ផ្ទុះគ្រាប់បែកនៅថៃ របួសមនុស្ស១០នាក់

ការបំផ្ទុះគ្រាប់បែកបណ្តាក់គ្នា បានបណ្តាលឲ្យមនុស្សចំនួន១០នាក់រងរបួសនៅខេត្តភាគខាងត្បូងប្រទេសថៃ ដែលជាកន្លែងកើតមានអំពើហិង្សារាប់ទសវត្សរ៍មកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post, ហេតុការណ៍នេះកើតឡើងកាលពីថ្ងៃសៅរ៍ទី២១ខែមិថុនាឆ្នាំ២០២៥ ក្នុងខេត្ត Yala, Narathiwat និង Pattani។

នៅ Pattani គ្រាប់បែកបានផ្ទុះនាវេលាម៉ោងប្រហែល ៤:៤៤ព្រឹក ក្នុងប៉ុស្តិ៍សន្តិសុខមួយនៅជិតការិយាល័យទេសចរណ៍ បន្ទាប់មកក៏មានការផ្ទុះពីរលើកទៀតនៅជុំវិញតង់របស់អាជីវករនាម៉ោង៥:១៩នាទីនិង៥:៣០នាទីព្រឹក។ ការ​ផ្ទុះ​នោះ​បណ្តាលឲ្យ​មនុស្ស​ចំនួន៧​នាក់​រង​របួស (អាជីវករ​៥​នាក់ និង​មន្ត្រី​២​នាក់)។

ចំណែកនៅខេត្ត Narathiwat គ្រាប់បែកបានផ្ទុះ នាវេលាម៉ោង ៧និង២០នាទីព្រឹក ជិតអាងស្តុកទឹក ក្បែរមូលដ្ឋានកងល្បាតព្រំដែន បណ្តាលឲ្យរបួសមន្ត្រីបីនាក់ដែលកំពុងត្រួតពិនិត្យម៉ាស៊ីនបូមទឹក។

យ៉ាងណា ទន្ទឹមនោះនៅខេត្ត Yala ការផ្ទុះមិនបង្កការខូចខាតឬបណ្តាលឲ្យមានមនុស្សរងរបួសទេ។

សូមជម្រាបថា អំពើហិង្សានៅភាគខាងត្បូងប្រទេសថៃមិនថមថយឡើយ បើទោះជាមានកិច្ចប្រឹងប្រែងចរចាសន្តិភាពក៏ដោយ។ ពោលបើគិតចាប់តាំងពីឆ្នាំ២០០៤មក ជម្លោះដ៏រ៉ាំរ៉ៃនៅភាគខាងត្បូងប្រទេសថៃ បានឆក់យកជីវិតមនុស្សជាង ៧ ០០០នាក់ និងបណ្តាលឲ្យរាប់ម៉ឺននាក់ទៀតរងរបួស៕

អត្ថបទ៖ សុខ សុវណ្ណ

ចុចអាន៖ ផ្ទុះគ្រាប់បែក២គ្រាប់ នៅកណ្តាលផ្សារ ភាគខាងត្បូងប្រទេសថៃ