វិមានក្រឹមឡាំង៖ រុស្ស៊ី​ផ្ដោត​លើ​កិច្ច​ចរចា​សំខាន់ជាង​ភាព​ស្រប​ច្បាប់​របស់ ហ្សេលេនស្គី

វិមានក្រឹមឡាំង បានបង្ហាញពីឆន្ទៈរបស់ខ្លួនក្នុងការចរចា​សន្តិភាព​ជាមួយ​​​ប្រទេស​អ៊ុយក្រែន ហើយ​ចាត់​ទុក​ភាព​ស្រប​ច្បាប់​​នៃ​ភាព​ជា​ប្រធានាធិបតី​របស់​លោក វ៉ូឡូឌីមៀរ ហ្សេលេនស្គី ​ជា​កង្វល់​បន្ទាប់​បន្សំ​តែ​ប៉ុណ្ណោះ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយ​កាល​ពី​ថ្ងៃ​ទី​២៩​ ខែ​មេសា​ថា ខណៈដែលរុស្ស៊ីចាត់ទុកអាណត្តិរបស់​លោក ហ្សេលេនស្គី ថាបានផុតកំណត់ហើយ នេះមិនរារាំងការពិភាក្សាក្នុងគោលបំណងដោះស្រាយជម្លោះដែលកំពុងបន្តនោះទេ។

លោក Peskov បាន​លើក​​ឡើង​​ថា៖ «លោក ហ្សេលេនស្គី មានបញ្ហាធំខាងតុលាការទាក់ទងនឹងភាពស្របច្បាប់របស់គាត់ ប៉ុន្តែទោះបីជាដូច្នេះក៏ដោយ ភាគីរុស្ស៊ីនៅតែបើកចំហសម្រាប់ការចរចា» ដោយសង្កត់ធ្ងន់ថា កង្វះភាពស្របច្បាប់គឺ «មិនមែនជាឧបសគ្គ» ក្នុងការផ្តួចផ្តើមការចរចា​​ទេ។ លោក​បញ្ជាក់​ថា៖ «រឿង​ចម្បង​គឺ​ត្រូវ​ចាប់​ផ្តើម​ដំណើរការ​ចរចា​»។

ចាប់តាំងពីអាណត្តិប្រធានាធិបតីរបស់លោក ហ្សេលេនស្គី បានផុតកំណត់ជាផ្លូវការកាលពីខែឧសភា​ឆ្នាំ​​មុនដោយគ្មាន​ការ​បោះឆ្នោត​ជា​ថ្មី រដ្ឋាភិបាល​ទីក្រុងមូស្គូតែង​​ចោទសួរអំពីភាពស្របច្បាប់របស់គាត់។ លោក ហ្សេលេនស្គី បានបន្តច្បាប់អាជ្ញាសឹករៀងរាល់បីខែម្តង ចាប់តាំង​កើត​មាន​​សង្គ្រាម​ជាមួយ​រុស្ស៊ី​ក្នុងខែកុម្ភៈ ឆ្នាំ​២០២២។

សូម​បញ្ជាក់​ថា ថ្មីៗ​នេះ ភាគី​រុស្ស៊ី​បាន​​ប្រកាសបទឈប់បាញ់ជាឯកតោភាគី​រយៈពេល៧២ម៉ោង ចាប់ពីពាក់កណ្តាលអាធ្រាត្រថ្ងៃទី៨ដល់ថ្ងៃទី១១​ខែ​ឧសភា ដែលស្របនឹងការប្រារព្ធទិវាជ័យជម្នះរំឭកដល់ការបញ្ចប់សង្គ្រាមលោកលើកទីពីរ។ ប្រតិកម្មទៅនឹងការប្រកាសបទឈប់បាញ់​នេះ លោក ហ្សេលេនស្គី បានចាត់ទុកថា នោះគ្រាន់តែជាឧបាយកលប៉ុណ្ណោះ។ លោក​បាន​​រិះគន់ថា លោក ពូទីន បានស្នើឲ្យមានបទឈប់បាញ់រយៈពេលខ្លីដើម្បីប្រារព្ធទិវាជ័យជម្នះ ប៉ុន្តែជីវិតមនុស្សគឺសំខាន់ជាងព្រឹត្តិការណ៍នេះ។

លោក ហ្សេលេនស្គី បន្ទោសថា៖ «មានឧបាយកលទៀតហើយ! ពូទីន ចង់ឲ្យបញ្ឈប់ការបាញ់ប្រហារ ដើម្បីផ្តល់ស្ងៀមស្ងាត់ពេលគាត់រៀបចំក្បួនដង្ហែទិវាជ័យជម្នះ។ យើងផ្តល់តម្លៃដល់ជីវិតមនុស្ស មិនមែនក្បួនព្យុហយាត្រានោះទេ»៕

ដោយ៖ ឈាង

ចុចអាន៖ ហ្សេលេនស្គី ថា បទឈប់បាញ់៣ថ្ងៃដែលប្រកាសដោយពូទីន គ្រាន់ជាឧបាយកលប៉ុណ្ណោះ!