កូរ៉េ​ខាងជើង​ ចាត់ទុក​ «Golden Dome» របស់​អាមេរិក​ ​ជា​ការគំរាមកំហែង​អវកាស​ដ៏​គ្រោះថ្នាក់​

ប្រទេសកូរ៉េខាងជើងរិះគន់យ៉ាងខ្លាំងទៅលើប្រព័ន្ធការពារមីស៊ីល «Golden Dome» របស់សហរដ្ឋអាមេរិក ដោយបាន​ហៅ​វាថាជាគំនិតផ្តួចផ្តើមដ៏​គ្រោះថ្នាក់​បំផុត​​ ដែលអាចបង្កឱ្យមានការ​រត់ប្រណាំង​អាវុធនុយក្លេអ៊ែរនៅលំហអាកាស។

ការកត់សម្គាល់នេះបានចេញផ្សាយតាមរយៈប្រព័ន្ធផ្សព្វផ្សាយរដ្ឋ KCNA របស់កូរ៉េខាងជើង នៅថ្ងៃទី២៧ ឧសភា ដែលបាន​កើតឡើងប៉ុន្មានថ្ងៃ បន្ទាប់ពីលោកប្រធានាធិបតីសហរដ្ឋអាមេរិក លោក ​​​ដូណាល់ ត្រាំ បាន​ប្រកាសផ្តល់មូលនិធិ និង​ព័ត៌មានលម្អិតថ្មីចំពោះខែលមីស៊ីលដែលមានមូលដ្ឋានលើលំហអាកាស​​។

ក្រសួងការបរទេសរបស់ទីក្រុងព្យុងយ៉ាង បានចោទប្រកាន់ទីក្រុងវ៉ាស៊ីនតោនពីការកើនឡើងនៃភាពតានតឹងដោយការធ្វើយោធា​លើលំហអាកាស និងគំរាមកំហែងដល់តុល្យភាពយុទ្ធសាស្ត្ររវាងមហាអំណាចនុយក្លេអ៊ែរ។ ក្រសួង​ការបរទេស​កូរ៉េ​​ និយាយ​ថា៖«ផែនការរបស់សហរដ្ឋអាមេរិកគឺជាមូលហេតុដើមចមដែលជំរុញឱ្យមានការប្រកួតប្រជែងអាវុធ​នុយក្លេអ៊ែរ និងអវកាសជាសកល»។

ក្រុមអ្នកវិភាគនិយាយថា ប្រទេសកូរ៉េខាងជើងចាត់ទុក «Golden Dome »ជាការគំរាមកំហែងដោយផ្ទាល់ចំពោះប្រសិទ្ធភាពនៃឃ្លាំងអាវុធនុយក្លេអ៊ែររបស់ខ្លួន ជាពិសេសមីស៊ីលផ្លោងអន្តរទ្វីប (ICBMs)។ ប្រសិនបើត្រូវបានដាក់ពង្រាយ អ្នកជំនាញជឿថា ប្រព័ន្ធនេះអាចជំរុញឱ្យទីក្រុងព្យុងយ៉ាង បន្តស្វែងរកមធ្យោបាយទំនើបបន្ថែមទៀត ដើម្បីជ្រៀតចូល ឬគេចពីប្រព័ន្ធការពារមីស៊ីល។

ជាមួយគ្នានេះប្រទេស​ចិន​បាន​បន្ទរ​ក្តី​បារម្ភ​ស្រដៀង​គ្នា​នេះដែរ ដោយ​ព្រមាន​គំនិត​ផ្តួចផ្តើម​នេះ​បំផ្លាញ​ស្ថិរភាព​ពិភពលោក។ រុស្ស៊ីក៏បានសម្តែងការប្រឆាំងផងដែរ និងអំពាវនាវឱ្យមានការពិគ្រោះយោបល់។

គួរបញ្ជាក់ថា Golden Dome ដែលដាក់ឈ្មោះតាមប្រព័ន្ធ Iron Dome របស់អ៊ីស្រាអែល នឹងប្រើសម្រាប់ស្ទាក់ចាប់គ្រាប់មីស៊ីលចម្ងាយខ្លីមានគោលបំណងការពារសហរដ្ឋអាមេរិកប្រឆាំងនឹងការគំរាមកំហែងចម្ងាយឆ្ងាយ។ ទោះជាយ៉ាងណាក៏ដោយ អ្នកវិភាគកត់សម្គាល់ប្រព័ន្ធនេះប្រឈមមុខនឹងបញ្ហាបច្ចេកទេស ហិរញ្ញវត្ថុ និងនយោបាយធំៗ មុនពេលដំណើរការបាន៕

អត្ថបទ៖ ប៊ុន សុភាព