វៀតណាម ផ្តល់ជំនួយ២០ម៉ឺនដុល្លារអាមេរិកជូន កម្ពុជា ប្រយុទ្ធប្រឆាំងជំងឺកូវីដ-១៩

កាលពីថ្ងៃព្រហស្បតិ៍ម្សិលមិញនេះ ប្រទេសវៀតណាមបានផ្តល់ទឹកប្រាក់ចំនួន២០ម៉ឺនដុល្លារអាមេរិកជូនប្រទេសកម្ពុជា សម្រាប់ការប្រយុទ្ធប្រឆាំងនឹងជំងឺកូវីដ-១៩។ នេះបើយោងតាមការឲ្យដឹងពីក្រសួងការបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុរដ្ឋមន្រ្តីក្រសួងការបរទេសវៀតណាម លោក Nguyen Quoc Dung បានប្រគល់ប្រាក់ជូនដល់ឯកអគ្គរាជទូតកម្ពុជាប្រចាំនៅប្រទេសវៀតណាម លោក ឆាយ ណាវុធ។ 

លោកបានឲ្យដឹងថា ប្រទេសវៀតណាមសង្ឃឹមថា ការឧបត្ថម្ភនេះនឹងជួយប្រទេសកម្ពុជា ទប់ស្កាត់ការរីករាលដាលនៃជំងឺរាតត្បាត ធ្វើឲ្យស្ថានភាពនឹងននិងស្តារសេដ្ឋកិច្ចឡើងវិញ។

លោកបន្តថា ប្រទេសវៀតណាមសូមវាយតម្លៃខ្ពស់ចំពោះការពិតដែលថា ប្រទេសកម្ពុជាបានចាប់ផ្តើមកម្មវិធីចាក់វ៉ាក់សាំងកូវីដ សម្រាប់អ្នកការទូត រួមទាំងនិយោជិកនៃអង្គភាពតំណាងរបស់វៀតណាមក្នុងប្រទេសកម្ពុជាផងដែរ។

ស្របពេលជាមួយគ្នានោះ លោក ឆាយ ណាវុធ បានថ្លែងអំណរគុណចំពោះប្រទេសវៀតណាមដែលបានជួយ។ លោកបានសង្កត់ធ្ងន់ថា ជំនួយនេះគឺជាទ្រព្យសម្បត្តិដ៏សំខាន់ សម្រាប់ការប្រយុទ្ធប្រឆាំងនឹងការផ្ទុះឡើង នៃជំងឺកូវីដ-១៩ក្នុងសហគមន៍នាពេលបច្ចុប្បន្ន។

កាលពីខែមេសាឆ្នាំមុន ប្រទេសវៀតណាមបានផ្តល់ឧបករណ៍វេជ្ជសាស្ត្រ រួមមានឈុតការពារ, ម៉ាសនិងឧបករណ៍ធ្វើតេស្តជំងឺកូវីដ-១៩ ដែលមានតម្លៃជាង៧ពាន់លានដុង (៣០៣,៥៧៤ ដុល្លារ) ដល់ប្រទេសកម្ពុជា៕

ប្រែសម្រួលដោយ៖ Vann Vann

ប្រភព៖ VN Express

ចុចអាន៖ ឃុំ​មួយ​មិន​ឆ្ងាយ​ពី​ក្រុង​ភ្នំពេញ មានអ្នក​ឆ្លង ១២ នាក់ មានទាំង​ក្មេង​ ទាំង​ចាស់