ព័ត៌មានអន្ដរជាតិ

និស្សិតបង់ក្លាដែសទាមទាររកការទទួលខុសត្រូវ ក្រោយធ្លាក់យន្តហោះលើសាលារៀនសម្លាប់មនុស្ស៣១នាក់

បានផុស

៩ ខែ មុន

នៅ

ថ្ងៃពុធ ២៣ កក្កដា ២០២៥

ដោយ

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៣ខែកក្កដា ការតវ៉ាផ្ទុះឡើងនៅទូទាំងទីក្រុង Dhaka បន្ទាប់ពីយន្តហោះហ្វឹកហ្វឺនរបស់កងទ័ពអាកាសបង់ក្លាដែសបានធ្លាក់ចូលទៅក្នុងសាលារៀន និងមហាវិទ្យាល័យ Milestone កាលពីថ្ងៃច័ន្ទ បានសម្លាប់មនុស្ស ៣១ នាក់ ក្នុងចំណោមពួកគេ ២៥ នាក់ជាសិស្ស។

និសិ្សតបង់ក្លាដែសលើកស្លាកតវ៉ា ទាមទារឲ្យមានទំនួលខុសត្រូវក្រោយហេតុការណ៍ធ្លាក់យន្តហោះ។ (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ដ៏រន្ធត់នេះបានកើតឡើង ខណៈពេលសិស្សកំពុងសិក្សានិងរៀបនឹងចេញទៅផ្ទះវិញ។ យោធាបានលើកឡើងពីបញ្ហាគ្រឿងម៉ាស៊ីនថាជាមូលហេតុនៃការធ្លាក់ដែលបានបណ្តាលឲ្យមនុស្ស១៦៥នាក់រងរបួសក្នុងនោះ១០នាក់ស្ថិតក្នុងស្ថានភាពធ្ងន់ធ្ងរ។

សិស្សានុសិស្ស និងប្រជាពលរដ្ឋក្នុងមូលដ្ឋានបានតវ៉ានៅតាមដងផ្លូវដោយស្នើឱ្យរដ្ឋាភិបាលទទួលខុសត្រូវ។ ពួកគេចង់បានបញ្ជីច្បាស់លាស់នៃអ្នកស្លាប់ និងអ្នកណាដែលរងរបួស ប្រាក់សំណងសម្រាប់គ្រួសារជនរងគ្រោះ និងសម្រាប់យន្តហោះចាស់ដែលគ្មានសុវត្ថិភាពត្រូវបញ្ឈប់ការប្រើប្រាស់។ ក្រុមបាតុករបានសម្រុកចូលអគាររដ្ឋាភិបាល ហើយបានប៉ះទង្គិចជាមួយប៉ូលិស ដែលបានប្រើឧស្ម័នបង្ហូរទឹកភ្នែក ដើម្បីបំបែកហ្វូងមនុស្ស បណ្តាលឲ្យមនុស្សរាប់សិបនាក់រងរបួស។

ក្រុមគ្រួសារសាច់ញាតិជនរងគ្រោះ។ (រូបភាព៖ Reuters)

រដ្ឋាភិបាលបានសន្យាថានឹងបញ្ចេញឈ្មោះជនរងគ្រោះ និងបានបញ្ជាឱ្យកងកម្លាំងអាកាសជៀសវាងការហោះហើរហ្វឹកហាត់លើតំបន់ដែលមានប្រជាជនច្រើន។ ហេតុការណ៍នេះបានធ្វើឲ្យប្រទេសជាតិមានការតក់ស្លុតយ៉ាងក្រៀមក្រំជាមួយក្រុមគ្រួសារកាន់ទុក្ខចំពោះការបាត់បង់កូនភ្លាមៗ។

គួរបញ្ជាក់ថាសោកនាដកម្មនេះបានកើតឡើងមិនយូរប៉ុន្មានបន្ទាប់ពីហេតុការណ៍ធ្លាក់យន្តហោះដ៏សាហាវនៅក្នុងប្រទេសឥណ្ឌា ដែលធ្វើឱ្យប្រជាជនក្នុងតំបន់ព្រួយបារម្ភកាន់តែខ្លាំងអំពីសុវត្ថិភាពហោះហើរ៕