ទេសចររុស្ស៊ីប្រើ​ភាសាចិន «Ni hao» ស្វាគមន៍ បង្កើត​ក្តីក្តៅក្រហាយ​នៅ​​ថៃរហូតដល់​ឡាវ​

ផ្ទុះការវែកញែកពេញអ៊ីនធឺណិតក្រោយអ្នកទេសចររុស្ស៊ីប្រើពាក្យ «Ni hao» ស្វាគមន៍អ្នកជំនាញខាងបរិស្ថាន និងប្រព័ន្ធផ្សព្វផ្សាយសង្គមថៃ លោក Sai Scott នៅលើឆ្នេរសមុទ្រ​មួយក្នុងក្រុង Krabi ប្រទេសថៃ។ នេះបើយោងតាមការចេញផ្សាយរបស់គេហទំព័រព៏ត៌មាន The Laotian Times កាលពីថ្ងៃទី២៣ខែមេសានេះ។

រឿងហេតុនេះកើតឡើងនៅពេលដែលលោក Scott និយាយទៅកាន់គូស្នេហ៍រុស្ស៊ីមួយគូ ដោយបុរសជនជាតិរុស្សីបានឆ្លើយតបវិញថា «Ni hao» ជាភាសាចិនកុកងឺ និយាយសម្រាប់ស្វាគមន៍ ដែល​មានន័យ​ជាភាសាខ្មែរថា «ជំរាបសួរ» ខណៈដែលកំពុងស្ថិតនៅក្នុងប្រទេសថៃមិនមែននៅក្នុងប្រទេសចិននោះទេ។

បន្ទាប់មក លោក Scott មានការអាក់អន់ស្រពន់ចិត្ត ដោយហៅការស្វាគមន៍នេះថា ជាការមិនគោរព និងប្រកាន់ពូជសាសន៍ និងលើកហេតុផលថា ការសន្មត់ថា«ជនជាតិអាស៊ីទាំងអស់ជាជនជាតិចិន» គឺជាការមិនអើពើនឹងភាពសម្បូរបែបនៃវប្បធម៌របស់អាស៊ី​នោះទេ​​។

ក្រោយមក លោកបានបង្ហោះអំពីឧបទ្ទវហេតុនេះតាមប្រព័ន្ធអ៊ីនធឺណិត ដែលជំរុញឱ្យមានការគាំទ្រយ៉ាងទូលំទូលាយពីអ្នកប្រើប្រាស់បណ្តាញសង្គមថៃ ដែលចាត់ទុកការស្វាគមន៍​បែបនេះថា ជា«ទម្រង់នៃការយល់ខុស និងការលុបបំបាត់វប្បធម៌»​។ មនុស្សមួយចំនួនបានគាំទ្រជំហររបស់លោក Scott ដោយរិះគន់ អ្នកទេសចរលោកខាងលិចមួយចំនួនលើ​ការ​និយាយទូទៅ ឬមិនគោរពទំនៀមទម្លាប់ក្នុងស្រុក។

ពលរដ្ឋថៃបានសង្កត់ធ្ងន់ថា អាកប្បកិរិយាបែបនេះមិនមែនគ្រាន់តែជាកំហុសធម្មតាទេ ប៉ុន្តែអាចជាការប្រមាថយ៉ាងខ្លាំង ជាពិសេស ខណៈដែលការស្វាគមន៍ក្នុងប្រទេសថៃដូចជា «សាវ៉ាឌី» គឺជាចំណេះដឹងទូទៅសម្រាប់អ្នកទេសចរដែលគួរតែដឹង។ ទោះយ៉ាងណាក៏មានអ្នកខ្លះក៏ប្រឆាំងនឹងការលើកឡើងនេះ ដែលថាការប្រើពាក្យ «Ni hao» មិនមែនជាការប្រកាន់​ពូជសាសន៍នោះទេ។

ការជជែកវែកញែកក៏បានពង្រីកហួសពីប្រទេសថៃ ដែលបង្កឱ្យមានប្រតិកម្មស្រដៀងគ្នានៅក្នុងប្រទេសជិតខាងឡាវ។ ពលរដ្ឋឡាវថា ការ​កំណត់ជនជាតិអាស៊ីអាគ្នេយ៍ដូចជនជាតិចិនឆ្លុះបញ្ចាំងពីភាព​​មិន​យល់ដឹង​ខាងវប្បធម៌​​ផ្សេងៗគ្នា​ផងដែរ។

គួរបញ្ជាក់ថាចាប់តាំងពីពេលនោះមក ឧប្បត្តិហេតុនេះបានក្លាយជាចំណុចមួយសម្រាប់ការពិភាក្សាអំពីការគោរពវប្បធម៌ អត្តសញ្ញាណ និងការទទួលខុសត្រូវរបស់អ្នកទេសចរក្នុងការស្វែងយល់ពីភាពខុសគ្នារវាងវប្បធម៌អាស៊ី៕

អត្ថបទ៖ ប៊ុន សុភាព