ហ្សេលេនស្គី៖ ទោះ​អាមេរិក​មិន​បើកដៃ អ៊ុយក្រែន​អាច​វាយ​ចូល​ជ្រៅ​ក្នុង​ដី​រុស្ស៊ី ដោយ​ប្រើ​អាវុធ​ផលិត​ដោយ​ខ្លួនឯង

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានអះអាង​​ថា ទីក្រុង​កៀវ​ កំពុងប្រើប្រាស់អាវុធរយៈចម្ងាយឆ្ងាយដែលផលិតក្នុងស្រុក ដើម្បីវាយប្រហារគោលដៅនានាក្នុងទឹកដីរុស្ស៊ី ហើយនឹងលែង​សុំ​ការ​អនុញ្ញាត​ពី​សហរដ្ឋអាមេរិកទៀតហើយ។

យោង​តាម​ការ​ចុះផ្សាយ​របស់​ Kyiv Post កាល​ពី​ថ្ងៃទី​២៥​ខែ​សីហា​ ការកត់សម្គាល់នេះ ធ្វើឡើងក្នុងសន្និសីទសារព័ត៌មានជាមួយនាយករដ្ឋមន្ត្រីកាណាដា លោក Mark Carney បន្ទាប់​ពី​មាន​របាយការណ៍ថ្មីៗ​របស់ The Wall Street Journal អំពីការរឹតបន្តឹង​របស់ក្រុង​វ៉ាស៊ីនតោន​លើការប្រើប្រាស់មីស៊ីលរយៈចម្ងាយឆ្ងាយដែលផ្តល់ដោយអាមេរិក​ទៅ​ឲ្យ​​អ៊ុយក្រែន។

សេចក្តីថ្លែងការណ៍របស់​លោក ហ្សេលេនស្គី បញ្ជាក់ពីការផ្លាស់ប្តូរនៅក្នុងគោលនយោបាយកំណត់គោលដៅ
ការប្រើប្រាស់អាវុធក្នុងស្រុក ដោយ​លើក​ឡើង​ថា «នៅពេលបច្ចុប្បន្ននេះ និយាយដោយស្មោះត្រង់ យើងកំពុងប្រើប្រាស់អាវុធរយៈចម្ងាយឆ្ងាយរបស់យើងដែល​ផលិតក្នុងស្រុក។ ហើយថ្មីៗនេះ យើងមិនបានពិភាក្សាអំពីបញ្ហាបែបនេះជាមួយសហរដ្ឋអាមេរិកទេ»។

សេចក្តីប្រកាសពី​លោក ហ្សេលេនស្គី ស្របទៅនឹងការកើនឡើងនៃការវិនិយោគរបស់អ៊ុយក្រែននៅក្នុងសមត្ថភាពរយៈចម្ងាយឆ្ងាយរបស់ខ្លួន។ នេះរាប់បញ្ចូលទាំងការអភិវឌ្ឍនៃមីស៊ីល​គ្រូស «Flamingo» ដែលមានរយៈចម្ងាយ​រហូតដល់ ៣ ០០០​គីឡូម៉ែត្រ ដែល​លោក ហ្សេលេនស្គី បាននិយាយមុននេះថានឹងចូលផលិតកម្មដ៏ធំនៅដើមឆ្នាំ​២០២៦។ បន្ថែម​ពី​នេះ អ៊ុយក្រែនក៏បានដាក់បង្ហាញនូវកំណែទំនើបកម្មរយៈចម្ងាយឆ្ងាយនៃមីស៊ីល Neptune របស់ខ្លួន ដែលមានសមត្ថភាពវាយប្រហារគោលដៅបានចម្ងាយ ១ ០០០​គីឡូម៉ែត្រ។ មីស៊ីល​ថ្មីនេះត្រូវបានលាតត្រដាង​នៅថ្ងៃបុណ្យឯករាជ្យរបស់ប្រទេសអ៊ុយក្រែន កាល​ពី​ថ្ងៃ​អាទិត្យ​ទី​២៤​ខែ​សីហា៕

ដោយ៖ ឈាង