រុស្ស៊ី អំពាវនាវឲ្យអ៊ីស្រាអែល បញ្ឈប់ការកាប់សម្លាប់នៅ ប៉ាឡេស្ទីន ជាបន្ទាន់

ក្នុងកិច្ចប្រជុំនៅក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទីសុក្រទី៣ខែមករាឆ្នាំ២០២៥ តំណាងរុស្ស៊ីលោក Vasily Nebenzya បានអំពាវនាវឲ្យអ៊ីស្រាអែល បញ្ឈប់ការកាប់សម្លាប់នៅប៉ាឡេស៊ីនជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា រុស្ស៊ីបារម្ភជាខ្លាំងចំពោះការវាយប្រហារមិនដកដៃរបស់អ៊ីស្រាអែល លើទីតាំងស៊ីវិល និងមន្ទីរពេទ្យ បង្កជាវិបត្តិមនុស្សធម៌ បង្ខំឲ្យមានការជម្លៀសមនុស្សជាទ្រង់ទ្រាយធំ។ អ៊ីស្រាអែល ថែមទាំងបានរឹតត្បិតការចេញចូលទៅទឹកដីប៉ាឡេស្ទីន ទៀតផង។

ហេតុដូច្នេះហើយ រុស្ស៊ីសូមអំពាវនាវឲ្យអ៊ីស្រាអែល បញ្ឈប់ការកាប់សម្លាប់ជាបន្ទាន់នៅប៉ាឡេស្ទីន ហើយទីក្រុងមូស្គូ ក៏សូមគាំទ្រសំណើរបស់អង្គការសុខភាពពិភពលោក ដែលសុំជម្លៀសអ្នកជំងឺទៅកាន់ភាគខាងត្បូងតំបន់ហ្គាហ្សាផងដែរ។

សូមបញ្ជាក់ជាថ្មី សង្គ្រាមនៅហ្គាហ្សា ផ្ទុះឡើងពេលក្រុមសកម្មប្រយុទ្ធហាម៉ាស បើកការវាយប្រហារឆ្លងដែនចូលទឹកដីអ៊ីស្រាអែល កាលពីថ្ងៃទី៧ខែតុលាឆ្នាំ២០២៣ ដោយសម្លាប់ពលរដ្ឋអ៊ីស្រាអែលនៅតាមបណ្តោយព្រំដែន និងចាប់ជាង២០០នាក់ ជាចំណាប់ខ្មាំង។

ជាការសងសឹក អ៊ីស្រាអែល ក៏បើកប្រតិបត្តិការយោធា វាយកម្ទេចតំបន់ហ្គាហ្សាក្នុងគោលបំណងកម្ចាត់ក្រុមហាម៉ាស ដោយគិតត្រឹមខែមករាឆ្នាំ២០២៥ បណ្តាលឲ្យប្រជាជនប៉ាឡេស្ទីនស្លាប់ជាង ៤៥ ៦៥០នាក់បាត់បង់ជីវិត និងបង្កការបំផ្លិចបំផ្លាញធំធេង។

លើសពីនេះ បើ​យោង​តាម​របាយការណ៍​របស់​ការិយាល័យ​ស្ថិតិ​កណ្ដាល​ប៉ាឡេស្ទីន PCBS បានបង្ហាញថា សង្គ្រាម​នេះ ធ្វើ​ឲ្យចំនួន​ប្រជាជនហ្គាហ្សា​ធ្លាក់​ចុះ ៦% បើគិតទាំងអ្នកដែលត្រូវជម្លៀសចេញ៕

អត្ថបទ៖ សុខ សុវណ្ណ

ចុចអាន៖ ស្លាប់​មេ​ប៉ូលិស​នៅ​ហ្គាហ្សា ក្រោយ​អ៊ីស្រាអែល​ទម្លាក់​គ្រាប់បែក