រុស្ស៊ី៖ សង្គ្រាមត្រូវចប់តាំងពីដំបូងមកម្ល៉េះ តែអ៊ុយក្រែន មិនព្រមចរចាសោះ!

ក្រោយការចរចារយៈពេលជិត២ម៉ោងរវាងមន្ត្រីរុស្ស៊ីនិងអ៊ុយក្រែន នៅប្រទេសតួកគីកាលពីថ្ងៃសុក្រទី១៦ខែឧសភា បានបិទបញ្ចប់ ​ប្រមុខគណៈប្រតិភូទីក្រុងមូស្គូលោក Vladimir Medinsky  បានប្រាប់ទៅទូរទស្សន៍ Rossiya 1 ថា ​តាមពិតទៅភ្លើងសង្គ្រាមនេះ ត្រូវរលត់តាំងតែពីប៉ុន្មានសប្តាហ៍ដំបូងមកម្ល៉េះ ប៉ុន្តែខាងទីក្រុងកៀវ មិនព្រមចរចាសោះ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, លោក Medinsky និយាយថា មកទល់ពេលនេះសង្គ្រាមបានអូសបន្លាយពេលអស់ជាង៣ឆ្នាំមកហើយ ប៉ុន្តែក្រោយពេលជម្លោះផ្ទុះឡើងបានប៉ុន្មានសប្តាហ៍ បើអ៊ុយក្រែនឯកភាពលើកិច្ចព្រមព្រៀងក្នុងការពិភាក្សាដំបូងនៅទីក្រុង Gomel នៃប្រទេសបេឡារុស កាលពីចុងខែកុម្ភៈ ម្ល៉េះអរិភាពក៏មិនបន្តមកដល់ពេលនេះដែរ។

លោកបន្តថា កិច្ចព្រមព្រៀងនោះនៅតែរក្សារហូតដល់ជំនួបម្តងទៀតនៅទីក្រុងអ៊ីស្តង់ប៊ុលនៃប្រទេសតួកគី ក្នុងឆ្នាំ២០២២ ប៉ុន្តែអ៊ុយក្រែននៅតែមិនព្រមព្រោះតែពួកគេជឿលោកខាងលិចដូចជាចក្រភពអង់គ្លេ​ស បារាំង អ៊ីតាលី និងអាល្លឺម៉ង់ ជាពិសេសអតីតនាយករដ្ឋមន្ត្រីអង់គ្លេស Boris Johnson តែម្តង។

សូមជម្រាបថា ដ្បិតគ្មានការបំបែកស្ថានការណ៍តានតឹងរវាងរុស្ស៊ីនិងអ៊ុយក្រែនក៏ដោយ ប៉ុន្តែជំនួបនៅទីក្រុងអ៊ីស្តង់ប៊ុលកាលពីថ្ងៃសុក្រ បានទទួលលទ្ធផលធំមួយ នោះគឺការដោះដូរឈ្លើយសឹកម្ខាង១ ០០០នាក់។

ជំនួបទ្វេភាគីដោយមានការសម្របសម្រួលពីសំណាក់ប្រទេសតួកគីនេះ គឺជាកិច្ចប្រជុំលើកដំបូងបន្ទាប់ពីភាគីទាំងលែងនិយាយរកគ្នាជាង៣ឆ្នាំមកហើយ ចាប់ពីខែមីនាឆ្នាំ២០២២មក៕

អត្ថបទ៖​ សុខ សុវណ្ណ

ចុចអាន៖ ​រុស្ស៊ី​ទាមទារ​​​​អ៊ុយក្រែន​ដក​ទ័ព​ចេញ​ពីខេត្តទាំង៤​ដែលរុស្ស៊ីកាន់កាប់​ ខណៈ​ហ្សេលេនស្គី​​ឲ្យបស្ចឹមប្រទេស​បន្តជួយ​