កងកម្លាំង មីយ៉ាន់ម៉ា បាញ់មិនរើសមុខ ទោះមិនមែនបាតុករ ក៏ដោយ

ក្រុមសិទ្ធិមនុស្សនៅក្នុងប្រទេសមីយ៉ាន់ម៉ាបានចោទប្រកាន់កងកម្លាំងសន្តិសុខពីបទបើកការបាញ់ប្រហារលើប្រជាជនរួមទាំងអ្នកដែលមិនបានចូលរួមក្នុងការធ្វើបាតុកម្មប្រឆាំងនឹងរដ្ឋប្រហារផងដែរ ។

យោធាប្រទេសមីយ៉ាន់ម៉ាបានដាក់ច្បាប់អាជ្ញាសឹកនៅតាមតំបន់មួយចំនួន និងបិទការចូលប្រើអ៊ិនធឺណិតតាមទូរស័ព្ទចល័តដោយភាគច្រើននៅក្នុងទីក្រុងយ៉ាំងហ្គោន ។

អ្នកស្រុកក្នុងសង្កាត់ Hlaingthaya នៃទីក្រុងយ៉ាំងហ្គោនដែលស្ថិតក្រោមច្បាប់អាជ្ញាសឹកនិយាយថា យោធាកំពុងគំរាមកំហែងប្រជាជនដោយប្រកាសតាមឧគ្ឃោសនសព្ទថា ពួកគេនឹងបើកការបាញ់ប្រហារ ប្រសិនបើអ្នកស្រុកធ្វើបាតុកម្ម ឬដាក់របាំងបិទផ្លូវ ។

ក្រុមសិទ្ធិមនុស្សក្នុងតំបន់បានចេញសេចក្តីថ្លែងការណ៍មួយកាលពីថ្ងៃព្រហស្បតិ៍ដោយនិយាយថាមានរបាយការណ៍ថាមនុស្ស ២១៧ នាក់ត្រូវបានបាញ់សម្លាប់ ឬសម្លាប់នៅក្នុងការបង្ក្រាបរបស់យោធាចាប់តាំងពីរដ្ឋប្រហារថ្ងៃទី ១ ខែកុម្ភៈ ។

ក្រុមសិទិ្ធមនុស្សក៏បាននិយាយផងដែរថា មនុស្ស ៣ នាក់ត្រូវបានបាញ់សម្លាប់ដោយយោធានៅតំបន់ភាគពាយ័ព្យនៃទីក្រុង Sagaing កាលពីថ្ងៃពុធ ខណៈពួកគេមិនបានចូលរួមក្នុងការធ្វើបាតុកម្មណាមួយឡើយ ។

ក្រុមនេះនិយាយថា ឥឡូវកងកម្លាំងសន្តិសុខប្រើវិធីជាច្រើនទៀតដើម្បីបង្ក្រាបការតវ៉ាដោយផ្តោតលើប្រជាជនរួមទាំងអ្នកដែលមិនមែនជាបាតុករផងដែរ ។

ទន្ទឹមនោះនៅក្នុងការប៉ុនប៉ងដើម្បីគ្រប់គ្រងព័ត៌មាន យោធាបានដកហូតអាជ្ញាប័ណ្ណរបស់បណ្តាញសារព័ត៌មានឈានមុខគេរបស់ប្រទេស និងបិទការចូលប្រើអ៊ីនធឺណិតតាមទូរស័ព្ទចល័តជាដើម ។

ក្ដីកង្វល់ជាសាធារណៈកំពុងតែកើនឡើងនៅប្រទេសមីយ៉ាន់ម៉ា នៅពេលដែលប្រជាជនមានការលំបាកក្នុងការប្រាស្រ័យទាក់ទងគ្នា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មួយករណីទៀតហើយ!យោធាមីយ៉ាន់ម៉ាត្រៀមដាក់ការចោទប្រកាន់ថ្មីលើលោកស្រី ស៊ូជី

ចុចអាន ៖ យោធាមីយ៉ាន់ម៉ាចោទ​អនុប្រធា​នាធិបតី​ជាគូប្រជែង​ពី​បទ​ក្បត់​ជាតិ ប្រឈម​ទោស​​ប្រហារជីវិត