ប៉ូលិសថៃ ពង្រីកការស៊ើបអង្កេតលើបណ្តាញផ្គត់ផ្គង់អាវុធទៅ មីយ៉ាន់ម៉ា បន្ទាប់ពីរឹបអូសគ្រាប់បែកនិងគ្រាប់កាំភ្លើង

ប៉ូលិសថៃ កំពុងតែពង្រីកការស៊ើបអង្កេតរបស់ពួកគេ បន្ទាប់ពីរឹបអូសបានគ្រាប់បែកដៃជាង១០០គ្រាប់ និងគ្រាប់កាំភ្លើង៦,០០០គ្រាប់នៅក្នុងស្រុក Mae Sai នៃខេត្តឈៀងម៉ៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គស្នងការរងនគរបាលជាតិលោក Suchart Thirasawat បាននិយាយថា ការរឹបអូសនេះបានធ្វើឡើងកាលពីថ្ងៃទី២៨ខែមីនា បន្ទាប់ពីបុគ្គលិកសេវាកម្មដឹកជញ្ជូនម្នាក់មានការសង្ស័យ ហើយបានជូនដំណឹងដល់ប៉ូលិសក្នុងតំបន់។

មន្ត្រីជំនាញបានឆែកឆេរកញ្ចប់ ហើយរកឃើញគ្រាប់បែកចំនួន១១៥គ្រាប់ និងគ្រាប់កាំភ្លើង M16 ចំនួន៦,០០០គ្រាប់។

កញ្ចប់ទាំងនោះ ត្រូវបានគេបញ្ជូនមកពីខេត្តចំនួនបីផ្សេងគ្នាគឺ Chon Buri, Nakhon Pathom និង Nakhon Si Thammarat ទៅកាន់ការិយាល័យសេវាកម្មដឹកជញ្ជូននៅក្នុងស្រុកជាប់ព្រំដែន ដែលជាកន្លែងពួកគេនឹងត្រូវប្រមូល ហើយបញ្ជូនបន្តទៅអាសយដ្ឋានមួយនៅក្នុងប្រទេសមីយ៉ាន់ម៉ា។

បុគ្គលឈ្មោះ Manokorn Sangsorn អាយុ២៩ឆ្នាំនិង Songsak Sirichairungruang អាយុ៣១ឆ្នាំ ត្រូវបានចាប់ខ្លួននៅពេលពួកគេចូលទៅប្រមូលកញ្ចប់ទាំងនោះ។ អ្នកទាំងពីរត្រូវបានចោទប្រកាន់ពីបទកាន់កាប់អាវុធខុសច្បាប់។

លោកឧត្តមសេនីយ៍ Suchart បាននិយាយថា ក្រុមមន្រ្តីបានរកឃើញទំនាក់ទំនងរវាងកញ្ចប់ទាំងនេះ និងបានកំណត់ថា ពួកគេត្រូវបានផ្សារភ្ជាប់ទៅនឹងក្រុមជួញដូរគ្រឿងញៀននៅភាគខាងជើង និងបណ្តាញរត់ពន្ធអាវុធនៅភាគខាងត្បូង។

ការសាកសួរបន្ថែម បាននាំទៅដល់ការចាប់ខ្លួនមនុស្ស៤នាក់ផ្សេងទៀត។ អ្នកទាំង៦ ត្រូវបានប្រគល់ទៅឲ្យប៉ូលិសស្រុក Mae Sai៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ ប៉ូលិសម្នាក់ជួយការពារអ្នកតវ៉ាត្រូវកម្លាំងយោធាមីយ៉ាន់ម៉ាបាញ់ស្លាប់