ប៉ាគីស្ថាន អះអាងបាញ់ទម្លាក់យន្តហោះគ្មានមនុស្សបើករបស់ឥណ្ឌា ១២គ្រឿងទៀត

ប្រទេសប៉ាគីស្ថាន បានថ្កោលទោសចំពោះទង្វើបង្ករឿងថ្មីទៀតពីសំណាក់ទីក្រុងញូវដែលី ​និងបញ្ជាក់ថា ខ្លួនបានបាញ់ទម្លាក់យន្តហោះគ្មានមនុស្សបើករបស់ឥណ្ឌាចំនួន១២គ្រឿង នាពាក់កណ្តាលអាធ្រាត្រថ្ងៃពុធឈានចូលថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNN ការវាយប្រហារនេះបណ្តាលឲ្យស្លាប់ជនស៊ីវិលម្នាក់និងរបួសទាហាន ៤នាក់ ខណៈទីក្រុងអ៊ីស្លាម៉ាបាដ ថ្កោលទោសទង្វើនេះ ថាជា «ការបង្កហេតុធ្ងន់ធ្ងរបំផុត»។

អ្នកនាំពាក្យកងទ័ពប៉ាគីស្ថាន ឧត្តមសេនីយ៍ Ahmed Sharif Chaudhry ប្រាប់សន្និសីទកាសែតថា «ឥណ្ឌាធ្វើសកម្មភាពយោធាយ៉ាងគឃ្លើនដាក់ប៉ាគីស្ថានទៀតហើយ។ គិតមកទល់ពេលនេះ កងកម្លាំងប៉ាគីស្ថាន បានបាញ់ទម្លាក់យន្តហោះគ្មានមនុស្សបើក Harop ចំនួន១២គ្រឿងនៅទីតាំងផ្សេងគ្នា ចាប់ពីទីក្រុង Rawalpindi នាភាគខាងជើងប្រទេស ទៅដល់តំបន់មួយនៅក្បែរទីក្រុង Lahore»។

ទន្ទឹមនោះ លោកអះអាងថា ពេលនេះ កងទ័ពអាកាសកំពុងប្រុងជើងការជាប់ជានិច្ច ចំពោះការវាយប្រហារពីសត្រូវ។

Harop គឺជាយន្តហោះ​គ្មាន​មនុស្ស​បើកទម្លាក់​គ្រាប់​បែក​រយៈ​ចម្ងាយ​ឆ្ងាយ ​ផលិត​ដោយក្រុមហ៊ុន Israel Aerospace Industries ​របស់​អ៊ីស្រាអែល។ 

រឿងនេះកើតឡើងបន្ទាប់ពី ឥណ្ឌាផ្តាំទៅប៉ាគីស្ថានថា បើពួកគេហ៊ានសងសឹកវិញនោះ ទីក្រុងញូវដែលីនឹងបន្តបាញ់ថែមទៀត។ 

ការព្រមាននេះចេញពីមាត់រដ្ឋមន្ត្រីការបរទេសឥណ្ឌា Vikram Misri អំឡុងពេលលោកថ្លែងទៅកាន់ប្រេសិតមកពី១៣ប្រទេស ដែលជួបប្រជុំគ្នាក្នុងទីក្រុងញូវដែលី ដោយលោកគូសបញ្ជាក់ថា ការវាយប្រហាររបស់ឥណ្ឌានេះ មិនមែនជាការបញ្ឆេះជម្លោះអ្វីទេ ប៉ុន្តែគឺជាការឆ្លើយតបទៅអំពើភេរវកម្មដ៏សាហាវនៅតំបន់ Pahalgam ដែលផ្តាច់ជីវិតជនស៊ីវិលចំនួន២៦នាក់។ យ៉ាងណា លោកព្រមានថា បើភាគីប៉ាគីស្ថាន ពិតជាឆ្លើយតបវិញនោះ ឥណ្ឌាក៏នឹងវាយបកទៅវិញដូចគ្នា៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន ព្រមានថា សង្គ្រាមនុយក្លេអ៊ែរ អាចផ្ទុះឡើងគ្រប់ពេល