រុស្ស៊ី បង្ហាញសមាសភាពគណៈប្រតិភូ សម្រាប់ការចរចាសន្តិភាពថ្មី ជាមួយអ៊ុយក្រែន

កាលពីថ្ងៃព្រហស្បតិ៍ទី២៩ខែឧសភាឆ្នាំ២០២៥ រដ្ឋមន្ត្រីការបរទេសរុស្ស៊ី Sergey Lavrov បានកំណត់យកថ្ងៃចន្ទទី២ខែមិថុនា ជាកាលបរិច្ឆេទសម្រាប់កិច្ចចរចាសន្តិភាពថ្មីជាមួយអ៊ុយក្រែន ហើយឥឡូវនេះ ទីក្រុងមូស្គូ ក៏ប្រកាសពីសមាសភាពនៃគណៈប្រតិភូរបស់ខ្លួនសម្រាប់ជំនួបនោះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, គណៈប្រតិភូរុស្ស៊ីសម្រាប់កិច្ចពិភាក្សាថ្មីនេះគឺនៅតែជាគណៈប្រតិភូដឹកនាំដោយលោក Vladimir Medinsky ដែលជាជំនួយការប្រធានាធិបតីវ្ល៉ាឌីមៀរ ពូទីន ដដែល។

អ្នកនាំពាក្យក្រសួងការបរទេសលោកស្រី Maria Zakharova បានឲ្យដឹងថា លោក Medinsky នឹងនៅតែដឹកនាំគណៈប្រតិភូដូចមុនអ៊ីចឹងដែរ សម្រាប់កិច្ចពិភាក្សាដោយផ្ទាល់ថ្មីនៅដើមខែក្រោយនេះ។

សម្រាប់ទីតាំងវិញ ជំនួបលើកនេះក៏រៀបចំឡើងនៅទីក្រុងអ៊ីស្តង់ប៊ុលនៃប្រទេសតួកគី ដូចទៅនឹងកិច្ចចរចាកាលពីថ្ងៃទី១៦ខែឧសភា ផងដែរ។

កាលនោះ គណៈប្រតិភូរុស្ស៊ី-អ៊ុយក្រែន បានចាយពេលជិត២ម៉ោង ប៉ុន្តែមិនទទួលបានលទ្ធផលគាប់ប្រសើរ ក្នុងការឈានដល់បញ្ចប់សង្គ្រាមនោះទេ ប៉ុន្តែភាគីទាំងពីរក៏បានសម្រេចលទ្ធផលគួរឲ្យកត់សម្គាល់មួយផងដែរ នោះគឺ ​ការ​ឯកភាពដោះដូរឈ្លើយសឹកគ្នា​​​ម្ខាង ​១ ០០០​​នាក់។

យ៉ាងណា ជុំវិញការចរចាថ្មីនេះ រដ្ឋមន្ត្រីការពារជាតិអ៊ុយក្រែន Rustem Umerov បានបង្ហោះសារលើបណ្តាញសង្គម X ថា «ខ្ញុំបានប្រគល់រួចអស់ហើយ នូវឯកសាររបស់យើងទៅឲ្យប្រធានគណៈប្រតិភូរុស្ស៊ី ដែលឆ្លុះបញ្ចាំងពីជំហររបស់អ៊ុយក្រែន ហើយពួកគេក៏បានទទួលឯកសារនេះរួចហើយដែរ។ យើងមិនជំទាស់នឹងកិច្ចប្រជុំថ្មីៗជាមួយរុស្ស៊ីទេ ហើយកំពុងរង់ចាំមើលការឆ្លើយតបរបស់ពួកគេដូចគ្នា។ ធ្វើដូច្នេះ ទើបកិច្ចប្រជុំបន្ទាប់នឹងទទួលបានផ្លែផ្កា ហើយពិតជាអាចជំរុញយើងឲ្យកាន់តែខិតជិតរកការបញ្ចប់សង្គ្រាមបាន»។

ទោះបីជាយ៉ាងណាក៏ដោយ លោក Umerov បញ្ជាក់ម្តងទៀតថា អ៊ុយក្រែនបានត្រៀមខ្លួនរួចជាស្រេចសម្រាប់បទឈប់បាញ់ដោយគ្មានលក្ខខណ្ឌ ប៉ុន្តែទីក្រុងកៀវ ​មិន​ទាន់​បាន​ទទួលសំណើរបស់​រុស្ស៊ី​នៅ​ឡើយ​ទេ និងថែមទាំង​ចោទទី​ក្រុងមូស្គូ​ថា ​ព្យាយាម​ពន្យារ​ការ​ចរចាទៀតផង៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន ដាក់លក្ខខណ្ឌបទឈប់បាញ់ ជូនទៅរុស្ស៊ី រួចហើយ