ព័ត៌មានអន្ដរជាតិ

អគ្គលេខាធិការបក្សភឿថៃ ច្រានចោលការវិលត្រឡប់របស់ លោក ប្រាយុធ

បានផុស

៩ ខែ មុន

នៅ

ថ្ងៃអង្គារ ១៩ សីហា ២០២៥

ដោយ

មន្ត្រីជាន់ខ្ពស់គណបក្សភឿថៃ នៅថ្ងៃអង្គារនេះ បានច្រានចោលនូវការលើកឡើងដែលថា ឧត្តមសេនីយ៍ ប្រាយុធ ចាន់-អូ-ចា ( Prayut Chan-o-cha) អតីតនាយករដ្ឋមន្ត្រីថៃ ដែលបានប្រកាសចូលនិវត្តន៍ពីនយោបាយកាលពីខែមិថុនាឆ្នាំ២០២៣ នឹងវិលមកកាន់តំណែងនាយករដ្ឋមន្ត្រីវិញ ក្នុងពេលដែលភាពមិនច្បាស់លាស់ចំពោះកៅអីនាយករដ្ឋមន្ត្រីរបស់លោកស្រី ផែថងថាន ស៊ីណាវ៉ាត្រ។

អគ្គលេខាធិការបក្សភឿថៃ លោក Sorawong Thienthong។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិការបក្សភឿថៃ លោក Sorawong Thienthong ដែលកាន់តួនាទីជារដ្ឋមន្ត្រីទេសចរណ៍និងកីឡាផងដែនោះ បានច្រានចោលការរំពឹងទុកដែលថា ឧត្តមសេនីយ៍ ប្រាយុធ ដែលបច្ចុប្បន្នជាសមាជិកនៃក្រុមប្រឹក្សារាជបល្ល័ង្ករបស់ មហាក្សត្រថៃ អាចវិលមកធ្វើជានាយករដ្ឋមន្ត្រីវិញ។ យោងការផ្សាយរបស់ The Nation។

ការលើកឡើងរបស់មន្ត្រីជាន់ខ្ពស់គណបក្សភឿថៃដែលកំពុងដឹកនាំរដ្ឋាភិបាលចម្រុះ កើតឡើងចំពេលដែល មានសេចក្តីរាយការណ៍ដែលថា នាយករដ្ឋមន្ត្រីដែលត្រូវបានព្យួរតំណែង លោកស្រី ផែថងថាន ស៊ីណាវ៉ាត្រ (Paetongtarn Shinawatra) បានអាក់ខានចូលរួមកិច្ចប្រជុំគណៈរដ្ឋមន្ត្រីពីរលើកជាប់ៗគ្នាចុងក្រោយ ដែលនាំទៅដល់រីកសាយភាយនូវពាក្យចចាមអារ៉ាមថា លោកស្រីផែថងថានបានលាលែងពីអំណាច នៅមុនពេលតុលាការធម្មនុញ្ញប្រកាសសាលក្រម។

តុលាការធម្មនុញ្ញថៃគ្រោងប្រកាសសាលក្រមនៅថ្ងៃទី២៩ខែសីហានេះ តាមបណ្តឹងរបស់ព្រឹទ្ធសមាជិក៣៦រូប ដែលប្តឹងលោកស្រីថា រំលោភក្រមរដ្ឋធម្មនុញ្ញដោយសារតែការនិយាយទូរស័ព្ទជាមួយសម្តេចតេជោ ហ៊ុន សែន ជុំវិញវិធានការ បិទនិងបើកច្រកទ្វារព្រំដែន ដោយលោកស្រី បានរិះគន់ទៅលើចំណាត់ការរបស់មេភូមិភាគ២របស់ថៃ លោក ប៊ុនស៊ីន ផាតក្លាង ដែលសម្រេចជាឯកតោភាគី មិនបានយកការសម្រេចរបស់រដ្ឋាភិបាលស៊ីវិល។

ទោះបីជាបែបនេះក្តី នាយករដ្ឋមន្ត្រីស្តីទីថៃ លោក Phumtham Wechayachai បានចេញមុខអះអាងកាលថ្ងៃទី១៨ខែសីហាថា មិនមានការលាលែងពីអំណាចរបស់នាយករដ្ឋមន្ត្រី ផែថងថាន នៅឡើយទេ៕

រ៉ាន់ រើយ