រន្ធត់! បាក់ដីភ្នំកប់ភូមិ ស្លាប់មនុស្សជាង ១ ០០០នាក់ នៅប្រទេស ស៊ូដង់

សោកនាដកម្មបាក់ដីភ្នំយ៉ាងរន្ធត់ កប់ភូមិមួយនៅប្រទេសស៊ូដង់ បានឆក់យកជីវិតមនុស្សជាង ១ ០០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ CNN ដែលដកស្រង់ប្រភពពីកងទ័ពស៊ូដង់, សោកនាដកម្មនេះកើតឡើងកាលពីថ្ងៃអាទិត្យទី៣១ខែសីហាឆ្នាំ២០២៥ ក្នុងតំបន់ភ្នំ Marra ភាគខាងលិចប្រទេស ដោយបំណាក់ដីបានកម្ទេចភូមិមួយទាំងមូល ប៉ុន្តែមានមនុស្សម្នាក់អាយុថ្លៃ បានរួចជីវិតពីហេតុការណ៍នេះ។

ស្របពេលជាមួយគ្នានោះ កងទ័ពស៊ូដង់ បានអំពាវនាវឲ្យអង្គការសហប្រជាជាតិនិងបណ្តាអង្គការមនុស្សធម៌អន្តរជាតិ មេត្តាផ្តល់ជំនួយ ដើម្បីរកសាកសពមនុស្សបន្ថែមទៀត។

សូមជម្រាបថា គ្រោះធម្មជាតិនេះ កើតឡើងចំពេលប្រទេសស៊ូដង់ កំពុងតែរ៉ាំរ៉ៃដោយសារសង្គ្រាមស៊ីវិលដែលផ្ទុះឡើងនៅថ្ងៃទី ១៥ ខែមេសា ឆ្នាំ ២០២៣ រវាងកងកម្លាំងប្រដាប់អាវុធស៊ូដង់ (SAF) ដែលដឹកនាំដោយឧត្តមសេនីយ៍ Abdel Fattah al-Burhan និងកងកម្លាំងជំនួយឆាប់រហ័ស (RSF) ដែលដឹកនាំដោយឧត្តមសេនីយ៍ Mohamed Hamdan Dagalo។

សង្គ្រាមនេះបណ្តាលឲ្យមនុស្សរាប់ពាន់នាក់ស្លាប់ និងរាប់ម៉ឺននាក់រងរបួស ហើយប្រជាជនជាង ១១ លាននាក់ ត្រូវបង្ខំចិត្តរត់ភៀសខ្លួនចេញពីផ្ទះសម្បែងរបស់ពួកគេ។ ក្នុងនោះមានប្រហែល ៧ លាននាក់ ជម្លៀសខ្លួនក្នុងប្រទេស និង ៤ លាននាក់ ទៀតរត់ទៅជ្រកកោននៅប្រទេសជិតខាងដូចជា ឆាដ អេហ្ស៊ីប និងស៊ូដង់ខាងត្បូង។

មិនត្រឹមប៉ុណ្ណឹង ប្រជាជនស៊ូដង់ជិត ២៥ លាននាក់ កំពុងប្រឈមនឹងកង្វះខាតស្បៀងអាហារធ្ងន់ធ្ងរ ហើយសេវាសុខភាពមូលដ្ឋានស្ទើរតែទាំងអស់ត្រូវដួលរលំ៕

អត្ថបទ៖ សុខ សុវណ្ណ

ចុចអាន៖ បាក់ស្រុត​​អណ្ដូងរ៉ែមាសសម្លាប់មនុស្ស​១១​នាក់ស្លាប់ក្នុងប្រទេសស៊ូដង់