លោក Anutin ប្រកាស​ឈ្មោះ​មន្ត្រី​ជើង​ចាស់​នៅ​ក្នុង​ជួរ​រដ្ឋាភិបាល​ថ្មី ដើម្បី​ស្ដារ​ទំនុកចិត្ត​ឡើងវិញ

នាយករដ្ឋមន្ត្រីថៃទើប​ជាប់ឆ្នោតលោក Anutin Charnvirakul បាន​ប្រកាស​តែងតាំងគណៈរដ្ឋមន្ត្រីជើងចាស់​មួយ​ចំនួន ដើម្បីជួយស្តារទំនុកចិត្តឡើងវិញក្នុងអំឡុងពេលនៃភាពចលាចលនយោបាយ និងកំណើនសេដ្ឋកិច្ចយឺតយ៉ាវ។

ការតែងតាំងគណៈរដ្ឋមន្ត្រីសំខាន់ៗ​របស់​លោក Anutin មាន​ដូចជា៖

• រដ្ឋមន្ត្រីហិរញ្ញវត្ថុ៖ លោក Ekniti Nitithanprapas អតីតប្រធាននាយកដ្ឋានរតនាគារ
• រដ្ឋមន្ត្រីថាមពល៖ លោក Auttapol Rerkpiboon អតីតប្រធាន និងជានាយកប្រតិបត្តិនៃក្រុមហ៊ុនថាមពលយក្សថៃ PTT
• រដ្ឋមន្ត្រីការបរទេស៖ លោក Sihasak Phuangketkeow ដែលជាជើងចាស់​ការទូត និងជាអតីតតំណាងអចិន្ត្រៃយ៍ប្រចាំអង្គការសហប្រជាជាតិ
• ឧបនាយករដ្ឋមន្ត្រី និងជារដ្ឋមន្ត្រីក្រសួងសាធារណការ៖ លោក Santi Promphat អនុប្រធានគណបក្ស Palang Pracharath (PPRP)។

លោក Anutin ដែល​ជា​អតីតឧបនាយករដ្ឋមន្ត្រី រដ្ឋមន្ត្រីក្រសួងសុខាភិបាល និងរដ្ឋមន្ត្រីមហាផ្ទៃ បានសង្កត់ធ្ងន់ថា ការតែងតាំងឥស្សរជនដែលមានបទពិសោធន៍ឲ្យកាន់តំណែងសំខាន់ៗ គឺដើម្បីធានាដល់សាធារណជន និងមន្ត្រីរដ្ឋាភិបាល។ ចំណាត់ការនេះ បានធ្វើឡើងបន្ទាប់ពីអស្ថិរភាពជាច្រើនខែ រួមទាំងជម្លោះព្រំដែនជាមួយប្រទេសកម្ពុជា, ការបណ្តេញអតីតនាយករដ្ឋមន្ត្រី ផែថងថាន ស៊ីណាវ៉ាត្រ ដោយសេចក្តីសម្រេចរបស់តុលាការ, និងការដកខ្លួនជាបន្តបន្ទាប់របស់គណបក្ស Bhumjaithai ពីក្រុមចម្រុះដឹកនាំដោយភឿថៃ។

គណបក្សអភិរក្សនិយម Bhumjaithai របស់លោក Anutin បានបង្កើតរដ្ឋាភិបាលភាគតិច បន្ទាប់ពីទទួលបានការគាំទ្រពីគណបក្សប្រជាជន ក្រោម​លក្ខខណ្ឌ​រំលាយសភា និងរៀបចំការបោះឆ្នោតថ្មីក្នុងរយៈពេល​៤​ខែខាង​មុខ ក៏ដូចជាការងារឆ្ពោះទៅរកវិសោធនកម្មរដ្ឋធម្មនុញ្ញដែលព្រាងដោយយោធា។

លោក Anutin បានសង្កត់ធ្ងន់ថា ពេលវេលា​​មាន​កំណត់​សម្រាប់​រដ្ឋាភិបាល​របស់​លោក ដោយ​ទាមទារ​ឲ្យ​ត្រូវមាន​​ដំណោះស្រាយ​យ៉ាង​ឆាប់​រហ័សចំពោះ​បញ្ហា​ប្រឈមសេដ្ឋកិច្ច និងអស្ថិរភាពនយោបាយរបស់ប្រទេសថៃ៕

ដោយ៖ ឈាង