របៀបវារៈសំខាន់បំផុត ២ នឹងត្រូវពិភាក្សា ក្នុងដំណើរទស្សនកិច្ចផ្លូវរដ្ឋលើកដំបូងរបស់ Macron នៅ វៀតណាម

ចាប់ពីថ្ងៃទី២៥ដល់២៧ខែឧសភាខាងមុខនេះ ប្រធានាធិបតីបារាំង Emmanuel Macron នឹងបំពេញទស្សនកិច្ចផ្លូវរដ្ឋលើកដំបូងនៅប្រទេសវៀតណាម ដោយក្នុងនោះលោកនឹងពិភាក្សាលើបញ្ហាមួយចំនួន ប៉ុន្តែក្នុងនោះមានរបៀបវារៈសំខាន់ចំនួន២ដែលត្រូវលើកឡើង មួយគឺវិស័យហេដ្ឋារចនាសម្ព័ន្ធនិងមួយទៀតគឺ ថាមពល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Reuters, លោក Macron នឹងមកបំពេញទស្សនកិច្ចផ្លូវរដ្ឋជាមួយភរិយា តបតាមការអញ្ជើញរបស់ប្រធានាធិបតីវៀតណាម Luong Cuong។

ក្នុងអំឡុងពេលនោះ លោក Macron នឹងពិភាក្សាជាមួយភាគីវៀតណាម អំពីការជំនួសផ្កាយរណបអង្កេតផែនដីដែលផលិតដោយក្រុមហ៊ុន Airbus ឆ្នាំ២០១៣ និងការសហការលើថាមពលកកើតឡើងវិញ តាមរយៈភាពជាដៃគូផ្លាស់ប្តូរថាមពលដែលគាំទ្រដោយសហភាពអឺរ៉ុប។

ទន្ទឹមនោះ ដ្បិតថាកិច្ចព្រមព្រៀងនុយក្លេអ៊ែរទំនងជាមិនត្រូវបានឈានដល់ក៏ដោយ ប៉ុន្តែប្រធានបទនេះក៏ប្រហែលស្ថិតក្នុងរបៀបវារៈដែរ ព្រោះថា វៀតណាមកំពុងព្យាយាមស្តារកម្មវិធីនុយក្លេអ៊ែររបស់ខ្លួនឡើងវិញ ដើម្បីបំពេញតម្រូវការថាមពលដែលកើនឡើងខ្លាំង។

ក្រៅពីរបៀបវារៈសំខាន់ៗខាងលើ បារាំង-វៀតណាម ក៏នឹងពិភាក្សាផងដែរលើរបៀបវារៈផ្សេងៗទៀតដូចជាគម្រោងរថភ្លើងល្បឿនលឿន, ទំនាក់ទំនងសេដ្ឋកិច្ចនិងពាណិជ្ជកម្ម, កិច្ចសហប្រតិបត្តិការការពារជាតិនិងសន្តិសុខ, វិស័យអប់រំនិងការផ្លាស់ប្តូរវប្បធម៌គ្នា ព្រមទាំងគំនិតផ្តួចផ្តើមលើបញ្ហាបម្រែបម្រួលអាកាសធាតុនិងបរិស្ថាន។

សូមជម្រាបជាថ្មី បារាំងគឺជាដៃគូពាណិជ្ជកម្មអឺរ៉ុបធំជាងគេទីប្រាំរបស់វៀតណាម ដោយនៅឆ្នាំ២០២៤ ពាណិជ្ជកម្មទ្វេភាគី បានឈានដល់ ៥.៤២ ពាន់លានដុល្លារអាមេរិក ពោលគឺកើនឡើង១២,៩% ពី ៤.៨១ពាន់លានដុល្លារ ក្នុងឆ្នាំ២០២៣។

លើសពីនេះ បារាំងស្ថិតនៅចំណាត់ថ្នាក់លេខ១៦ក្នុងចំណោមប្រទេសនិងដែនដីទាំង១៤៧ ដែលវិនិយោគក្នុងប្រទេសវៀតណាម ដោយមានគម្រោងវិនិយោគចំនួន៧០០ ដែលមានទុនចុះបញ្ជីសរុប ៣.៩៥ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ Macron នឹងបំពេញទស្សនកិច្ចប្រទេសវៀតណាម ជាលើកដំបូង នៅចុងសប្តាហ៍នេះ