ព័ត៌មានអន្ដរជាតិ

អ៊ីស្រាអែល ផ្ដាច់ភ្លើងតំបន់ហ្គាហ្សា មុនចាប់ផ្ដើមកិច្ចចរចាថ្មី

បានផុស

២ សប្តាហ៍ មុន

នៅ

ថ្ងៃចន្ទ ១០ មីនា ២០២៥

ដោយ

Chheang

អ៊ីស្រាអែល បានកាត់ផ្តាច់ការផ្គត់ផ្គង់អគ្គិសនីទៅកាន់តំបន់ហ្គាហ្សាស្ទ្រីប ដែលធ្វើឲ្យវិបត្តិមនុស្សធម៌ក្នុងតំបន់កាន់តែលំបាកខ្លាំង សម្រាប់មន្ទីរពេទ្យ ក្រុមគ្រួសារប្រជាជនប៉ាឡេស្ទីន និងសេវាកម្មសំខាន់ៗ។

តំបន់ហ្គាហ្សានៅពេលរាត្រី (រូបថត៖ New York Times)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្តរបស់អ៊ីស្រាអែល ធ្វើឡើងដើម្បីដាក់សម្ពាធក្រុមហាម៉ាសឲ្យពន្យារពេលដំណាក់កាលដំបូងនៃបទឈប់បាញ់ និងធានាការដោះលែងចំណាប់ខ្មាំងដែលឃុំខ្លួននៅហ្គាហ្សា។

យោងតាមការចុះផ្សាយរបស់ Al Jazeera នៅថ្ងៃទី១០ខែមីនានេះ ក្រុមចរចារបស់អ៊ីស្រាអែល នឹងទៅដល់ទីក្រុងដូហា ខណៈដែលអ្នកសម្រុះសម្រួលមកពីប្រទេសអេហ្ស៊ីប កាតា និងសហរដ្ឋអាមេរិកព្យាយាមធ្វើឲ្យកិច្ចព្រមព្រៀងបទឈប់បាញ់ដ៏ផុយស្រួយរវាងអ៊ីស្រាអែល និងក្រុមហាម៉ាសអាចដំណើរការឡើងវិញ។

ក្រុមហាម៉ាស បានថ្កោលទោសការសម្រេចចិត្តរបស់អ៊ីស្រាអែលក្នុងការកាត់ផ្តាច់អគ្គិសនីនៅហ្គាហ្សា ដែលជាទង្វើគំរាមកំហែងដល់រោងចក្របំប្លែងទឹកស្អាតតែមួយគត់របស់តំបន់។ ហាម៉ាស បានចាត់ទុកទង្វើនេះថាជា«ការគំរាមកំហែងដ៏ថោកទាប និងមិនអាចទទួលយកបាន»។

អង្គការសហប្រជាជាតិ និងអង្គការមនុស្សធម៌ បានថ្កោលទោស និងហៅវិធានការរបស់អ៊ីស្រាអែលថាជាទម្រង់នៃការដាក់ទណ្ឌកម្ម ដែលធ្វើឲ្យការឈឺចាប់របស់ប្រជាជនស៊ីវិលនៅតំបន់ហ្គាហ្សាកាន់តែធ្ងន់ធ្ងរ។ អង្គការសហប្រជាជាតិក៏បានព្រមានផងដែរថា ការកាត់ផ្តាច់ចរន្តអគ្គិសនីនឹងបំផ្លាញសេវាថែទាំសុខភាពសំខាន់ៗបន្ថែមទៀត ដែលស្ថិតក្រោមភាពតានតឹងចាប់តាំងពីការផ្ទុះឡើងនៃអរិភាព។

ថ្មីៗនេះ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសបដិសេធមិនចូលរួមក្នុងការចរចាសម្រាប់ដំណាក់កាលទីពីរនៃបទឈប់បាញ់ហ្គាហ្សា និងកិច្ចព្រមព្រៀងផ្លាស់ប្តូរអ្នកទោស។ ផ្ទុយទៅវិញ លោកចង់ពន្យារពេលអូសបន្លាយដំណាក់កាលដំបូង ខណៈក្រុមហាម៉ាសបានទទូចឲ្យប្រកាន់ខ្ជាប់នូវកិច្ចព្រមព្រៀងកាលពីថ្ងៃទី១៩ខែមករា ដើម្បីឈានចូលដល់ដំណាក់កាលទីពីរ ដែលនាំទៅដល់ការដកទ័ពអ៊ីស្រាអែលជាអចិន្ត្រៃយ៍ និងបញ្ចប់សង្រ្គាម។

សូមបញ្ជាក់ថា ក្រសួងសុខាភិបាលហ្គាហ្សា បានបញ្ជាក់ពីការស្លាប់ជនជាតិប៉ាឡេស្ទីនចំនួន ៤៨ ៤៥៣នាក់ និងមនុស្ស ១១១ ៨៦០នាក់បានរងរបួស ក្នុងការវាយប្រហាររបស់អ៊ីស្រាអែលទៅលើតំបន់ហ្កាហ្សា។ ចំណែកឯការិយាល័យប្រព័ន្ធផ្សព្វផ្សាយរដ្ឋាភិបាលបានធ្វើបច្ចុប្បន្នភាព ចំនួនអ្នកស្លាប់របស់ខ្លួនដល់យ៉ាងហោចណាស់ ៦១ ៧០៩នាក់ ដោយនិយាយថា ប្រជាជនប៉ាឡេស្ទីនរាប់ពាន់នាក់ដែលបាត់ខ្លួននៅក្រោមគំនរបាក់បែកត្រូវគេសន្មត់ថាបានស្លាប់។

ដោយឡែក ក្នុងអំឡុងការវាយប្រហាររបស់ហាម៉ាសទៅលើប្រទេសអ៊ីស្រាអែលកាលពីថ្ងៃទី៧ខែតុលាឆ្នាំ២០២៣ យ៉ាងហោចណាស់មនុស្ស ១ ១៣៩នាក់ត្រូវបានសម្លាប់ ហើយមនុស្សជាង ២០០នាក់ត្រូវបានចាប់ខ្លួនទៅតំបន់ហ្គាហ្សា៕

ដោយ៖ ឈាង

ចុចអាន៖ បារាំង អង់គ្លេស និងអាល្លឺម៉ង់ ជំរុញឲ្យអ៊ីស្រាអែលបើកជំនួយចូលតំបន់ហ្គាហ្សាឡើងវិញ

Related Topics:សង្គ្រាមអ៊ីស្រាអែល-ប៉ាឡេស្ទីន