ទឹកជំនន់ និងបំណាក់ដីធ្ងន់ធ្ងរ នៅភាគឦសាននៃប្រទេសឥណ្ឌា និងបង់ក្លាដែស សម្លាប់មនុស្ស​៣៤នាក់

ក្នុងរយៈពេលប៉ុន្មានថ្ងៃថ្មីៗនេះ ទឹកជំនន់ធ្ងន់ធ្ងរ និងបំណាក់ដីបង្កឡើងដោយភ្លៀងធ្លាក់ខ្លាំងបានឆក់យកជីវិតមនុស្សយ៉ាងហោចណាស់ ៣៤ នាក់ នៅក្នុងរដ្ឋភាគឦសាននៃប្រទេសឥណ្ឌា និងក្នុងប្រទេសជិតខាងបង់ក្លាដែស។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ Reuters នៅថ្ងៃទី០៣ខែមិថុនានេះ។

តំបន់ដែលរងផលប៉ះពាល់ខ្លាំងជាងគេរួមមានរដ្ឋ Sikkim, Meghalaya និង Assam ក្នុងប្រទេសឥណ្ឌា និងទីក្រុង Sylhet ក្នុងប្រទេសបង់ក្លាដែស។ អ្នកទេសចរជាងមួយពាន់នាក់ត្រូវបានជាប់គាំងនៅក្នុងរដ្ឋ Sikkim ខណៈពេលដែល​កិច្ចខិតខំប្រឹងប្រែងជួយសង្គ្រោះនៅតែបន្តជម្លៀសមនុស្សជាង ៥០០នាក់ចេញពីតំបន់លិចទឹកនៅរដ្ឋ Meghalaya ។

ចំណែកនៅប្រទេសបង់ក្លាដែស ការបាក់ដីនៅទីក្រុង Sylhet បានសម្លាប់សមាជិកបួននាក់នៃគ្រួសារមួយ ហើយអាជ្ញាធរបានបើកជម្រកសង្គ្រោះបន្ទាន់រាប់រយកន្លែងនៅក្នុងស្រុកភ្នំដូចជា Rangamati, Bandarban និង Khagrachhari ។ ក្រសួង​ធនធានទឹក និង​ឧតុនិយម បាន​អំពាវនាវ​ឲ្យ​ប្រជាពលរដ្ឋ​បន្ត​ប្រុងប្រយ័ត្ន ចំពោះ​ហានិភ័យ​នៃ​ការ​បាក់​ដី និង​ទឹកជំនន់​ភ្លាមៗ​ផងដែរ។

ភ្លៀងមូសុងប្រចាំឆ្នាំតែងតែនាំមកនូវការបំផ្លិចបំផ្លាញយ៉ាងទូលំទូលាយដល់តំបន់ទាំងនេះ បំផ្លាញផ្ទះសម្បែង ទឹកជន់លិចផ្លូវ និងរំខានដល់ការរស់នៅប្រចាំថ្ងៃ។ ផលប៉ះពាល់មានសភាពធ្ងន់ធ្ងរនៅកន្លែងដូចជាទីក្រុង Silchar ក្នុងរដ្ឋ Assam ដែលអ្នកស្រុក រួមទាំងគ្រួសារដែលមានកូន តស៊ូដើម្បីទប់ទល់នឹងផ្ទះលិចទឹក ខណៈការផ្តល់ជំនួយសង្គ្រោះមានកម្រិត។ មកដល់ពេលនេះប្រតិបត្តិការជួយសង្គ្រោះដោយកងទ័ព និងអាជ្ញាធរមូលដ្ឋានកំពុងបន្ត ចំពេលមានការព្រមានអំពីស្ថានភាពកាន់តែអាក្រក់ទៅៗ៕

អត្ថបទ៖ ប៊ុន សុភាព