ព័ត៌មានអន្ដរជាតិ

កូរ៉េខាងជើង អួតថាធ្វើតេស្តមីស៊ីលប្រឆាំងយន្តហោះដោយជោគជ័យ

បានផុស

១ សប្តាហ៍ មុន

នៅ

ថ្ងៃសុក្រ ២១ មីនា ២០២៥

ដោយ

Chheang

ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃសុក្រទី២១ខែមីនានេះថា កូរ៉េខាងជើងបានបាញ់សាកល្បងដោយជោគជ័យនូវប្រព័ន្ធមីស៊ីលប្រឆាំងយន្តហោះចុងក្រោយបំផុតរបស់ខ្លួន ដែលថ្មីៗនេះត្រូវបានដាក់ឲ្យដំណើរការក្នុងផលិតកម្មពេញលេញរបស់ប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

KCNA បានចុះផ្សាយថា ការតេស្តមីស៊ីលនេះ ធ្វើឡើងដោយរដ្ឋបាលមីស៊ីលរបស់ប្រទេសកូរ៉េខាងជើង កាលពីថ្ងៃព្រហស្បតិ៍ ហើយមេដឹកនាំកូរ៉េខាងជើង លោក គីម ជុងអ៊ុន បានចុះទៅត្រួតពិនិត្យការសាកល្បងនេះ ជាមួយនឹងសមាជិកសំខាន់ៗនៃគណៈកម្មាធិការយោធាមជ្ឈិមបក្ស ដោយអះអាងថា ការឆ្លើយតបរហ័សនៃការប្រយុទ្ធរបស់មីស៊ីលគឺ «មានសារសំខាន់» និង «អាចទុកចិត្តបានខ្ពស់»។

បន្ថែមពីនេះ លោក គីម បានប្រកាសថា កងទ័ពកូរ៉េខាងជើង នឹងត្រូវបានបំពាក់ដោយ «ប្រព័ន្ធអាវុធការពារដ៏សំខាន់ផ្សេងៗទៀត ជាមួយនឹងការបង្ហាញពីការប្រយុទ្ធដ៏គួរឲ្យកោតសរសើរ»។ លោក គីម ក៏បានសម្តែងការដឹងគុណចំពោះក្រុមស្រាវជ្រាវទទួលបន្ទុក និងសហគ្រាសឧស្សាហកម្មអាវុធដែលពាក់ព័ន្ធសម្រាប់ការពង្រឹងសមត្ថភាពការពារជាតិផងដែរ។

នេះគឺជាការតេស្តសាកល្បងមីស៊ីលលើកទី៦របស់កូរ៉េខាងជើង សម្រាប់ឆ្នាំ២០២៥។

ការប្រកាសនេះ ធ្វើឡើងស្របពេលជាមួយនឹងការបញ្ចប់នៃសមយុទ្ធយោធាប្រចាំឆ្នាំរវាងកូរ៉េខាងត្បូង និងសហរដ្ឋអាមេរិក ដែលត្រូវបានគេស្គាល់ថា Freedom Shield។

កូរ៉េខាងជើងបានរិះគន់ជាបន្តបន្ទាប់នូវសមយុទ្ធទាំងនេះ ដោយចាត់ទុកវាជាការហាត់សមសម្រាប់ការឈ្លានពាន។

អ្នកនាំពាក្យក្រសួងការពារជាតិកូរ៉េខាងជើង បានថ្កោលទោសសមយុទ្ធចុងក្រោយនេះថា «ព្រហើន» ហើយបានព្រមានថានឹងចាត់វិធានការគ្រប់មធ្យោបាយទាំងអស់ ដើម្បីប្រឆាំងនឹងសកម្មភាពរបស់អាមេរិក និងកូរ៉េខាងត្បូង៕