មនុស្សស្លាប់កើនលើស១០០នាក់ ក្នុងគ្រោះទឹកជំនន់ដ៏សាហាវ នៅរដ្ឋ តិចសាស់

មនុស្សចំនួន១០៤នាក់ ត្រូវបានបញ្ជាក់ថាស្លាប់ ក្នុងគ្រោះទឹកជំនន់ដ៏សាហាវ ដែលវាយប្រហាររដ្ឋតិចសាស់ នៃសហរដ្ឋអាមេរិក តាំងពីសប្តាហ៍មុនមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ BBC នៅថ្ងៃអង្គារទី៨ខែកក្កដាឆ្នាំ២០២៥, បានជាតួលេខហក់ឡើងខ្ពស់បែបនេះ គឺបន្ទាប់ពីមានការបញ្ជាក់ជាផ្លូវការអំពីក្មេងៗនិងមនុស្សធំចំនួន២៧នាក់ ដែលបាត់បង់ជីវិតនៅពេលទឹកជំនន់រហ័សវាយប្រហារជំរំ Mystic របស់ពួកគេ ស្ថិតនៅតាមដងទន្លេ Guadalupe ក្នុងតំបន់ Hill។

ក្រុមជួយសង្គ្រោះនិងរុករក កំពុងបន្តប្រតិបត្តិការនៅតាមតំបន់ដែលរងផលប៉ះពាល់ ខណៈក្រុមមន្ត្រីព្រមានថា ចំនួនមនុស្សស្លាប់អាចហក់ឡើងបន្តទៀត ព្រោះនៅមានមនុស្សច្រើននាក់បាត់ខ្លួន ប៉ុន្តែមិនបញ្ជាក់ច្បាស់អំពីតួលេខពិតប្រាកដនោះទេ។

ទឹកជំនន់ដ៏សាហាវនេះបង្កឡើងដោយភ្លៀងធ្លាក់យ៉ាងគំហុកដែលជាចំហាយព្យុះត្រូពិក Barry។ នៅតំបន់ខ្លះ ភ្លៀងធ្លាក់មានកម្រិតពី២៥ទៅ៥០សង់ទីម៉ែត្រឯណោះក្នុងរយៈពេលត្រឹមប៉ុន្មានម៉ោង ដែលបណ្តាលឲ្យទឹកទន្លេ Guadalupe ហក់ឡើងយ៉ាងលឿន ឈានដល់កម្រិតខ្ពស់មិនធ្លាប់មាន។

ទឹកហូរយ៉ាងលឿនបានបង្កការខូចខាតធំធេងដល់ផ្ទះសម្បែង អាជីវកម្ម កន្លែងបោះជំរំ និងហេដ្ឋារចនាសម្ព័ន្ធនានា។ ការប៉ាន់ប្រមាណជាបឋមដោយ AccuWeather បង្ហាញថា ការខូចខាតសរុបនិងការខាតបង់សេដ្ឋកិច្ចពីទឹកជំនន់នេះអាចមានចាប់ពី១៨ពាន់លានដុល្លារដល់២២ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ គ្រោះទឹកជំនន់ដ៏សាហាវនៅតិចសាស់ ផ្តាច់ជីវិតមនុស្សឡើងដល់ ៨១នាក់