អង់គ្លេស ស្តីឲ្យរុស្ស៊ីថា បញ្ជូនគណៈប្រតិភូថ្នាក់ទាបពេក ទៅចរចាជាមួយ អ៊ុយក្រែន

ក្រោយវិមានក្រឹមឡាំងបញ្ជាក់ច្បាស់ថា លោកប្រធានាធិបតី វ្ល៉ាឌីមៀរ ពូទីន មិនមានវត្តមានក្នុងកិច្ចចរចាសន្តិភាពជាមួយអ៊ុយក្រែន នៅទីក្រុងអ៊ីស្តង់ប៊ុលនៃប្រទេសតួកគី ហើយបានបង្ហាញបញ្ជីឈ្មោះគណៈប្រតិភូដែលនឹងត្រូវទៅចូលរួមនោះ ស្រាប់តែចក្រភពអង់គ្លេស ស្តីឲ្យថា រុស្ស៊ី បញ្ជូនក្រុមមន្ត្រីថ្នាក់ទាបពេកហើយ ឲ្យទៅចូលរួមក្នុងជំនួបនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណៈប្រតិភូរុស្ស៊ីនឹងត្រូវដឹកនាំដោយលោក Vladimir Medinsky ដែលជាជំនួយការប្រធានាធិបតី ហើយក៏មានការចូលរួមពីសំណាក់អនុរដ្ឋមន្ត្រីការបរទេស Mikhail Galuzin, អនុរដ្ឋមន្ត្រីការពារជាតិ Aleksandr Fomin និងមេចារកម្មយោធា Igor Kostyukov ផងដែរ។

ទោះបីជាយ៉ាងណាក៏ដោយ ជុំវិញរឿងនេះ រដ្ឋមន្ត្រីការបរទេសអង់គ្លេស David Lammy បានរិះគន់ថា លោកពូទីន បញ្ជូនគណៈប្រតិភូជាន់ទាបពេក។

BBC បានដកស្រង់សម្តីលោក Lammy ដែលថ្លែងក្នុងទីក្រុង Antalya ជាទីលោកចូលរួមកិច្ចពិភាក្សាណាតូ នៅថ្ងៃព្រហស្បតិ៍ទី១៥ខែឧសភាឆ្នាំ២០២៥ថា​៖ «​យើង​មក​ជាមួយ​នឹង​សារ​តែ​មួយគត់ គឺ​ឈរ​នៅ​ខាង​អ៊ុយក្រែននិង​ដើម្បី​ធានា​ថា ​យើង​ទទួល​បាន​សន្តិភាពដ៏​ត្រឹមត្រូវនិង​ស្ថិតស្ថេរ​យូរអង្វែង។ ការត្រៀមខ្លួនសម្រាប់សន្តិភាពនោះ នឹងត្រូវបង្ហាញដោយលោកប្រធានាធិបតី ហ្សេលេនស្គី ដែលក៏នឹងមានវត្តមាននៅក្នុងប្រទេសតួកគីដែរ។ ពិតណាស់ យើងបានឃ្លាំមើលយ៉ាងដិតដល់ នៅពេលយើងឆ្ពោះទៅរកកិច្ចពិភាក្សាទាំងនេះ។ មន្ត្រីថ្នាក់ទាបពេកហើយ ដែលភាគីរុស្ស៊ីយកមកធ្វើជាតំណាងនេះ»។

សូមជម្រាបជាថ្មី កាលពីសប្តាហ៍មុន លោក ពូទីន បានស្នើ​ឲ្យ​​មាន​​កិច្ច​ចរចាសន្តិភាពផ្ទាល់ជាមួយអ៊ុយក្រែន នៅ​ទីក្រុង​ អ៊ីស្តង់ប៊ុល នា​ថ្ងៃទី​១៥​ខែ​ឧសភា​ ដោយ​​និយាយ​ថា ការ​ពិភាក្សា​​មិន​គួរ​ពន្យារ​ពេល​​ត​ទៅ​ទៀត​ទេ ​បន្ទាប់ពី​សង្គ្រាម​បាន​ផ្ទុះ​ឡើង​ក្នុងខែកុម្ភៈឆ្នាំ​២០២២។

លោកពូទីននិងហ្សេលេនស្គី មិនដែលជួបគ្នាផ្ទាល់ទេ ចាប់តាំងពីខែធ្នូឆ្នាំ២០១៩មក ប៉ុន្តែមន្ត្រីរុស្ស៊ីនិងអ៊ុយក្រែន បានធ្វើការចរចាដោយផ្ទាល់លើកចុងក្រោយក្នុងខែមីនាឆ្នាំ២០២២ នៅទីក្រុងអ៊ីស្តង់ប៊ុល ពោលគឺភ្លាមៗបន្ទាប់ពីទីក្រុងមូស្គូ បើកបើកប្រតិបត្តិការសឹកពេញទំហឹងលើប្រទេសជិតខាងរបស់ខ្លួន៕

អត្ថបទ៖ សុខ សុវណ្ណ

ចុចអាន៖ មហាអំណាចអឺរ៉ុប ប្រកូកប្រកាសឲ្យរឹតទណ្ឌកម្មរុស្ស៊ី បើពូទីន នៅតែរឹងមិនព្រមឈប់បាញ់