ព័ត៌មានអន្ដរជាតិ

ត្រាំ៖ ការយកកាណាដាមកគ្រប់គ្រង ទំនងនឹងមិនប្រើកម្លាំងយោធាដូចនៅ Greenland ទេ

បានផុស

១ year មុន

នៅ

ថ្ងៃចន្ទ ៥ ឧសភា ២០២៥

ដោយ

Chheang

ក្នុងបទសម្ភាសន៍មួយកាលពីថ្ងៃអាទិត្យទី៤ខែឧសភាឆ្នាំ២០២៥នៅកម្មវិធី «Meet the Press» របស់ NBC លោក ដូណាល់ ត្រាំ បាននិយាយថា វាមានឱកាសតិចតួចបំផុតដែលអាមេរិកនឹងងាកទៅរកការប្រើប្រាស់កម្លាំងយោធា ដើម្បីដណ្ដើមយកកាណាដាឲ្យក្លាយជារដ្ឋទី៥១របស់អាមេរិក ខុសពីអ្វីដែលលោកធ្លាប់ប៉ុនប៉ងយកដែនកោះ Greenland ពីដាណឺម៉ាកមកគ្រប់គ្រង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអាមេរិក បានកត់សម្គាល់ថា៖ «ខ្ញុំគិតថា យើងនឹងមិនឈានដល់ចំណុចនោះទេ» ដោយបានផ្តល់យោបល់ថា ការពិភាក្សាការទូត និងសេដ្ឋកិច្ចនឹងជាមធ្យោបាយចម្បងសម្រាប់ការពិចារណាបែបនេះ។ លោក ត្រាំ បានបន្ថែមថា៖ «រឿងនេះអាចកើតឡើងជាមួយកោះ Greenland។ ខ្ញុំនឹងនិយាយដោយស្មោះត្រង់ យើងត្រូវការវាសម្រាប់សន្តិសុខជាតិ និងអន្តរជាតិ។ ប៉ុន្តែខ្ញុំគិតថា វាមានឱកាសតិចតួចបំផុត ដែលត្រូវធ្វើជាមួយកាណាដា»។

ការអត្ថាធិប្បាយរបស់លោក ត្រាំ ធ្វើឡើងមុនកិច្ចប្រជុំដែលបានគ្រោងទុកជាមួយនាយករដ្ឋមន្ត្រីកាណាដា លោក Mark Carney នៅសេតវិមានក្នុងពេលឆាប់ៗខាងមុខ។ មេដឹកនាំទាំងពីរត្រូវបានគេរំពឹងថានឹងពិភាក្សាអំពីជម្លោះពាណិជ្ជកម្មដែលកំពុងបន្ត រួមទាំងពន្ធគយថ្មីៗ និងវិធានការសងសឹកដែលបានធ្វើឲ្យទំនាក់ទំនងទ្វេភាគីមានភាពតានតឹង។

លោក Carney បានច្រានចោលយ៉ាងម៉ឺងម៉ាត់ចំពោះគំនិតនៃការកាត់បញ្ចូលកាណាដាជាឧបសម្ព័ន្ធអាមេរិក ដោយអះអាងពីអធិបតេយ្យភាព និងឯករាជ្យភាពរបស់កាណាដា។ លោក Carney បានសង្កត់ធ្ងន់ថា គំនិតដែលចង់ឲ្យកាណាដាក្លាយជារដ្ឋទី៥១ មិនអាចកើតឡើងជាដាច់ខាត។

មតិសាធារណៈនៅប្រទេសកាណាដា ប្រឆាំងយ៉ាងខ្លាំងចំពោះគំនិតនៃការកាត់បញ្ចូលជាឧបសម្ព័ន្ធនេះ។ ការស្ទង់មតិរបស់ Angus Reid នាពេលថ្មីៗនេះ បានបង្ហាញថា ៩០% នៃជនជាតិកាណាដា ប្រឆាំងនឹងគំនិតនៃការចូលរួមជាមួយសហរដ្ឋអាមេរិក ដែលឆ្លុះបញ្ចាំងពីអារម្មណ៍ដ៏រឹងមាំរបស់ពួកគេនៅក្នុងការរក្សានូវអត្តសញ្ញាណជាតិ និងឯករាជ្យភាព៕

ដោយ៖ ឈាង

ចុចអាន៖ លោក ត្រាំ ខលទៅអបអរ និងណាត់ជួបផ្ទាល់ជាមួយមេដឹកនាំថ្មីរបស់កាណាដា