រដ្ឋបាល ត្រាំ ហាមឃាត់សាកលវិទ្យាល័យ Harvard ពីការចុះឈ្មោះនិស្សិតបរទេស

ជាវិធានការក្តៅថ្មីទៀតលើសាកលវិទ្យាល័យ Harvard, ពេលនេះ រដ្ឋបាលលោក ដូណាល់ ត្រាំ ​បានសម្រេចដកអាជ្ញាប័ណ្ណ Student and Exchange Visitor Program (SEVP) របស់សាកលវិទ្យាល័យនេះ ដូច្នេះមានន័យថា Harvard លែងអាចទទួលចុះឈ្មោះនិស្សិតបរទេសបានទៀតហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីប្រកាសនេះគឺចេញដោយក្រសួងសន្តិសុខមាតុភូមិ ហើយចំណាត់ការនេះ បង្ខំឲ្យនិស្សិតរាប់ពាន់នាក់ ត្រូវផ្ទេរចេញ បើមិនដូច្នោះទេនឹងប្រឈមហានិភ័យបាត់បង់ឋានៈស្របច្បាប់របស់ពួកគេ ជាក់ជាមិនខានឡើយ។ យ៉ាងណាសាកលវិទ្យាល័យ Harvard បានបញ្ចេញប្រតិកម្មខ្លាំង ដោយចាត់ទុកវាជារឿងខុសច្បាប់ហើយថែមទាំងព្រមានសងសឹកទៀតផង។

ហេតុផលនៅពីក្រោយការសម្រេចចិត្តនេះ ត្រូវបានរដ្ឋមន្ត្រីសន្តិសុខមាតុភូមិលោកស្រី Kristi Noem អះអាងថា គឺដោយសារសាកលវិទ្យាល័យ Harvard ញុះញង់ឲ្យមានអំពើហិង្សានិងការប្រឆាំងជនជាតិជ្វីហ្វ។

រឿងនេះកើតឡើង បន្ទាប់ពីសាកលវិទ្យាល័យ Harvard មិនព្រមធ្វើតាមសំណើរបស់លោកស្រី Noem ដែលសុំឲ្យផ្តល់ព័ត៌មានលម្អិតអំពីអ្នកកាន់ទិដ្ឋាការនិស្សិតបរទេសមួយចំនួនដែលចូលរៀននៅសាកលវិទ្យាល័យនេះ។

ទោះបីជាយ៉ាងណាក៏ដោយសាកលវិទ្យាល័យ Harvard បានទាត់ចោលការចោទប្រកាន់ទាំងនេះ ហើយប្តេជ្ញាគាំទ្រនិស្សិតបរទេសយ៉ាងពេញទំហឹង។

សូមជម្រាបថា នេះគឺជាយុទ្ធនាការដាក់សម្ពាធខ្លាំងបំផុតជាថ្មីរបស់លោក ត្រាំ លើសាកលវិទ្យាល័យ Harvard បន្ទាប់ពីរដ្ឋបាលទីក្រុងវ៉ាស៊ីនតោន ផ្តាច់ជំនួយ២លើកមកហើយចំពោះសាកលវិទ្យាល័យចាស់ជាងគេនិងមានកិត្យានុភាពបំផុតរបស់អាមេរិកមួយនេះ។

នេះបើយោងតាមស្ថិតិរបស់សាកលវិទ្យាល័យនេះ, Harvard បានចុះឈ្មោះនិស្សិតអន្តរជាតិជិត ៦ ៨០០នាក់ក្នុងឆ្នាំសិក្សា២០២៤-២០២៥ ពោលគឺស្មើនឹង២៧% នៃការចុះឈ្មោះចូលរៀនសរុបរបស់ខ្លួន៕

អត្ថបទ៖ សុខ សុវណ្ណ

ចុចអាន៖ សាកលវិទ្យាធិការ Harvard លាលែងពីតំណែង ចំពេលរឿងអាស្រូវលួច​ចម្លងស្នាដៃសិក្សា