រុស្ស៊ី ព្រមានថា អ៊ុយក្រែន នឹងលែងមានឈ្មោះជាប្រទេសទៀតហើយ ក្នុងឆ្នាំនេះ

ក្នុងកិច្ចសម្ភាសជាមួយកាសែត Komsomolskaya Pravda និងផ្សាយបន្តដោយ RT កាលពីថ្ងៃអង្គារទី១៤ខែមករាឆ្នាំ២០២៥, លោក នីកូឡាយ ប៉ាទ្រូសេហ្វ ដែលជាជំនួយការជាន់ខ្ពស់ប្រធានាធិបតីរុស្ស៊ី វ្ល៉ាឌីមៀរ ពូទីន បានព្រមានថា អ៊ុយក្រែន នឹងលែងមានឈ្មោះជាប្រទេសទៀតហើយនៅក្នុងឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា «ទីក្រុងមូស្គូចាត់ទុកប្រជាជនអ៊ុយក្រែនជាបងប្អូន ហើយខ្វល់ខ្វាយខ្លាំងបំផុតអំពីការវិវត្តនៅក្នុងប្រទេសនេះ។ យ៉ាងណា ការបង្ខិតបង្ខំដោយហិង្សាឲ្យប្រជាជនប្រកាន់យកមនោគមវិជ្ជាណាស៊ីសម័យទំនើបនិងគោលការណ៍ស្អប់ខ្ពើមរុស្ស៊ីដ៏ឃោរឃៅ កំពុងបំផ្លាញទីក្រុងដែលធ្លាប់តែរីកចម្រើនរបស់អ៊ុយក្រែនដូចជា Kharkov, Odessa, Nikolaev និង Dnepropetrovsk។ ដូច្នេះហើយ គ្មានអ្វីត្រូវសង្ស័យទេ អ៊ុយក្រែន​នឹងលែងជាប្រទេស​ទាំង​ស្រុង​នៅត្រឹម​ឆ្នាំ​នេះឯង»។

ម្យ៉ាងវិញទៀត អ្នកនយោបាយរូបនេះអះអាងថា អ៊ុយក្រែន មិនមែនជាអាទិភាពរបស់ប្រធានាធិបតីជាប់ឆ្នោតអាមេរិក ដូណាល់ ត្រាំ ទេ ព្រោះគាត់យកចិត្តទុកដាក់ចំពោះតំបន់ផ្សេងទៀតនៃពិភពលោកដូចជា Greenland ម៉ិកស៊ិក កាណាដា និងចិន ជាដើម។

ស្របពេលជាមួយគ្នានោះដែរ លោកសង្កត់ធ្ងន់ថា គោលដៅរបស់ទីក្រុងមូស្គូ ក្នុងប្រតិបត្តិការយោធាប្រឆាំងទីក្រុងកៀវ នៅតែមិនផ្លាស់ប្តូរ ហើយអធិបតេយ្យភាពរបស់រុស្ស៊ីលើទឹកដីអ៊ុយក្រែនពីមុន រួមទាំងតំបន់ Kherson និង Zaporozhye សាធារណរដ្ឋប្រជាមានិត Donetsk និង Lugansk ព្រមទាំង Crimea ផងដែរនោះ គឺគ្មានអ្វីត្រូវយកចរចាគ្នាទៀតឡើយ។

យ៉ាងណាមិញ បើនិយាយរឿងទំនាក់ទំនងរវាងរុស្ស៊ីនិងខ្នងបង្អែករបស់អ៊ុយក្រែន គឺរុស្ស៊ីឯណោះវិញ, លោក ត្រាំ បង្ហើបថា លោកនឹងជួប ពូទីន ឲ្យបានឆាប់រហ័សបំផុតក្រោយចូលកាន់តំណែងផ្លូវការ។

វិមានក្រឹមឡាំង ក៏ធ្លាប់បង្ហាញឆន្ទៈជួបប្រជុំជាមួយលោក ត្រាំ ដែរ ទោះបីជាមិនមានកាលបរិច្ឆេទច្បាស់លាស់ណាមួយត្រូវបានកំណត់ក៏ដោយ ប៉ុន្តែប្រទេសស្វីស និង​ស៊ែប៊ី ​​ប្រកាស​ថា ពួកគេបើកចំហរក្នុងការធ្វើជាម្ចាស់ផ្ទះនៃជំនួបដោយផ្ទាល់​រវាងមេដឹកនាំទាំងពីរ។

សូមបញ្ជាក់ថា ការលុកលុយរបស់រុស្ស៊ីលើអ៊ុយក្រែន បណ្តាលឲ្យ​មនុស្សរាប់ម៉ឺននាក់ស្លាប់ ជម្លៀសខ្លួន​មនុស្ស​រាប់លាននាក់ និងធ្វើឲ្យ​​ប្រេះឆា​ដល់ទំនាក់ទំនងរវាងទីក្រុងមូស្គូនិងលោកខាងលិច ចាប់តាំងពីវិបត្តិមីស៊ីលគុយបាឆ្នាំ​១៩៦២៕

អត្ថបទ៖ សុខ សុវណ្ណ

ចុចអាន៖ លោក​ ត្រាំ ចង់​ជួប​ ពូទីន ឲ្យ​បាន​លឿន​ក្រោយ​ឡើង​កាន់​តំណែង