អ៊ីរ៉ង​បញ្ជាក់​ថា​នឹង​បន្ត​ចម្រាញ់​អ៊ុយរ៉ាញ៉ូម ទោះ​ធ្វើ​កិច្ចព្រមព្រៀង​ក៏​ដោយ

រដ្ឋមន្ត្រីការបរទេសអ៊ីរ៉ង់ លោក Abbas Araghchi កាល​ពី​ថ្ងៃ​អាទិត្យ​ទី​១៨​ឧសភា បានអះអាងជាថ្មីនូវការប្តេជ្ញាចិត្ត​របស់​ទីក្រុង​តេហេរ៉ង់ ចំពោះកម្មវិធីចម្រាញ់សារធាតុអ៊ុយរ៉ាញ៉ូម ដោយបញ្ជាក់យ៉ាងច្បាស់ថា អ៊ីរ៉ង់នឹងបន្តធ្វើ​បែប​នេះ​ទៀត «ទោះ​មានឬគ្មានកិច្ចព្រមព្រៀង» ជាមួយមហាអំណាចពិភពលោក​ក៏​ដោយ។ សេចក្តីប្រកាសនេះ កើតឡើងចំពេល​​ដែល​ការចរចាដោយប្រយោល​​​​កំពុងបន្តជាមួយសហរដ្ឋអាមេរិក ដោយ​មាន​ប្រទេស​អូម៉ង់​ជា​អ្នក​សម្របសម្រួល ក្នុងគោលបំណងឈានដល់កិច្ចព្រមព្រៀងនុយក្លេអ៊ែរថ្មីមួយ។

លោក Araghchi បានសង្កត់ធ្ងន់ថា «ប្រសិនបើសហរដ្ឋអាមេរិកចាប់អារម្មណ៍ក្នុងការធានាថាអ៊ីរ៉ង់នឹងមិនមានអាវុធនុយក្លេអែរ កិច្ចព្រមព្រៀង​គឺអាចសម្រេច​ទៅ​បាន ហើយយើងត្រៀមខ្លួនសម្រាប់ការសន្ទនាដ៏ម៉ត់ចត់​​ដើម្បីសម្រេចបាននូវដំណោះស្រាយដែលនឹងធានានូវលទ្ធផល​យូរ​អង្វែង»។ លោក​បាន​បន្ត​ថា​៖ «​ទោះ​ជា​យ៉ាង​ណា​ ការ​ចម្រាញ់​(អ៊ុយរ៉ាញ៉ូម)នៅ​ក្នុង​ប្រទេស​អ៊ីរ៉ង់​នឹង​បន្ត​ទោះ​មាន​​ឬ​​ក៏​គ្មាន​កិច្ច​ព្រម​ព្រៀង​​ក៏​ដោយ»។

ផ្ទុយទៅវិញ បេសកជនពិសេសរបស់សហរដ្ឋអាមេរិក លោក Steve Witkoff ដែលដឹកនាំភាគីអាមេរិកក្នុងការចរចា បានរំលឹកឡើងវិញថា កិច្ចព្រមព្រៀងណាមួយត្រូវតែរួមបញ្ចូលការប្តេជ្ញាចិត្តរបស់អ៊ីរ៉ង់ក្នុងការបញ្ឈប់ការចម្រាញ់សារធាតុអ៊ុយរ៉ាញ៉ូម។ លោក​បាន​ពណ៌នា​បញ្ហា​នេះ​ថា​ជា«​បន្ទាត់​ក្រហម»​សម្រាប់​​​អាមេរិក ដោយ​លើក​ឡើង​ពី​ការ​ព្រួយ​បារម្ភ​អំពី​សក្តានុពល​នៃ​ការ​ផលិត​សព្វាវុធ​​ប្រល័យ​លោក។ លោក Witkoff បាន​និយាយ​ថា «យើង​មិន​អាច​អនុញ្ញាត​ឲ្យ​មាន​​​សមត្ថភាព​ចម្រាញ់​(អ៊ុយរ៉ាញ៉ូម)សូម្បី​តែ​មួយ​ភាគរយ​ឡើយ»។

កាល​ពី​សប្ដាហ៍​មុន លោកប្រធានាធិបតី ដូណាល់ ត្រាំ បានប្រកាស​​​ថា អាមេរិកជិតឈានដល់កិច្ចព្រមព្រៀងនុយក្លេអ៊ែរជាមួយប្រទេសអ៊ីរ៉ង់​ហើយ ក្នុងគោលបំណងរារាំងទីក្រុង​តេហេរ៉ង់​ពីការទទួលបានអាវុធ​ប្រល័យ​​លោក។ លោក ត្រាំ បានសម្តែងសុទិដ្ឋិនិយមអំពីវឌ្ឍនភាពនៃការចរចា ដោយបញ្ជាក់ថា អ៊ីរ៉ង់​បានយល់ព្រមចំពោះលក្ខខណ្ឌដែលបានស្នើឡើង។ លោក ត្រាំ បានរំលឹកឡើងវិញថា អ៊ីរ៉ង់«មិនអាចមានអាវុធនុយក្លេអ៊ែរបានទេ» ហើយ​​បាន​ប្រាប់​ទៀត​ថា អ្នកចរចាកំពុងខិតជិតដល់ការសម្រេចកិច្ចព្រមព្រៀង​​មែនទែន​ហើយ។

ទីក្រុងតេហេរ៉ង់ បានធ្វើការចរចានុយក្លេអ៊ែរចំនួនបួនជុំ​រួច​មក​ហើយ​ជាមួយទីក្រុងវ៉ាស៊ីនតោន ដែលជាទំនាក់ទំនងកម្រិតខ្ពស់បំផុតរវាង​ប្រជាជាតិ​ទាំងពីរ គិត​ចាប់តាំងពី​អាមេរិកបានបោះបង់ចោលកិច្ចព្រមព្រៀងនុយក្លេអ៊ែរឆ្នាំ​២០១៥។

កន្លង​មក អ៊ីរ៉ង់ទទូចលើសិទ្ធិរបស់ខ្លួន ក្នុងការបង្កើនសារធាតុអ៊ុយរ៉ាញ៉ូមក្រោមសន្ធិសញ្ញាមិនរីកសាយភាយ​នុយក្លេអ៊ែរ ហើយទាមទារការបន្ធូរបន្ថយទណ្ឌកម្មជាដំណាក់កាល រួមជាមួយនឹងការធានាប្រឆាំងនឹងការដកខ្លួនពីកិច្ចព្រមព្រៀង​របស់​អាមេរិក​ជា​ឯកតោ​ភាគី​នាពេលអនាគត។

សូម​ជម្រាប​ថា បច្ចុប្បន្ន​ អ៊ីរ៉ង់បន្តបង្កើនសារធាតុអ៊ុយរ៉ាញ៉ូមរហូតដល់​ភាព​សុទ្ធ ៦០% លើសពីកម្រិតកំណត់ ៣,៦៧% ដែល​ធ្លាប់​ចែង​នៅ​ក្នុង​កិច្ច​ព្រមព្រៀង​នុយក្លេអ៊ែរ​ឆ្នាំ​២០១៥ (JCPOA)។ ទីភ្នាក់ងារ​ថាមពល​អាតូមិក​អន្តរជាតិ បាន​ព្រមាន​ថា អ៊ីរ៉ង់​អាច​ឈាន​ទៅ​ដល់​ការ​បន្សុទ្ធ​សារធាតុ​អ៊ុយរ៉ាញ៉ូម​​យ៉ាង​លឿន​ដល់​កម្រិត ៩០% ដែល​ជា​កម្រិត​អាច​ផលិត​អាវុធ​ប្រល័យ​លោក​បាន៕

ដោយ៖ ឈាង

ចុចអាន៖ ត្រាំ៖ អាមេរិក​ជិត​សម្រេច​បាន​កិច្ចព្រមព្រៀង​នុយក្លេអ៊ែរ​ជាមួយ​អ៊ីរ៉ង់​មែនទែន​ហើយ