ហ្សេលេនស្គី គាំទ្រ​សំណើ​តួកគី សម្រាប់​កិច្ចប្រជុំបួនភាគី​ជាមួយ ត្រាំ និង ពូទីន

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានបង្ហាញការគាំទ្រចំពោះសំណើរបស់សមភាគី​តួកគី លោក Recep Tayyip Erdoğan ក្នុងការកោះប្រជុំកំពូលដែលមានការចូលរួមពី​ប្រធានាធិបតីរុស្ស៊ី វ៉្លាឌីមៀរ ពូទីន និងប្រធានាធិបតីអាមេរិក ដូណាល់ ត្រាំ។ គំនិតផ្តួចផ្តើមនេះ មានគោលបំណងជំរុញការចរចាសន្តិភាពចំពេលមានជម្លោះដែលកំពុងបន្តរវាងអ៊ុយក្រែន និងរុស្ស៊ី។

លោក Erdoğan បាន​​បញ្ជាក់​ថា ទីក្រុងអ៊ីស្តង់ប៊ុល ឬទីក្រុងអង់ការ៉ា ត្រៀម​​បម្រើជា«មជ្ឈមណ្ឌលសន្តិភាព» សម្រាប់​មេដឹកនាំទាំងបី។ លោក​បានសង្កត់ធ្ងន់លើការប្តេជ្ញាចិត្តរបស់តួកគី ក្នុងការសម្របសម្រួលកិច្ចសន្ទនា ដោយនិយាយថា «បំណងប្រាថ្នាដ៏ធំបំផុតរបស់ខ្ញុំគឺនាំពូទីន​និង​ហ្សេលេនស្គី មកជាមួយគ្នានៅទីក្រុងអ៊ីស្តង់ប៊ុល ឬទីក្រុងអង់ការ៉ា។ ខ្ញុំថែមទាំងចង់នាំលោក ត្រាំ មកជាមួយផងដែរ»។

ប្រធានាធិបតី ហ្សេលេនស្គី បានស្វាគមន៍គំនិតផ្តួចផ្តើមរបស់តួកគី ដោយបង្ហាញពីការត្រៀមខ្លួនរបស់គាត់ក្នុងការចូលរួមក្នុងកិច្ចប្រជុំកំពូលបែបនេះ។ លោកបានគូសបញ្ជាក់អំពីសារៈសំខាន់នៃការចូលរួមដោយផ្ទាល់នៅកម្រិតខ្ពស់បំផុត ដើម្បីដោះស្រាយបញ្ហាស្នូលដែល​បង្ក​ឲ្យ​​មានជម្លោះ។

សេតវិមានបានបញ្ជាក់ថា លោកប្រធានាធិបតី ត្រាំ បើកចំហចំពោះលទ្ធភាពនៃការចូលរួមកិច្ចប្រជុំដែលបានស្នើឡើង។ អ្នក​នាំ​ពាក្យ​សេតវិមាន​លោកស្រី Karoline Leavitt បាន​លើក​ឡើង​ថា «ប្រធានាធិបតីបាននិយាយថា គាត់បើកចំហចំពោះវាប្រសិនបើវាមកដល់នោះប៉ុន្តែគាត់ចង់​ឲ្យមេដឹកនាំទាំងពីរនិងភាគីទាំងពីរមក​អង្គុយ​តុជាមួយគ្នា»។

សូម​ជម្រាប​ថា ជំនួបទល់មុខលើកទី២​កាល​ពី​ថ្ងៃ​ទី​២​ខែ​មិថុនា​រវាងគណៈប្រតិភូរុស្ស៊ីនិងអ៊ុយក្រែននៅទីក្រុងអ៊ីស្តង់ប៊ុលនៃប្រទេសតួកគី បានបញ្ចប់ដោយគ្មានការសម្រេចកិច្ចព្រមព្រៀងសន្តិភាពឡើយ។ ប៉ុន្តែភាគីទាំងសងខាង ឯកភាពគ្នាលើ២ចំណុច នោះគឺការដោះដូរឈ្លើយសឹកទ្រង់ទ្រាយធំ និងការប្រគល់សពទាហានដើម្បីយកទៅបញ្ចុះឲ្យបានសមរម្យ៕

ដោយ៖ ឈាង

ចុចអាន៖ កិច្ចប្រជុំរុស្ស៊ី-អ៊ុយក្រែន នៅតែមិនអាចរកសន្តិភាពបាន ប៉ុន្តែសម្រេចលើ ២ចំណុច