជាង៣០០ ម៉ែត្រ ពីចុងបញ្ចប់នៃផ្លូវរត់។

គួររម្លឹកថា យន្តហោះ Boeing 737-800 បានចុះចតនៅលើផ្លូវរត់ ដោយមិនមានឧបករណ៍ចុះចតត្រឹមត្រូវភ្លាមៗបន្ទាប់ពីអ្នកបើកយន្តហោះបានរាយការណ៍ពីការវាយប្រហាររបស់បក្សីទៅកាន់ការគ្រប់គ្រងចរាចរណ៍ផ្លូវអាកាស មុនពេលរអិលចូលទៅក្នុងទំនប់បេតុង ហើយបានផ្ទុះជាអណ្តាតភ្លើង។

ការធ្លាក់នេះគឺជាឧបទ្ទវហេតុគ្រោះថ្នាក់បំផុតដែលពាក់ព័ន្ធនឹងក្រុមហ៊ុនអាកាសចរណ៍កូរ៉េខាងត្បូងចាប់តាំងពីយន្តហោះ Boeing 747 របស់ Korean Air បានធ្លាក់ចូលទៅក្នុងភ្នំ Guam ក្នុងឆ្នាំ ១៩៩៧ ដែលបានសម្លាប់មនុស្ស ២២៨នាក់៕

អត្ថបទ៖ ប៊ុន សុភាព