អតីតមេក្រុមប្រឹក្សាសន្តិសុខជាតិថៃ ជំទាស់ការបន្តអាណត្តិមេភូមិភាគ២ និងប្រាប់ថា មិនគួរឲ្យតម្លៃនរណាម្នាក់ខ្លាំងពេកទេ

លេចចេញសញ្ញានៃការខ្វែងគំនិតគ្នាក្នុងប្រទេសថៃ ដោយអតីតមេក្រុមប្រឹក្សាសន្តិសុខជាតិ Paradorn Pattanathabutr (ភរ៉ាដន ផាត់ថាណាតាបុត្រ) បានជំទាស់យ៉ាងដាច់អហង្ការចំពោះការបន្តអាណត្តិរបស់មេភូមិភាគ២ថៃ Boonsin Padklang (ប៊ុនស៊ីន ផាត់ខ្លាង)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសតាមទូរស័ព្ទជាមួយ The Nation នៅថ្ងៃចន្ទទី១១ខែសីហាឆ្នាំ២០២៥ លោក ភរ៉ាដន និយាយថា បើមេភូមិភាគ២ ត្រូវបន្តអាណត្តិមែន នោះវានឹងធ្វើឲ្យខូចដល់ប្រព័ន្ធដំឡើងឋានៈទាហានដែលផ្អែកលើគុណសម្បត្តិ ខណៈប្រព័ន្ធនេះត្រូវបានបង្កើតឡើងជាយូរមកហើយ។

លោកនិយាយថា «មិនខ្វះទេអ្នកដែលមានសមត្ថភាព! យើងមិនគួរឲ្យតម្លៃលើបុគ្គលណាម្នាក់ខ្លាំងពេកឡើយ ព្រោះវានឹងធ្វើឲ្យខូចប្រព័ន្ធក្នុងរយៈពេលវែង។ មានបុគ្គលដែលមានសមត្ថភាពជាច្រើននាក់ កំពុងរង់ចាំស្នងតំណែងនេះ។ ប្រទេសថៃគួរតែបង្ហាញពីវិជ្ជាជីវៈ»។

ការជំទាស់របស់លោក ភរ៉ាដន កើតឡើងបន្ទាប់ពីអ្នកលេងបណ្តាញសង្គមក្នុងប្រទេសថៃ នាំគ្នាអំពាវនាវឲ្យរដ្ឋាភិបាលទីក្រុងបាងកក បន្តអាណត្តិរបស់មេភូមិភាគ២ រយៈពេល៥ឆ្នាំទៀត។

ដោយសារតែហេតុនេះហើយ ទើបធ្វើឲ្យប៊ុនស៊ីន ផាត់ខ្លាង កាន់តែបានចិត្តនិងអំនួត ហើយចិញ្ចឹមចិត្តឈ្លានពានទឹកដីខ្មែរ ដល់ថ្នាក់ហ៊ានហាមាត់ទាំងមិនខ្មាសថា នឹងវាយយកប្រាសាទខ្មែរនិងបិទប្រាសាទខ្មែរថែមទៀតផង។

សូមជម្រាបថា ប៊ុនស៊ីន ផាត់ខ្លាង នឹងត្រូវចូលនិវត្តន៍នៅចុងខែកញ្ញាឆ្នាំ ២០២៥ ហើយមកទល់បច្ចុប្បន្ន រឿងនេះ កំពុងក្លាយជាប្រធានបទត្រូវបានគេជជែកវែកញែកយ៉ាងក្តៅគគុកនៅក្នុងប្រទេសថៃ៕

អត្ថបទ៖ សុខ សុវណ្ណ

ចុចអាន៖ ការស្ទង់មតិ៖ ទំនុកចិត្តប្រជាជនថៃ លើរដ្ឋាភិបាលខ្លួន ធ្លាក់ចុះដល់កម្រិតទាបបំផុត