ព័ត៌មានអន្ដរជាតិ

អ្នករងរបួសព្រោះយន្តហោះចម្បាំងកូរ៉េខាងត្បូងច្រឡំដៃទម្លាក់គ្រាប់បែក កើនឡើងដល់ ២៩នាក់

បានផុស

១ year មុន

នៅ

ថ្ងៃសុក្រ ៧ មីនា ២០២៥

ដោយ

Chheang

ចំនួនអ្នករងរបួសដែលបណ្ដាលមកពីការទម្លាក់គ្រាប់បែកច្រឡំដៃរបស់យន្តហោះចម្បាំងកូរ៉េខាងត្បូង បានកើនឡើងដល់ ២៩នាក់ហើយ ក្នុងនោះមានជនស៊ីវិល ១៥នាក់ និងទាហាន ១៤នាក់។ នេះបើយោងតាមការប្រកាសរបស់ក្រសួងការពារជាតិកូរ៉េខាងត្បូង នៅថ្ងៃសុក្រទី៧ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលសមយុទ្ធហ្វឹកហាត់បាញ់គ្រាប់ពិតនៅទីក្រុង Pocheon ភាគឦសាននៃទីក្រុងសេអ៊ូលកាលពីថ្ងៃព្រហស្បតិ៍ យន្តហោះចម្បាំង KF-16 របស់កូរ៉េខាងត្បូង២គ្រឿង បានទម្លាក់គ្រាប់បែក MK-82 ចំនួន ៨គ្រាប់ដោយចៃដន្យ នៅខាងក្រៅតំបន់ដែលបានកំណត់។

ក្នុងចំណោមអ្នករងរបួស មនុស្ស ៩នាក់កំពុងសម្រាកព្យាបាលនៅមន្ទីរពេទ្យ ដោយ២នាក់ស្ថិតក្នុងស្ថានភាពធ្ងន់ធ្ងរ។

ឧបទ្ទវហេតុនេះ បានបណ្តាលឲ្យខូចខាតយ៉ាងធ្ងន់ធ្ងរដល់តំបន់លំនៅដ្ឋានរួមមានទាំងផ្ទះ ព្រះវិហារ និងឃ្លាំងមួយកន្លែង ដែលនាំឲ្យមានការជម្លៀសអ្នកស្រុកប្រហែល ៥០នាក់។

កងទ័ពអាកាសកូរ៉េខាងត្បូង បានផ្អាកសមយុទ្ធបាញ់គ្រាប់ពិត ដោយរង់ចាំការស៊ើបអង្កេត និងបានសម្តែងការសោកស្តាយចំពោះឧប្បត្តិហេតុនេះ។ ពួកគេក៏បានធានាផងដែរថា សំណងនឹងត្រូវបានផ្តល់សម្រាប់ការខូចខាតដែលបានកើតឡើង។ ទោះជាយ៉ាងណាក៏ដោយ សមយុទ្ធ Freedom Shield ដែលជាសមយុទ្ធទ្រង់ទ្រាយធំប្រចាំឆ្នាំជាមួយសហរដ្ឋអាមេរិក ត្រូវបានគេរំពឹងថានឹងដំណើរការតាមការគ្រោងទុកដដែលនៅថ្ងៃចន្ទសប្ដាហ៍ក្រោយ៕