ព័ត៌មានអន្ដរជាតិ

អ៊ីស្រាអែល គំរាមផ្ដាច់ទឹក និងភ្លើងនៅតំបន់ហ្គាហ្សា ដើម្បីដាក់សម្ពាធក្រុមហាម៉ាស

បានផុស

១ ថ្ងៃ មុន

នៅ

ថ្ងៃពុធ ៥ មីនា ២០២៥

ដោយ

Chheang

អ៊ីស្រាអែល កំពុងពិចារណាវិធានការកាត់ផ្តាច់ការផ្គត់ផ្គង់ទឹក និងអគ្គិសនីទៅកាន់តំបន់ហ្គាហ្សាស្ទ្រីប ដើម្បីដាក់សម្ពាធក្រុមហាម៉ាសឲ្យដោះលែងចំណាប់ខ្មាំងបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសកាលពីថ្ងៃអង្គារទី៤ខែមីនា កើតឡើងបន្ទាប់ពីការសម្រេចចិត្តនាពេលថ្មីៗរបស់អ៊ីស្រាអែលក្នុងការបិទជំនួយទាំងអស់ រួមទាំងអាហារ និងប្រេងឥន្ធនៈចូលទៅក្នុងហ្គាហ្សា បន្ទាប់ពីនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានទាមទារឲ្យហាម៉ាសពន្យារពេលដំណាក់កាលដំបូងនៃបទឈប់បាញ់។

លោក Omer Dostri អ្នកនាំពាក្យរបស់នាយករដ្ឋមន្ត្រីអ៊ីស្រាអែល បាននិយាយថា៖ «ហាម៉ាសបន្តបដិសេធកាន់តែយូរ អ៊ីស្រាអែលនឹងដាក់ឥទ្ធិពលកាន់តែខ្លាំង»។ លោកបន្តថា៖ «យើងមានវិធានការជាច្រើន ដើម្បីដាក់សម្ពាធហាម៉ាស។ យើងថែមទាំងបានរៀបចំដាក់យោធាឲ្យត្រឡប់ចូលទៅប្រយុទ្ធវិញ ហើយយើងមិនបដិសេធភាពទៅរួចនៅក្នុងការផ្ដាច់ទឹក និងអគ្គិសនីនៅក្នុងតំបន់ហ្គាហ្សាឡើយ»។

មន្ត្រីជាន់ខ្ពស់អ៊ីស្រាអែលរូបនេះ បានសង្កត់ធ្ងន់ថា អ៊ីស្រាអែល«បានសម្រួលសម្រួលយ៉ាងពេញទំហឹងជាមួយសហរដ្ឋអាមេរិក ហើយចង់ផ្ដល់ឱកាសឲ្យប្រគល់ចំណាប់ខ្មាំងដែលនៅរស់ជាច្រើននាក់ទៀតតាមដែលអាចធ្វើទៅបាន»។

លោក បេនចាមីន ណេតាន់យ៉ាហ៊ូ និងលោក Omer Dostri (រូបថត៖ GPO)

សកម្មភាពទាំងនេះ បានបង្កើនក្តីបារម្ភផ្នែកមនុស្សធម៌យ៉ាងសំខាន់។ ប្រជាជន ២,២លាននាក់នៃតំបន់ហ្គាហ្សាពឹងផ្អែកលើប្រេងឥន្ធនៈដើម្បីបូមទឹកពីអណ្តូង ហើយការបិទផ្លូវបាននាំឲ្យមានការកើនឡើងតម្លៃអាហារ ដែលធ្វើឲ្យស្ថានភាពដែលធ្ងន់ធ្ងររួចទៅហើយកាន់តែយ៉ាប់យ៉ឺនថែមទៀត។

លោក ណេតាន់យ៉ាហ៊ូ បានបដិសេធមិនចូលរួមក្នុងការចរចាសម្រាប់ដំណាក់កាលទីពីរនៃបទឈប់បាញ់ហ្គាហ្សា និងកិច្ចព្រមព្រៀងផ្លាស់ប្តូរអ្នកទោស។ ផ្ទុយទៅវិញ លោកចង់ពន្យារពេលអូសបន្លាយដំណាក់កាលដំបូងទៅវិញ ខណៈក្រុមហាម៉ាសបានទទូចឲ្យប្រកាន់ខ្ជាប់នូវកិច្ចព្រមព្រៀងកាលពីថ្ងៃទី១៩ខែមករា ដើម្បីឈានចូលដល់ដំណាក់កាលទីពីរ ដែលនាំទៅដល់ការដកទ័ពអ៊ីស្រាអែលជាអចិន្ត្រៃយ៍ និងបញ្ចប់សង្រ្គាម៕

ដោយ៖ ឈាង

ចុចអាន៖ បទឈប់បាញ់អាចដួលរលំ ក្រោយអ៊ីស្រាអែល បាញ់មនុស្សស្លាប់២នាក់នៅហ្គាហ្សា