ចិន​​ប្រកាស​អាសន្ន​ ខណៈ​ភ្លៀង​ធ្លាក់​ខ្លាំង​បង្កជាទឹក​ជំនន់ និង​បំណាក់​ដី

យោងតាមការចេញផ្សាយរបស់សារព័ត៌មាន​Al Jazeera នៅថ្ងៃទី០៣ខែមិថុនានេះ ភាគខាងជើង និងភាគខាងលិចប្រទេសចិន នៅតែស្ថិតក្រោមការប្រកាសអាសន្នពណ៌ក្រហម ខណៈដែលភ្លៀងធ្លាក់ខ្លាំងនៅតែបន្តបោកបក់ពាសពេញប្រទេស ដោយបង្កើនហានិភ័យទឹកជំនន់ និងបំណាក់ដីសម្លាប់មនុស្សកាន់តែច្រើន។

ការព្រមាននេះចេញចំពោះតំបន់នានា រួមមានខេត្ត Gansu នៅភាគពាយ័ព្យ និងខេត្ត Liaoning នៅភាគឦសាន បន្ទាប់ពីព្យុះនាពេលថ្មីៗនេះបានបណ្តាលឱ្យមានអ្នកស្លាប់ និងរបួសជាច្រើននាក់ និងការខូចខាតយ៉ាងធ្ងន់ធ្ងរ។

នៅក្នុងខេត្ត Henan មនុស្ស ៥ នាក់បានស្លាប់ និង ៣នាក់ទៀតកំពុងបាត់ខ្លួនដោយសារទឹកទន្លេហក់ឡើងបង្កឲ្យមានការជន់លិច។ បុគ្គលិកសង្គ្រោះជាង ១,០០០ នាក់ត្រូវបានដាក់ពង្រាយដើម្បីជួយសង្គ្រោះពលរដ្ឋ។

ចំណែកនៅខេត្ត Gansu ការបាក់ដីនៅការដ្ឋានសំណង់មួយកន្លែង​បានសម្លាប់មនុស្សពីរនាក់។ លើសពីនេះក្នុងទីក្រុង Xianfeng ភាគកណ្តាលខេត្ត Hubei បានជួបប្រទះនូវភ្លៀងធ្លាក់ខ្លាំងបំផុត ដោយបរិមាណ​ទឹកភ្លៀងក្នុងរយៈពេលត្រឹមតែ ១២ម៉ោងប៉ុណ្ណោះ ស្មើ​នឹង​បរិមាណទឹក​​ភ្លៀង​ជាង​មួយ​ខែឯណោះ។

គួរបញ្ជាក់ថា ទោះបីជាប្រទេសចិនមានប្រព័ន្ធត្រួតពិនិត្យអាកាសធាតុទូទាំងប្រទេសក៏ដោយ ក៏អ្នកជំនាញនិយាយថា វានៅតែពិបាកក្នុងការទស្សន៍ទាយពីពេលវេលា និងកម្លាំងនៃព្យុះក្នុងតំបន់ ជាពិសេសនៅតំបន់ជនបទដែលមានភូមិសាស្ត្រស្មុគស្មាញ។ បម្រែបម្រួល​អាកាសធាតុ​កំពុង​ធ្វើ​ឲ្យ​បញ្ហាអាកាសធាតុកាន់តែ​ធ្ងន់ធ្ងរនិង​កាន់​តែ​មិន​អាច​ទាយទុកជាមុន​បាន។

កាល​ពី​ឆ្នាំ​មុន ភ្លៀង​ធ្លាក់​តាម​រដូវ​កាល​ស្រដៀង​គ្នា បាន​នាំ​ឲ្យ​មាន​ការ​ខាត​បង់​សេដ្ឋកិច្ច​ជាង ១០ ពាន់​លាន​ដុល្លារ​នៅ​ទូទាំង​ប្រទេសចិន៕

អត្ថបទ៖ ប៊ុន សុភាព