ត្រាំ ព្រមានថា ពូទីន កំពុងលេងជាមួយភ្លើង!

ស្របពេលកំពុងខឹងចិត្តចំពោះប្រធានាធិបតីរុស្ស៊ី វ្ល៉ាឌីមៀរ ពូទីន ដែលមិនព្រមបន្ថយដៃនៅតែបាញ់ខ្លាំងឡើងៗទូទាំងប្រទេសអ៊ុយក្រែននោះ ប្រមុខសេតវិមាន ដូណាល់ ត្រាំ បាននិយាយថា មេដឹកនាំវិមានក្រឹមឡាំង កំពុងលេងជាមួយភ្លើងហើយ!

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារខ្លីបង្ហោះលើបណ្តាញសង្គម Truth Social កាលពីថ្ងៃអង្គារទី២៧ខែឧសភាឆ្នាំ២០២៥ មេដឹកនាំសេតវិមានសរសេរថា «អ្វីដែលលោក វ្ល៉ាឌីមៀរ ពូទីន មិនដឹងនោះគឺថា ប្រសិនបើគ្មានខ្ញុំទេ មានរឿងអាក្រក់ច្រើនណាស់នឹងកើតឡើងចំពោះរុស្ស៊ី។ ខ្ញុំមានន័យថា ពិតជាអាក្រក់ខ្លាំងមែនទែន។ គាត់កំពុងលេងជាមួយភ្លើងហើយ!»។

ដ្បិតតែគេមិនដឹងថាតើប្រធានាធិបតីអាមេរិកចង់សំដៅន័យនេះទៅលើអ្វី ប៉ុន្តែអ្វីដែលគេដឹងគឺថា ត្រាំ កំពុងក្តៅស្លឹកត្រចៀកនឹងលោកពូទីន ដោយហៅថា ជាមនុស្សឆ្កួត ជុំវិញការបាញ់សន្ធាប់គ្មានលស់ថ្ងៃលើអ៊ុយក្រែន ដែលបានឆក់យកជីវិតជនស៊ីលស្លូតត្រង់ជាបន្តបន្ទាប់។

លោកត្រាំ ថែមទាំងគំរាមប្រើធម៌ក្តៅតាមរយៈការដាក់ទណ្ឌកម្មថ្មី ដែលនឹងធ្វើឲ្យពូទីន ភ្ញាក់ផ្អើលបំផុតផងដែរ។ មិនត្រឹមប៉ុណ្ណឹង ត្រាំ បានបញ្ជាក់យ៉ាងច្បាស់ហើយថា ប្រសិនបើ ពូទីន ចង់លេបយកប្រទេសអ៊ុយក្រែនទាំងមូលមែននោះ រុស្ស៊ីនឹងដួលរលំ ជាក់ជាមិនខាន។

សូមជម្រាបថា ​តាំងពីលោក ត្រាំ ​ចូលកាន់​អំណាចជាប្រធានាធិបតីអាមេរិកអាណត្តិទី២មក អ្នកសាធារណរដ្ឋរូបនេះ បាន​បើ​កផ្លូវ​ឲ្យស្តារ​ទំនាក់​ទំនង​ការ​ទូត​ជាមួយ​រុស្ស៊ី​ឡើងវិញ ដើម្បី​បន្ត​ដំណើរ​ទៅរកដំណោះស្រាយ​​ជម្លោះ​នៅអ៊ុយក្រែន​។

​ក្រោយមក គេឃើញថា ទំនាក់ទំនងរវាងប្រទេសទាំងពីរហាក់ស្អិតរមួតជាងមុនខ្លាំង ខុសពីសម័យលោក ចូ បៃដិន ដែលរុស្ស៊ី-អាមេរិកមិននិយាយរកគ្នាសោះ។

ទោះបីជាយ៉ាងណាក៏ដោយ មួយរយៈចុងក្រោយនេះ លោកត្រាំ កាន់តែឈឺក្បាលជាមួយពូទីន ព្រោះតែការខិតខំរបស់ខ្លួនក្នុងការចាប់ដៃជាមួយរុស្ស៊ី លើការដោះស្រាយបញ្ហានានាមិនបានរលូនដូចការគិតទុក៕

អត្ថបទ៖ សុខ សុវណ្ណ

ចុចអាន៖ ត្រាំ ប្រហែលលែងជួយបញ្ចប់សង្គ្រាមរុស្ស៊ី-អ៊ុយក្រែន ទៀតហើយ ព្រោះខំដែរតែមិនបានផល