កាណាដា ផ្ទេរ​ប្រាក់ ១,៧​ពាន់​លាន​ដុល្លារឲ្យ​អ៊ុយក្រែន តាម​រយៈយន្តការ ERA របស់ G7

ប្រទេសកាណាដា បានផ្ទេរប្រាក់ចំនួន ២,៥​ពាន់លានដុល្លារកាណាដា (ប្រហែល ១,៧​ពាន់លានដុល្លារអាមេរិក) ទៅ​ឲ្យ​អ៊ុយក្រែន ក្រោម​យន្តការ​​នៃ​គំនិតផ្តួចផ្តើមការបង្កើនល្បឿនប្រាក់ចំណូលវិសាមញ្ញ (ERA) របស់​ក្រុម​ប្រទេស G7។

បើ​យោងតាមក្រសួងហិរញ្ញវត្ថុអ៊ុយក្រែន​កាល​ពី​ថ្ងៃ​ទី​១៣​​ខែ​មីនា​ឆ្នាំ​២០២៥ គំនិតផ្តួចផ្តើមនេះប្រើប្រាស់ប្រាក់ចំណេញពីទ្រព្យសម្បត្តិរបស់រុស្ស៊ីដែលបានបង្កក ដើម្បីផ្តល់ការគាំទ្រផ្នែកហិរញ្ញវត្ថុដល់អ៊ុយក្រែនចំពេលមានជម្លោះដែលកំពុងបន្តជាមួយ​ក្រុង​មូស្គូ។

យន្តការ ERA ដែលមានតម្លៃសរុប ៥០​ពាន់លានដុល្លារ ផ្តល់ប្រាក់កម្ចីដល់អ៊ុយក្រែន ដែលនឹងត្រូវសងវិញដោយប្រើប្រាក់ចំណេញនាពេលអនាគតពីទ្រព្យសម្បត្តិរបស់រុស្ស៊ីដែលជាប់គាំង។ ការរួមចំណែករបស់កាណាដាចំពោះគំនិតផ្តួចផ្តើមនេះ មានចំនួន ៣,៥​ពាន់លានដុល្លារ ហើយ​ប្រាក់កម្ចី​នឹង​ត្រូវ​ផ្ដល់​ឲ្យ​អ៊ុយក្រែន​សម្រាប់រយៈពេល ​៣០​ឆ្នាំ។

ជំនួយហិរញ្ញវត្ថុនេះ គឺជាផ្នែកមួយនៃកិច្ចខិតខំប្រឹងប្រែង G7 ដ៏ទូលំទូលាយមួយ ដើម្បីទាញយកការប្រាក់ដែលរកបានលើទ្រព្យសម្បត្តិរបស់រុស្ស៊ីដែលបានបង្កក ដើម្បីជួយដល់ប្រទេសអ៊ុយក្រែនដោយមិនមានបន្ទុកលើអ្នកបង់ពន្ធ។ ជាឧទាហរណ៍ សហរដ្ឋអាមេរិកបានបញ្ចប់ការផ្តល់ប្រាក់កម្ចី ២០ពាន់លានដុល្លារដល់អ៊ុយក្រែន ជាផ្នែកនៃកញ្ចប់​ថវិកា ៥០​ពាន់លានដុល្លារនេះ ជាមួយនឹងមូលនិធិដែលបានបែងចែកសម្រាប់ជំនួយទាំងផ្នែកសេដ្ឋកិច្ច និងយោធា។

យុទ្ធសាស្ត្ររបស់ G7 ក្នុងការប្រើប្រាស់ប្រាក់ចំណេញពីទ្រព្យសម្បត្តិរបស់រុស្ស៊ីដែលបង្កក តំណាង​ឲ្យ​ការផ្លាស់ប្តូរដ៏សំខាន់ក្នុងការគាំទ្រផ្នែកហិរញ្ញប្បទានសម្រាប់អ៊ុយក្រែន និង​មាន​គោលបំណងពន្លឿនជំនួយ។ ទោះជាយ៉ាងណាក៏ដោយ រុស្ស៊ីបានបរិហារវិធានការទាំងនេះ ដោយហៅ​ថា​​ជា «គ្រោងការណ៍ក្លែងបន្លំ» និងបានចោទប្រកាន់ប្រទេសលោកខាងលិចថាបានដកហូតប្រាក់ចំណូលពីទ្រព្យសម្បត្តិរដ្ឋរបស់រុស្ស៊ី៕

ដោយ៖ ឈាង