ព័ត៌មានអន្ដរជាតិ

ពូទីន៖ រុស្ស៊ីបើកចំហឲ្យអឺរ៉ុបចូលរួមក្នុងកិច្ចចរចាសន្ដិភាព ណាស់តែពួកគេបដិសេធ

បានផុស

១ year មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

Chheang

លោក វ្ល៉ាឌីមៀរ ពូទីន បាននិយាយថា រុស្ស៊ីមិនជំទាស់នឹងការចូលរួមរបស់អឺរ៉ុបក្នុងកិច្ចចរចាសន្តិភាពរវាងរុស្ស៊ី និងអាមេរិក ក្នុងគោលបំណងដោះស្រាយជម្លោះរយៈពេល៣ឆ្នាំក្នុងប្រទេសអ៊ុយក្រែននោះទេ ប៉ុន្តែបានកត់សម្គាល់ថាគឺអឺរ៉ុបទៅវិញដែលបានច្រានចោលការចរចាណាមួយជាមួយទីក្រុងមូស្គូជាយូរមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីរុស្ស៊ី បានលើកឡើងកាលពីថ្ងៃចន្ទទី២៤កុម្ភៈថា៖ «ការចូលរួមរបស់ពួកគេនៅក្នុងដំណើរការចរចាគឺចាំបាច់។ យើងមិនដែលបដិសេធនោះទេ យើងបានពិភាក្សាជាបន្តបន្ទាប់ជាមួយពួកគេ។ ពេលខ្លះ ក្រោមលេសនៃការធ្វើឲ្យរុស្ស៊ីបរាជ័យក្នុងសមរភូមិ ពួកគេជាអ្នកដែលមិនព្រមទាក់ទងជាមួយយើង។ ប្រសិនបើពួកគេចង់ត្រឡប់មកវិញ នោះវាមិនអីទេ»។

លោក ពូទីន បានបន្ថែមថា ប្រតិកម្មអវិជ្ជមានចំពោះកិច្ចពិភាក្សានៅទីក្រុងរីយ៉ាដរវាងរុស្ស៊ី និងអាមេរិកគឺធ្វើឡើងតាម «អារម្មណ៍ហើយគ្មានហេតុផល»។

លោក ពូទីន ក៏បាននិយាយផងដែរថា ប្រធានាធិបតីអាមេរិក លោក ដូណាល់ ត្រាំ បានរៀបចំកិច្ចចរចាជម្លោះរុស្ស៊ី និងអ៊ុយក្រែនប្រកបដោយហេតុផល និងមិនមានមនោសញ្ចេតនា។

រុស្ស៊ី និងអាមេរិក បានបើកកិច្ចចរចាដំបូងស្តីពីអ៊ុយក្រែនកាលពីសប្តាហ៍មុននៅប្រទេសអារ៉ាប៊ីសាអូឌីត។ សម្ព័ន្ធមិត្តអឺរ៉ុបរបស់អ៊ុយក្រែន និងក្រុងកៀវ មិនត្រូវបានអញ្ជើញទេ ដែលបង្កឲ្យមានការជំទាស់ និងក្ដីព្រួយបារម្ភពីពួកគេ។

មេដឹកនាំរុស្ស៊ី បានបញ្ជាក់ថា លោកបានអនុម័តលើការស្នើដែលថា រុស្ស៊ី និងអាមេរិកអាចពិភាក្សាគ្នាអំពីការកាត់បន្ថយយ៉ាងស៊ីជម្រៅ រហូតដល់ ៥០% នៅក្នុងការចំណាយយោធា ដោយបន្ថែម៖ «យើងអាចឈានដល់កិច្ចព្រមព្រៀងជាមួយអាមេរិក។ យើងមិនប្រឆាំងនឹងវាទេ។ គំនិតនេះហាក់ដូចជាល្អសម្រាប់ខ្ញុំ។ អាមេរិកកាត់បន្ថយចំនួន ៥០% ហើយយើងកាត់បន្ថយចំនួន ៥០% ហើយចិនអាចចូលរួមជាមួយពួកយើងនៅពេលក្រោយប្រសិនបើចង់ធ្វើដែរ»៕

ដោយ៖ ឈាង

Related Topics:សង្គ្រាមរុស្ស៊ី-អ៊ុយក្រែន