ក្រុមសកម្មប្រយុទ្ធរ៉ូហ៊ីងយ៉ា​​សម្លាប់​កងទ័ព មីយ៉ាន់ម៉ា ២២ នាក់ ខណៈការតវ៉ាកំពុងបន្តទូទាំងប្រទេស

ក្រុមសកម្មប្រយុទ្ធរ៉ូហ៊ីងយ៉ាដែលមានមូលដ្ឋាននៅមីយ៉ាន់ម៉ាកាលពីថ្ងៃអង្គារអះអាងថាបានសម្លាប់ទាហានមីយ៉ាន់ម៉ា ២២ នាក់នៅក្នុងការវាយឆ្មក់ពេលព្រឹកព្រលឹមលើប៉ុស្តិ៍យោធាមួយនៅរដ្ឋរ៉ាក់ឃីនភាគខាងលិច ។

ក្រុមនេះបាននិយាយនៅក្នុងសេចក្តីថ្លែងការណ៍មួយដែលមើលឃើញដោយទីភ្នាក់ងារ Anadolu ថា “កាលពីថ្ងៃអង្គារអង្គការសាមគ្គីភាពរ៉ូហ៊ីងយ៉ា (RSO) បានវាយប្រហារទៅលើកងទ័ពមីយ៉ាន់ម៉ា នៅពេលព្រឹកចន្លោះម៉ោង ៤ និង ៣០ នាទីដល់ម៉ោង ៧ និង ០០ នាទីព្រឹកនៅលើជំរំយោធាភូមាឈ្មោះ 44-BP ដែលនាំទៅដល់ការស្លាប់កងទ័ពភូមា ២២ នាក់” ។

ពួកគេបានបើកការវាយប្រហារចេញពីទីតាំងជំរុំចំនួន ៣ ដោយកាំភ្លើងយន្តធុនធ្ងន់ ហើយមានទាហានជិត ១០០ នាក់នៅក្នុងជំរំ ខណៈដែលក្រោយមកសកម្មប្រយុទ្ធបានចាកចេញ បន្ទាប់ពីការប្រយុទ្ធគ្នារយៈពេល ២ ម៉ោង ។

មិនមានសេចក្តីថ្លែងការណ៍ផ្លូវការណាមួយអំពីឧប្បត្តិហេតុរបស់យោធានោះទេ ដោយសារតែប្រទេសនេះកំពុងប្រឈមមុខនឹងការតវ៉ាដ៏ធំប្រឆាំងនឹងរបបយោធាដែលបានសម្លាប់ក្រុមបាតុករជាង ៥០០ នាក់នៅទូទាំងប្រទេសចាប់តាំងពីថ្ងៃទី ១ ខែកុម្ភៈ ។

ទន្ទឹមនោះការអះអាងរបស់ក្រុមសកម្មប្រយុទ្ធដែលថាបានសម្លាប់ទាហាននៅរដ្ឋរ៉ាក់ឃីនដែលជាទីជម្រករបស់ជនជាតិភាគតិចមូស្លីមរ៉ូហ៊ីងយ៉ារាប់សែននាក់មិនអាចត្រូវបានផ្ទៀងផ្ទាត់ដោយឯករាជ្យដោយទីភ្នាក់ងារ Anadolu នោះទេ ។

ចាប់តាំងពីឆ្នាំ ២០១៧ មកជនជាតិរ៉ូហ៊ីងយ៉ាជាងមួយលាននាក់ដែលត្រូវបានពិពណ៌នាដោយ UN ថាជាជនជាតិភាគតិចដែលត្រូវបានគេធ្វើទុក្ខបុកម្នេញបំផុតនៅក្នុងពិភពលោកបានភៀសខ្លួនពីការបង្ក្រាបរបស់យោធាយ៉ាងឃោរឃៅរបស់មីយ៉ាន់ម៉ានៅរដ្ឋរ៉ាក់ឃីន និងបានជ្រកកោននៅប្រទេសបង់ក្លាដែសដែលនៅជិតខាង ។

សេចក្តីថ្លែងការណ៍របស់ក្រុមនេះបាននិយាយថា “RSO ចង់បានសេរីភាពនៃរដ្ឋរ៉ាក់ឃីន ហើយពួកគេបានប្តេជ្ញាចិត្តក្នុងការនាំយកជនជាតិរ៉ូហ៊ីងយ៉ាទាំងអស់ដែលបាននិរទេសខ្លួនចេញពីមាតុភូមិរបស់ពួកគេត្រឡប់មកវិញ” ។

ក្រុមនេះក៏បានប្តេជ្ញាថា ពួកគេនឹងបន្តវាយប្រហារទៅលើយោធាភូមារហូតដល់ពួកគេទទួលបានសេរីភាពពីកងទ័ព Arakan ក្នុងរដ្ឋរ៉ាក់ឃីន ហើយជនភៀសខ្លួនរ៉ូហ៊ីងយ៉ាទាំងអស់វិលត្រឡប់មកមាតុភូមិវិញ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ គ្រាប់បែកដៃនិងគ្រាប់កាំភ្លើងជាង៦,០០០គ្រាប់ ដឹកទៅ មីយ៉ាន់ម៉ា ត្រូវ ថៃ ស្ទាក់ចាប់បាន

ចុចអាន ៖ វីដេអូគួរឲ្យសង្វេគ! ជនជាតិ មីយ៉ាន់ម៉ា ភៀសខ្លួនទាំងទូកៗចូលព្រំដែនថៃ អ្នកខ្លះរបួសពេញខ្លួន