ព័ត៌មានអន្ដរជាតិ

មិនដល់មួយខែផង ភ្នំភ្លើង Ibu នៅឥណ្ឌូណេស៊ី ផ្ទុះជាង ១ ០០០ដងហើយ

បានផុស

១ year មុន

នៅ

ថ្ងៃចន្ទ ២០ មករា ២០២៥

ដោយ

Chheang

បន្ទុះភ្នំភ្លើង Ibu របស់ប្រទេសឥណ្ឌូណេស៊ី ដែលស្ថិតលើកោះ Halmahera ក្នុងខេត្ត North Maluku បានកើតឡើងចំនួន ១ ០៧៩ដងហើយក្នុងខែមករាឆ្នាំ២០២៥។ នេះបើយោងតាមមជ្ឈមណ្ឌលឥណ្ឌូណេស៊ីសម្រាប់បន្ទុះភ្នំភ្លើង និងគ្រោះមហន្តរាយភូមិសាស្ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្សែងផេះ ដែលបានកើតឡើងដោយសារបន្ទុះភ្នំភ្លើង Ibu ជាមធ្យមមានកម្ពស់ចន្លោះពី ០,៣ទៅ៤គីឡូម៉ែត្រពីលើកំពូលភ្នំ។ អាជ្ញាធរឥណ្ឌូណេស៊ី បានប្រកាសសញ្ញាអាសន្នខ្ពស់បំផុតនៅក្នុងខែមករានេះ ហើយក៏មានការជម្លៀសខ្លួនប្រជាជនប្រមាណ ៣ ០០០នាក់នៅក្នុងភូមិចំនួន៦ក្បែរភ្នំភ្លើង Ibu ផងដែរ។

ការផ្ទុះដ៏ធំចុងក្រោយបង្អស់ បានកើតឡើងកាលពីថ្ងៃអាទិត្យទី១៩ខែមករា វេលាម៉ោង ១និង១៥នាទីព្រឹក ម៉ោងក្នុងស្រុក ខណៈវាបានបញ្ចេញពពកផេះដ៏ក្រាស់ក្នុងកម្ពស់ ១,៥គីឡូម៉ែត្រទៅលើអាកាស។

ភ្នំ Ibu ដែលជាភ្នំភ្លើងសកម្មបំផុតមួយរបស់ឥណ្ឌូណេស៊ី បានកើនឡើងបន្ទុះរបស់ខ្លួនគួរឲ្យកត់សម្គាល់គិតចាប់តាំងពីខែមិថុនាឆ្នាំមុន។

អ្នកស្រុកដែលរស់នៅក្បែរភ្នំ Ibu និងអ្នកទេសចរត្រូវបានគេណែនាំឲ្យជៀសឆ្ងាយចន្លោះពី ៥ទៅ៦គីឡូម៉ែត្រជុំវិញកំពូលភ្នំភ្លើង ហើយត្រូវពាក់ម៉ាស់មុខក្នុងករណីមានផេះធ្លាក់។

គិតត្រឹមឆ្នាំ២០២២ មនុស្សប្រហែល ៧០ម៉ឺននាក់កំពុងរស់នៅលើកោះ Halmahera។

ឥណ្ឌូណេស៊ី បានជួបប្រទះនឹងការរញ្ជួយដី និងសកម្មភាពភ្នំភ្លើងញឹកញាប់ ដោយសារវាស្ថិតនៅតាមបណ្តោយខ្សែក្រវាត់ភ្លើងប៉ាស៊ីហ្វិក ឬហៅថា «Ring of Fire»។

កាលពីខែវិច្ឆិកាឆ្នាំមុន ភ្នំភ្លើង Lewotobi Laki-Laki ដែលជាភ្នំភ្លើងភ្លោះកម្ពស់ ១ ៧០៣ម៉ែត្រ នៅលើកោះទេសចរណ៍ Flores បានផ្ទុះច្រើនជាង១០ដងក្នុងមួយសប្តាហ៍ ដោយបានសម្លាប់មនុស្ស ៩នាក់នៅក្នុងការផ្ទុះដំបូងរបស់វា។

ភ្នំភ្លើង Ruang ក្នុងខេត្ត North Sulawesi បានផ្ទុះប្រមាណ៦ដងកាលពីឆ្នាំមុន ដោយបង្ខំមនុស្សរាប់ពាន់នាក់ពីកោះក្បែរនោះត្រូវជម្លៀសចេញ៕

ដោយ៖ ឈាង