អតីតសមាជិកព្រឹទ្ធសភាថៃ ដាក់ញត្តិ ជំរុញឲ្យរំលាយគណបក្សភឿថៃ ចោល

អតីតសមាជិកព្រឹទ្ធសភានិងជាសកម្មជននយោបាយថៃលោក Ruangkrai Leekitwattana (រឿងក្រៃ លីគីតវ៉ាត់ថៈណា) បានដាក់ញត្តិផ្ទាល់ខ្លួន សុំឲ្យរំលាយគណបក្សភឿថៃចោល បន្ទាប់ពីតុលាការធម្មនុញ្ញ សម្រេចដកតំណែងនាយករដ្ឋមន្ត្រី ផែថងថាន ស៊ីណាវ៉ាត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក រឿងក្រៃ បានដាក់ញត្តិនេះទៅគណៈកម្មាធិការរៀបចំការបោះឆ្នោត ដោយជំរុញឲ្យគណៈកម្មាធិការ យកសាលក្រមរបស់តុលាការធម្មនុញ្ញ ជាអំណះអំណាងដើម្បីរំលាយបក្សភឿថៃ ដូចទៅនឹងការរំលាយគណបក្ស ថៃរក្សាជាតិ ដែរ។

គណបក្ស ថៃរក្សាជាតិ ត្រូវបានរំលាយចោលដោយសេចក្តីសម្រេចរបស់តុលាការរដ្ឋធម្មនុញ្ញថៃកាលពីថ្ងៃទី ៧ ខែមីនា ឆ្នាំ ២០១៩ ដោយសារតែបក្សបានតែងតាំងព្រះនាង Ubolratana Rajakanya Sirivadhana Barnavadi ជាបេក្ខភាពនាយករដ្ឋមន្ត្រី សម្រាប់ការបោះឆ្នោតសកលឆ្នាំ ២០១៩។ 

សកម្មភាពនេះត្រូវបានចាត់ទុកថាជាអំពើមិនសមរម្យ និងជាការបំពានច្បាប់រដ្ឋធម្មនុញ្ញ ហើយត្រូវបានគេមើលឃើញថាជាការអូសទាញព្រះរាជវង្សានុវង្សចូលមកក្នុងកិច្ចការនយោបាយ។

យ៉ាងណា ពាក់ព័ន្ធគណបក្សភឿថៃឯណេះវិញ លោក Ruangkrai ស្នើឲ្យគណៈកម្មាធិការរៀបចំការបោះឆ្នោត ពិចារណាលើសាលក្រមរបស់តុលាការធម្មនុញ្ញកាលពីថ្ងៃទី២៩ខែសីហាឆ្នាំ២០២៥ យកធ្វើជាព័ស្តុតាងដ៏គួរឲ្យជឿជាក់ថា គណបក្សភឿថៃ ដែលដឹកនាំដោយ ផែថងថាន ធ្វើសកម្មភាពខុសឆ្គងលើរបបប្រជាធិបតេយ្យដែលមានព្រះមហាក្សត្រជាព្រះប្រមុខរដ្ឋ ដោយបំពានលើមាត្រា៩២ នៃច្បាប់ស្តីពីគណបក្សនយោបាយឆ្នាំ២០១៧។

សូមជម្រាបជាថ្មី លោកស្រី ផែថងថាន ត្រូវបានតុលាការធម្មនុញ្ញ សម្រេចក្នុងសំឡេង ៦-៣ ដកតំណែងនាយករដ្ឋមន្ត្រីជាផ្លូវការ កាលពីចុងសប្តាហ៍កន្លងទៅ។

ក្រោយមក មនុស្សរាប់រយនាក់បានធ្វើបាតុកម្មនៅវិមានជ័យជម្នះក្នុងទីក្រុងបាងកក ដើម្បីប្រឆាំងនឹងគណបក្សភឿថៃ ដែលមានបំណងបង្កើតរដ្ឋាភិបាលថ្មី ហើយនៅតែក្រាញននៀលនឹងអំណាច៕

អត្ថបទ៖ សុខ សុវណ្ណ 

ចុចអាន៖ ផ្ទុះបាតុកម្មនៅបាងកក ប្រឆាំងការក្រាញននៀលអំណាចរបស់បក្ស ភឿថៃ