ថៃ ចាប់ផ្តើមខ្វល់ចិត្តខ្លាំង ព្រោះបាត់កម្លាំងពលកម្មចាំបាច់ ក្រោយពលករខ្មែរ វិលចូលប្រទេសវិញ

អង្គការ Migrant Working Group (MWG) នៅប្រទេសថៃ បានបង្ហាញក្តីបារម្ភខ្លាំងនៅពេលពលករខ្មែររាប់ម៉ឺននាក់វិលត្រឡប់មកប្រទេសវិញ ដែលកត្តានេះធ្វើឲ្យថៃ បាត់កម្លាំងពលកម្មចាំបាច់ ប៉ះពាល់ខ្លាំងដល់វិស័យកសិកម្មនិងផលិតកម្ម ជាពិសេសនៅតាមខេត្តជាប់ព្រំដែនតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Adisorn Kerdmongkol អ្នកសម្របសម្រួលនៅ MWG និយាយកាលពីថ្ងៃសុក្រទី៨ខែសីហាថា តួលេខពលករខ្មែរវិលចូលប្រទេសវិញ គឺលើសពីរបាយការណ៍ទៅទៀត។

ស្របពេលជាមួយគ្នានោះ លោកបានបន្ទោសរដ្ឋាភិបាលក្រុងបាងកក ថា ដោយសារតែជម្លោះព្រំដែន កង្វះទំនាក់ទំនង ការធានាសុវត្ថិភាព និងនីតិវិធីច្បាប់ទើបបណ្តាលឲ្យពលករខ្មែរចាកចេញ។

តាមការលើកឡើងរបស់លោក Adisorn, ការចាកចេញរបស់ពលករខ្មែរ បង្កផលប៉ះពាល់ខ្លាំងបំផុតដល់វិស័យកសិកម្មថៃនៅតាមបណ្តាខេត្តនានាដូចជា Chanthaburi ជាដើម ធ្វើឲ្យម្ចាស់កសិដ្ឋានទាំងឡាយ ជួបបញ្ហានិងកំពុងឈឺក្បាលខ្លាំង។ 

សូមជម្រាបថា របាយការណ៍ពីរដ្ឋាភិបាលក្រុងបាងកកបង្ហាញថា ពលករខ្មែរសរុបដែលធ្វើការនៅប្រទេសថៃ មានចន្លោះពី ១ទៅ១.៥លាននាក់។

ទោះបីជាយ៉ាងណាក៏ដោយ យោងតាមក្រសួងការងារកម្ពុជា, តាំងពីផ្ទុះជម្លោះព្រំដែនមក ពលករខ្មែរប្រមាណ ៨៧ម៉ឺននាក់បានត្រឡប់ចូលប្រទេសវិញកម្ពុជាវិញ គិតត្រឹមថ្ងៃទី៨ ខែសីហា៕

អត្ថបទ៖ សុខ សុវណ្ណ

ចុចអាន៖ អាជ្ញាធរខេត្តស្វាយរៀង បានដឹកជញ្ជូនពលករខ្មែរ ៣៦នាក់ ដែលត្រឡប់មកពីថៃ ដល់លំនៅដ្ឋានដោយសុវត្ថិភាព