ព័ត៌មានអន្ដរជាតិ

ហាម៉ាស ប្តេជ្ញាថា នឹងមិនដកអាវុធទេ រហូតទាល់តែរដ្ឋប៉ាឡេស្ទីន បង្កើតឡើង

បានផុស

៩ ខែ មុន

នៅ

ថ្ងៃអាទិត្យ ៣ សីហា ២០២៥

ដោយ

ទូរទស្សន៍ BBC កាលពីថ្ងៃទី ៣ ខែសីហា បានរាយការណ៍ពីក្រុមហាម៉ាសដែលអះអាងសារជាថ្មីថា ពួកគេនឹងមិនយល់ព្រមក្នុងការរំសាយអាវុធទេ លុះត្រាតែមានរដ្ឋអធិបតេយ្យភាពប៉ាឡេស្ទីនត្រូវបានបង្កើតឡើង ដើម្បីឆ្លើយតបទៅនឹងការទាមទារដ៏សំខាន់មួយរបស់អ៊ីស្រាអែល ក្នុងការពិភាក្សាអំពីបទឈប់បាញ់នៅតំបន់ហ្គាហ្សា។

រូបភាពឯកសារពីខែកុម្ភៈ បង្ហាញពីក្រុមយុទ្ធជនប្រដាប់អាវុធ ហាម៉ាស អំឡុងពេលការប្រគល់ចំណាប់ខ្មាំងអ៊ីស្រាអែល (រូបភាពពី៖EPA-EFE/REX/Shutterstock)

ក្រុមប្រដាប់អាវុធប៉ាឡេស្ទីនបាននិយាយថា ខ្លួនកំពុងឆ្លើយតបទៅនឹងការកត់សម្គាល់ដែលខ្លួនសន្មតថា ជាបេសកជនមជ្ឈិមបូព៌ារបស់ប្រធានាធិបតីអាមេរិក ដូណាល់ ត្រាំ និងបង្ហាញឆន្ទៈដើម្បីបញ្ឈប់អាវុធរបស់ខ្លួន។

អ៊ីស្រាអែលចាត់ទុកការរំសាយអាវុធរបស់ក្រុមហាម៉ាស ជាលក្ខខណ្ឌសំខាន់មួយសម្រាប់កិច្ចព្រមព្រៀងណាមួយដើម្បីបញ្ចប់ជម្លោះ។ យ៉ាងណា ការចរចាដោយប្រយោលរវាងអ៊ីស្រាអែល និងក្រុមហាម៉ាស ដើម្បីទទួលបានបទឈប់បាញ់ និងការដោះលែងចំណាប់ខ្មាំង បានជាប់គាំងកាលពីសប្តាហ៍មុន។

ជាងនេះទៀត ក្នុងប៉ុន្មានថ្ងៃថ្មីៗ រដ្ឋាភិបាលអារ៉ាប់បានអំពាវនាវឲ្យក្រុមហាម៉ាសបញ្ឈប់អាវុធរបស់ខ្លួន និងចុះចាញ់ការគ្រប់គ្រងតំបន់ហ្គាហ្សាស្ទ្រីប បន្ទាប់ពីប្រទេសលោកខាងលិចដូចជាកាណាដា និងបារាំង បានប្រកាសថាពួកគេនឹងទទួលស្គាល់ប៉ាឡេស្ទីនជារដ្ឋ។ ក្នុងនោះផងដែរ សូម្បីតែអង់គ្លេសក៏បានបញ្ជាក់ថា ខ្លួននឹងទទួលស្គាល់ប៉ាឡេស្ទីន បើអ៊ីស្រាអែល មិនគោរពតាមកិច្ចព្រមព្រៀងខែកញ្ញា។

ដោយឡែក ឧត្តមសេនីយ Eyal Zamir នៃកងកម្លាំងការពារអ៊ីស្រាអែល (IDF) បានព្រមានកាលពីថ្ងៃសុក្រថា នឹងមិនមានការសម្រាកក្នុងការប្រយុទ្ធគ្នានៅក្នុងតំបន់ហ្គាហ្សា ប្រសិនបើការចរចាបរាជ័យក្នុងការធានាឲ្យបានឆាប់រហ័សនូវការដោះលែងចំណាប់ខ្មាំង ដែលត្រូវបានចាប់ខ្លួនដោយក្រុមហាម៉ាស។

ពួកគេបានចោទប្រកាន់ក្រុមហាម៉ាសថា បានបង្អត់អាហារចំណាប់ខ្មាំងជាផ្នែកនៃយុទ្ធនាការឃោសនា ហើយបានអំពាវនាវដល់រដ្ឋាភិបាលអ៊ីស្រាអែល និងសហរដ្ឋអាមេរិក ឲ្យធ្វើអ្វីគ្រប់យ៉ាងដែលអាចធ្វើទៅបានដើម្បីជួយសង្រ្គោះចំណាប់ខ្មាំង៕