មនុស្ស៣នាក់ស្លាប់ក្នុងហេតុការណ៍ធ្លាក់យន្តហោះចូលសមុទ្រនៅអូស្ត្រាលី

យោងតាមការចេញផ្សាយរបស់សារព័ត៌មាន CNA បានឲ្យដឹងថា យន្តហោះខ្នាត​​តូចមួយគ្រឿងដែលដឹកអ្នកទេសចរអឺរ៉ុបបានធ្លាក់ចូលទៅក្នុងសមុទ្រនៅភាគខាងលិចប្រទេសអូស្ត្រាលី បណ្តាល​ឲ្យ​មនុស្ស៣នាក់នៅលើយន្តហោះ​បានស្លាប់​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះនេះបានធ្លាក់កាលពីល្ងាចថ្ងៃអង្គារ ខណៈដែលវា បានចាកចេញពីកោះ Rottnes ដែលជាតំបន់ទេសចរណ៍ដ៏ល្បីល្បាញសម្រាប់​ការ​ទស្សនា​​សត្វសមុទ្រដ៏រួសរាយរាក់ទាក់ ហៅថា quokkas ។

បន្ទាប់ពីក្រុមរុករកបានស្ទូចបំណែកយន្តហោះពីសមុទ្រកាលពីថ្ងៃពុធ ប្រធានរដ្ឋ Perth លោក Roger Cook បានបញ្ជាក់ថា មនុស្ស៣នាក់បានស្លាប់ និង៤នាក់ផ្សេងទៀតនៅរស់រានមានជីវិត។ ក្នុង​ចំណោម​ជន​រង​គ្រោះ​មាន​ស្ត្រី​អាយុ​៦៥​ឆ្នាំ​មក​ពី​ប្រទេស​ស្វីស បុរស​អាយុ​៦០​ឆ្នាំ​មក​ពី​ប្រទេស​ដាណឺម៉ាក និង​អ្នក​បើក​យន្តហោះ​ក្នុង​ស្រុក​អាយុ​៣៤​ឆ្នាំ។

ចំណែកបុរសជនជាតិស្វីសអាយុ៦៣​ឆ្នាំម្នាក់ត្រូវបានជួយសង្គ្រោះជាមួយនឹងស្ត្រីជនជាតិដាណឺម៉ាកអាយុ៥៨ឆ្នាំនិងប្តីប្រពន្ធជនជាតិអូស្ត្រាលីដែលមានអាយុ៦០ឆ្នាំ។

មានសេចក្តីរាយការណ៍ថា យន្តហោះនេះបានប៉ះជាមួយដុំថ្មមួយដែលលេចចេញពីមហាសមុទ្រ ខណៈដែលវាកំពុង​ហោះឡើង។ ប៉ុន្តែលោក Cook បាន​និយាយ​ថា​៖«​របាយការណ៍​ដំបូង​ទាំង​នោះ​មិន​ត្រូវ​បាន​បញ្ជាក់​ទេ ខណៈនៅ​ដំណាក់កាល​ដំបូង​នេះ អ្វី​ដែល​បណ្ដាល​ឲ្យ​ធ្លាក់​យន្តនេះនៅ​មិន​ទាន់​ដឹង​នៅឡើយ​ទេ»។

គួរបញ្ជាក់ថា ស្ថិតនៅចម្ងាយប្រហែល​៣០គីឡូម៉ែត្រភាគខាងលិចនៃរដ្ឋធានីរដ្ឋ Perth កោះ Rottnest គឺជាគោលដៅទេសចរណ៍ដ៏សំខាន់មួយរបស់ប្រទេសអូស្ត្រាលីភាគខាងលិច៕

អត្ថបទ៖ ប៊ុន សុភាព